20.14C Vancouver 20.14C VancouverJan 12, 2022 12:04 AM - The Canadian Press
ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਨੇ ਸੂਬੇ 'ਚ ਓਮੀਕਰੌਨ ਵੇਰੀਐਂਟ ਦੇ ਫੈਲਾਅ ਅਤੇ ਵੈਕਸੀਨੇਸ਼ਨਸ ਦੇ ਅਸਰ ਨੂੰ ਲੈਕੇ ਗੱਲਬਾਤ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਇਹ ਸਪਸ਼ਟ ਹੈ ਕਿ ਜਿਹੜੇ ਲੋਕ ਵੈਕਸੀਨ ਹਾਸਿਲ ਕਰ ਚੁੱਕੇ ਹਨ, ਉਹ ਵੀ ਕੋਵਿਡ-19 ਦੇ ਓਮੀਕਰੌਨ ਵੇਰੀਐਂਟ ਤੋਂ ਪ੍ਰਭਾਵਿਤ ਹੋ ਰਹੇ ਹਨ।
ਡਾ. ਹੈਨਰੀ ਨੇ ਕਿਹਾ ਕਿ ਚੰਗੀ ਖਬਰ ਇਹ ਹੈ ਕਿ ਵੈਕਸੀਨਸ ਇਸ ਵੇਰੀਐਂਟ ਵਿਰੁੱਧ ਵੀ ਪ੍ਰਭਾਵਸ਼ਾਲੀ ਸਾਬਿਤ ਹੋ ਰਹੀਆਂ ਹਨ।
ਉਨ੍ਹਾਂ ਕਿਹਾ ਕਿ ਜਿਹੜੇ ਵੈਕਸੀਨੇਟਿਡ ਲੋਕ ਇਸ ਵੇਰੀਐਂਟ ਦੀ ਚਪੇਟ 'ਚ ਆ ਰਹੇ ਹਨ, ਉਨ੍ਹਾਂ ਨੂੰ ਵਾਇਰਸ ਸੰਬੰਧੀ ਲੱਛਣ ਤਾਂ ਸਥਾਪਿਤ ਹੋ ਰਹੇ ਹਨ, ਪਰ ਇਹ ਅਜਿਹੇ ਨਹੀਂ ਹਨ ਕਿ ਲੋਕਾਂ ਨੂੰ ਹਸਪਤਾਲ ਜਾਂ ਆਈ.ਸੀ.ਯੂ. 'ਚ ਦਾਖਿਲ ਹੋਣਾ ਪਵੇ।
ਡਾ. ਬੌਨੀ ਹੈਨਰੀ ਨੇ ਆਖਿਆ ਕਿ ਵੈਕਸੀਨ ਦੀ ਬੂਸਟਰ ਖੁਰਾਕ ਨਾਲ ਬਿਮਾਰ ਹੋਣ ਜਾਂ ਵਧੇਰੇ ਲੱਛਣ ਸਥਾਪਿਤ ਹੋਣ ਤੋਂ ਹੋਰ ਵੀ ਬਚਾਅ ਕੀਤਾ ਜਾ ਸਕਦਾ ਹੈ।
ਹਾਲਾਂਕਿ ਉਨ੍ਹਾਂ ਮੰਨਿਆ ਕਿ ਓਮੀਕਰੌਨ ਵੇਰੀਐਂਟ ਕਾਰਨ ਵਾਇਰਸ ਤੋਂ ਪ੍ਰਭਾਵਿਤ ਹੋਣ ਦੇ ਖਤਰੇ 'ਚ ਵਾਧਾ ਹੋਇਆ ਹੈ।
ਡਾ. ਹੈਨਰੀ ਨੇ ਕਿਹਾ ਕਿ ਓਮੀਕਰੌਨ ਵੇਰੀਐਂਟ ਤੋਂ ਅਨਵੈਕਸੀਨੇਟਿਡ ਲੋਕਾਂ ਦੇ ਵਧੇਰੇ ਪ੍ਰਭਾਵਿਤ ਹੋਣ ਦਾ ਖਤਰਾ ਹੈ।
