ਕੈਨੇਡੀਅਨ ਫੌਜ ਦੇ ਕੁਵੈਤ ਬੇਸ 'ਤੇ ਹੋਏ ਕਥਿਤ ਈਰਾਨੀ ਮਿਜ਼ਾਇਲ ਹਮਲੇ ਨੂੰ ਲੈ ਕੇ ਰੱਖਿਆ ਮੰਤਰੀ ਨੇ ਦਿੱਤਾ ਬਿਆਨ

ਕੈਨੇਡੀਅਨ ਫੌਜ ਦੇ ਕੁਵੈਤ ਬੇਸ 'ਤੇ ਹੋਏ ਕਥਿਤ ਈਰਾਨੀ ਮਿਜ਼ਾਇਲ ਹਮਲੇ ਨੂੰ ਲੈ ਕੇ ਰੱਖਿਆ ਮੰਤਰੀ ਡੇਵਿਡ ਮੈਕਗਿੰਟੀ ਦੇ ਤਾਜ਼ਾ ਬਿਆਨ ਨੇ ਰਾਜਨੀਤੀ ਗਰਮਾ ਦਿੱਤੀ ਹੈ। ਮੰਤਰੀ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਬਾਰੇ ਜਾਣਕਾਰੀ ਨਹੀਂ ਸੀ ਕਿਉਂਕਿ ਉਹ ਉਸ ਸਮੇਂ ਪ੍ਰਧਾਨ ਮੰਤਰੀ ਨਾਲ ਵਿਦੇਸ਼ ਦੌਰੇ 'ਤੇ ਸਨ ਤੇ ਉਦੋਂ ਹੀ ਪਤਾ ਲੱਗਾ ਜਦੋਂ ਅਖ਼ਬਾਰ ਨੇ ਇਸ ਬਾਰੇ ਰਿਪੋਰਟ ਛਾਪੀ।

ਕਿਊਬੈਕ ਦੇ ਅਖ਼ਬਾਰ La Presse ਨੇ 12 ਮਾਰਚ ਨੂੰ ਸੈਟੇਲਾਈਟ ਤਸਵੀਰਾਂ ਦੇ ਹਵਾਲੇ ਨਾਲ ਰਿਪੋਰਟ ਦਿੱਤੀ ਸੀ ਕਿ ਕੁਵੈਤ ਦੇ ਅਲੀ ਅਲ-ਸਲੇਮ ਏਅਰਬੇਸ 'ਤੇ ਸਥਿਤ ਕੈਨੇਡੀਅਨ ਹਿੱਸੇ ਨੂੰ 1 ਮਾਰਚ ਨੂੰ ਹੋਏ ਹਮਲੇ ਵਿਚ ਨੁਕਸਾਨ ਪਹੁੰਚਿਆ ਹੈ। ਮੰਤਰੀ ਨੇ ਅਜੇ ਵੀ ਓਪਰੇਸ਼ਨਲ ਸਕਿਓਰਿਟੀ ਦਾ ਹਵਾਲਾ ਦਿੰਦੇ ਹੋਏ ਹੋਰ ਜਾਣਕਾਰੀ ਦੇਣ ਤੋਂ ਨਾਂਹ ਕਰ ਦਿੱਤੀ। ਇਸ 'ਤੇ ਟਿੱਪਣੀ ਕਰਦੇ ਹੋਏ ਕੰਜ਼ਰਵੇਟਿਵ ਪਾਰਟੀ ਦੇ ਸ਼ੈਡੋ ਮੰਤਰੀ ਜੇਮਜ਼ ਬੇਜ਼ਾਨ ਨੇ ਇਸ ਨੂੰ ਸਰਕਾਰ ਦੀ ਵੱਡੀ ਨਾਕਾਮੀ ਦੱਸਿਆ।

ਉਨ੍ਹਾਂ ਕਿਹਾ ਕਿ ਜਾਂ ਤਾਂ ਮੈਕਗਿੰਟੀ ਨੂੰ ਪਤਾ ਨਹੀਂ ਸੀ ਜਾਂ ਫਿਰ ਉਹ ਜਾਣਬੁੱਝ ਕੇ ਕੈਨੇਡੀਅਨ ਨਾਲ ਝੂਠ ਬੋਲ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਲਿਬਰਲ ਸਰਕਾਰ ਇੰਨਾ ਭੇਤ ਕਿਉਂ ਰੱਖ ਰਹੀ ਹੈ? ਉਥੇ ਹੀ ਕੁਝ ਕੈਨੇਡੀਅਨ ਫੈਡਰਲ ਪਾਰਟੀ ਦੇ ਆਗੂ ਇਸ ਦੀ ਬ੍ਰੀਫਿੰਗ ਮੰਗ ਰਹੇ ਹਨ, ਜਿਹਨਾਂ ਕੋਲ ਇਸ ਲਈ ਅਤਿ-ਗੁਪਤ ਸੁਰੱਖਿਆ ਪ੍ਰਵਾਨਗੀ ਹੈ।