15.9C Vancouver 15.9C VancouverDec 3, 2025 1:10 PM - Connect Newsroom - Ramandeep Kaur with files from The Canadian Press
ਵੈਨਕੂਵਰ ਆਈਲੈਂਡ 'ਤੇ ਸਥਿਤ ਇਕ ਪਲਪ ਮਿੱਲ 'ਚੋਂ ਕਰੀਬ 350 ਵਰਕਰਸ ਦੀ ਛਾਂਟੀ ਕੀਤੀ ਜਾਵੇਗੀ। ਕੰਪਨੀ ਨੇ ਮੰਗਲਵਾਰ ਐਲਾਨ ਕੀਤਾ ਕਿ ਉਹ ਆਪਣੀ ਸਹੂਲਤ ਸਥਾਈ ਤੌਰ 'ਤੇ ਬੰਦ ਕਰ ਰਹੀ ਹੈ। ਡੋਮਟਾਰ ਕੰਪਨੀ ਦਾ ਕਹਿਣਾ ਹੈ ਕਿ ਲਗਾਤਾਰ ਮਾੜੇ ਬਾਜ਼ਾਰੀ ਹਾਲਾਤਾਂ ਕਾਰਨ ਉਸ ਨੇ ਬੀਸੀ ਦੇ ਕਰੋਫਟਨ'ਚ ਸਥਿਤ ਮਿੱਲ ਨੂੰ ਬੰਦ ਕਰਨ ਦਾ ਔਖਾ ਫੈਸਲਾ ਲਿਆ।
ਕੰਪਨੀ ਦੇ ਪੇਪਰ ਅਤੇ ਪੈਕੇਜਿੰਗ ਪਰੈਜ਼ੀਡੈਂਟ ਸਟੀਵ ਹੈਨਰੀ ਨੇ ਬੰਦ ਬਾਰੇ ਐਲਾਨ ਕਰਦਿਆਂ ਇਕ ਬਿਆਨ 'ਚ ਕਿਹਾ ਕਿ ਪਿਛਲੇ 18 ਮਹੀਨਿਆਂ 'ਚ ਕਰੋਫਟਨ ਦੇ ਕਰਮਚਾਰੀਆਂ ਨੇ ਸੰਚਾਲਨ ਲਾਗਤਾਂ ਘਟਾਉਣ ਲਈ ਸਖ਼ਤ ਮਿਹਨਤ ਕੀਤੀ ਸੀ ਪਰ ਬਦਕਿਸਮਤੀ ਨਾਲ ਪਲਪ ਦੀਆਂ ਲਗਾਤਾਰ ਘੱਟ ਕੀਮਤਾਂ ਤੇ ਬੀਸੀ 'ਚ ਕਿਫ਼ਾਇਤੀ ਫ਼ਾਇਬਰ ਦੀ ਕਮੀ ਕਾਰਨ ਇਸ ਨੂੰ ਬੰਦ ਕਰਨਾ ਪਿਆ।
ਜ਼ਿਕਰਯੋਗ ਹੈ ਕਿ ਡੋਮਟਾਰ ਬੀਸੀ 'ਚ ਤਿੰਨ ਹੋਰ ਮਿੱਲਾਂ ਆਪਰੇਟ ਕਰਦੀ ਹੈ, ਜਿੰਨ੍ਹਾਂ 'ਚ ਵੈਨਕੂਵਰ ਆਈਲੈਂਡ 'ਤੇ ਪੋਰਟ ਐਲਬਰਨੀ ਕਮਿਊਨਿਟੀ 'ਚ ਵੀ ਇਕ ਮਿੱਲ ਸ਼ਾਮਿਲ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਉਹ ਬੀਸੀ 'ਚ ਬਣੇ ਰਹਿਣ ਲਈ ਸਰਕਾਰ ਅਤੇ ਇੰਡਸਟਰੀ ਦੇ ਪਾਰਟਨਰਸ ਨਾਲ ਕੰਮ ਕਰਨ ਲਈ ਵਚਨਬੱਧ ਹੈ।
ਕੰਪਨੀ ਦਾ ਕਹਿਣਾ ਹੈ ਕਿ ਮਿੱਲ ਦੇ ਬੰਦ ਹੋਣ ਨਾਲ ਕੰਪਨੀ ਦੇ ਸਾਲਾਨਾ ਪਲਪ ਉਤਪਾਦਨ 'ਚ ਕਰੀਬ 3,80,000 ਮੀਟ੍ਰਿਕ ਟਨ ਸਾਫਟਵੁੱਡ ਪਲਪ ਦੀ ਕਮੀ ਆਵੇਗੀ। ਓਧਰ ਕੰਜ਼ਰਵੇਟਿਵਸ ਨੇ ਇਸ ਬੰਦ ਨੂੰ ਲੈ ਕੇ ਸੱਤਾ ਧਿਰ 'ਤੇ ਨਿਸ਼ਾਨਾ ਸਾਧਦਿਆਂ ਇਸ ਨੂੰ ਸਰਕਾਰੀ ਕੁਪ੍ਰਬੰਧ ਕਰਾਰ ਦਿੱਤਾ ਹੈ।