ਉਨ੍ਹਾਂ ਇਹ ਵੀ ਕਿਹਾ ਕਿ 20 ਤੋਂ 30 ਸਾਲ ਦਰਮਿਆਨ ਦੇ 3 ਲੋਕ ਅਤੇ 30 ਤੋਂ 40 ਸਾਲ ਦਰਮਿਆਨ ਦੇ ਇੱਕ ਵਿਅਕਤੀ ਨੂੰ ਕੋਵਿਡ-19 ਕਾਰਨ ਹਸਪਤਾਲ 'ਚ ਦਾਖਿਲ ਕੀਤਾ ਗਿਆ ਹੈ ਅਤੇ ਇਹ ਸਾਰੇ ਅਨਵੈਕਸੀਨੇਟਿਡ ਦੱਸੇ ਗਏ ਹਨ।
ਬੀ.ਸੀ. 'ਚ ਵਪਾਰਾਂ ਲਈ ਜਾਰੀ ਪਬੰਦੀਆਂ ਦੇ ਹੋਰ ਸਮਾਂ ਜਾਰੀ ਰਹਿਣ ਦੀ ਸੰਭਾਵਨਾ
ਡਾ. ਬੌਨੀ ਹੈਨਰੀ ਨੇ ਆਖਿਆ ਹੈ ਕਿ ਸੂਬੇ ਦੇ ਵਿੱਚ ਟ੍ਰੀਟਮੈਂਟ ਫੈਸਿਲਟੀਆਂ 'ਚ ਵੀ ਵਾਧਾ ਹੋ ਰਿਹਾ ਹੈ ਅਤੇ ਇਸ ਸੰਬੰਧੀ ਮਹੀਨੇ ਦੇ ਅੰਤ ਤਕ ਸਥਿਤੀ ਸਪਸ਼ਟ ਕੀਤੀ ਜਾ ਸਕੇਗੀ।
ਉਨ੍ਹਾਂ ਇਹ ਵੀ ਕਿਹਾ ਕਿ ਹੈਲਥ ਕੈਨੇਡਾ ਵੱਲੋਂ ਐਂਟੀ-ਵਾਇਰਲ ਮੇਡਿਕੇਸ਼ਨਸ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਪੈਕਸਲੋਵਿਡ ਜਿਹੀ ਮੇਡਿਕੇਸ਼ਨ ਨੂੰ ਮਨਜ਼ੂਰੀ ਮਿਲਣ ਦੇ ਆਸਾਰ ਹਨ।
ਉਨ੍ਹਾਂ ਕਿਹਾ ਕਿ ਅਜਿਹੀ ਮੈਡੀਕੇਸ਼ਨ ਨਾਲ ਵਾਇਰਸ ਪੀੜਤਾਂ ਦੇ ਹਸਪਤਾਲ 'ਚ ਦਾਖਿਲ ਹੋਣ ਤੋਂ ਹੋਰ ਬਚਾਅ ਹੋ ਸਕੇਗਾ।
ਹਾਲਾਂਕਿ ਉਨ੍ਹਾਂ ਕਿਹਾ ਕਿ ਹਾਲ ਦੀ ਘੜੀ ਸੂਬੇ 'ਚ ਜਾਰੀ ਪਬੰਦੀਆਂ ਦੇ ਜਾਰੀ ਰਹਿਣ ਦੀ ਸੰਭਾਵਨਾ ਹੈ।
ਉਨ੍ਹਾਂ ਇਹ ਵੀ ਕਿਹਾ ਕਿ ਇਸੇ ਹਫ਼ਤੇ ਦੇ ਅੰਤ ਤਕ ਮਾਡਲਿੰਗ ਡਾਟਾ ਦੇ ਅੰਕੜੇ ਵੀ ਸਾਂਝੇ ਕੀਤੇ ਜਾਣਗੇ।
ਹਾਲਾਂਕਿ ਡਾ. ਬੌਨੀ ਹੈਨਰੀ ਨੇ ਕਿਹਾ ਕਿ ਇਸ ਵੇਰੀਐਂਟ ਕਾਰਨ ਹੈਲਥ ਕੇਅਰ ਸਿਸਟਮ 'ਤੇ ਆਉਂਦੇ ਦਿਨਾਂ 'ਚ ਕਿਸ ਕਿਸਮ ਦਾ ਦਬਾਅ ਬਣ ਸਕਦਾ ਹੈ, ਇਹ ਫਿਲਹਾਲ ਸਪਸ਼ਟ ਨਹੀਂ ਹੈ।
