ਲੈਂਗਲੀ 'ਚ ਇੱਕ ਵਾਰ ਫਿਰ ਓਵਰਪਾਸ ਨਾਲ ਇੱਕ ਕਮਰਸ਼ੀਅਲ ਟਰੱਕ ਦੀ ਟੱਕਰ

ਲੈਂਗਲੀ ਵਿਚ ਹਾਈਵੇਅ 1 'ਤੇ ਇੱਕ ਵਾਰ ਫਿਰ ਓਵਰਪਾਸ ਨਾਲ ਇੱਕ ਕਮਰਸ਼ੀਅਲ ਟਰੱਕ ਦੀ ਟੱਕਰ ਹੋਈ ਹੈ। ਬੀ.ਸੀ. ਹਾਈਵੇਅ ਪੈਟਰੋਲ ਦਾ ਕਹਿਣਾ ਹੈ ਕਿ ਉਸ ਵਲੋਂ ਡਰਾਈਵਰ ਦੀ ਪਛਾਣ ਕਰ ਲਈ ਗਈ ਹੈ ਅਤੇ ਹੁਣ ਇਸ ਮਾਮਲੇ ਵਿਚ ਹੋਰ ਗਵਾਹਾਂ ਅਤੇ ਡੈਸ਼-ਕੈਮਰਾ ਵੀਡੀਓ ਦੀ ਤਲਾਸ਼ ਕਰ ਰਹੀ ਹੈ। ਪੁਲਿਸ ਮੁਤਾਬਕ, ਇਹ ਟੱਕਰ ਕੱਲ ਦੁਪਹਿਰ 2:52 ਵਜੇ ਹੋਈ, ਇੱਕ ਚਿੱਟੇ ਰੰਗ ਦੇ ਫਲੈਟ ਡੈੱਕ ਟਰੱਕ 'ਤੇ ਕਰੇਨ ਬੂਮ ਲੱਦਿਆ ਹੋਇਆ ਸੀ, ਜਿਸ ਨੇ ਗਲੋਵਰ ਰੋਡ ਅਤੇ 232nd ਸਟ੍ਰੀਟ ਵਿਚਕਾਰ ਸੀ.ਪੀ. ਰੇਲ ਓਵਰਪਾਸ ਨੂੰ ਟੱਕਰ ਮਾਰ ਦਿੱਤੀ।

ਕਾਰਪੋਰਲ ਮਾਈਕਲ ਮੈਕਲਾਫਲਿਨ ਅਨੁਸਾਰ, ਡਰਾਈਵਰ ਹਾਦਸੇ ਵਾਲੀ ਥਾਂ 'ਤੇ ਨਹੀਂ ਰੁਕਿਆ ਪਰ ਬਾਅਦ ਵਿਚ ਉਸ ਨੇ ਖੁਦ ਪੁਲਿਸ ਨਾਲ ਸੰਪਰਕ ਕੀਤਾ ਅਤੇ ਹੁਣ ਜਾਂਚ ਵਿਚ ਸਹਿਯੋਗ ਕਰ ਰਿਹਾ ਹੈ। ਆਵਾਜਾਈ ਮੰਤਰਾਲਾ ਨੇ ਪੁਸ਼ਟੀ ਕੀਤੀ ਹੈ ਕਿ ਓਵਰਪਾਸ ਨੂੰ ਮਾਮੂਲੀ ਨੁਕਸਾਨ ਪਹੁੰਚਿਆ ਹੈ ਪਰ ਇਹ ਸਟਰਕਚਰ ਦੇ ਤੌਰ 'ਤੇ ਸੇਫ ਹੈ।

ਬੀ.ਸੀ. ਹਾਈਵੇਅ ਪੈਟਰੋਲ ਹੁਣ ਕਮਰਸ਼ੀਅਲ ਵ੍ਹੀਹਕਲ ਸੇਫਟੀ ਐਂਡ ਇਨਫੋਰਸਮੈਂਟ ਟੀਮ ਨਾਲ ਮਿਲ ਕੇ ਇਸ ਮਾਮਲੇ ਦੀ ਜਾਂਚ ਕਰ ਰਹੀ। ਗੌਰਤਲਬ ਹੈ ਕਿ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਨੂੰ ਰੋਕਣ ਲਈ ਹਾਲ ਹੀ ਵਿਚ ਸਰਕਾਰ ਨੇ ਓਵਰਹਾਈਟ ਡੀਟੈਕਸ਼ਨ ਸਿਸਟਮ ਲਗਾਉਣ ਦਾ ਐਲਾਨ ਸੀ, ਇਸ ਦੀ ਸ਼ੁਰੂਆਤ ਚਿਲੀਵੈਕ ਨੇੜੇ No. 3 ਰੋਡ ਕੋਲ ਓਵਰਪਾਸ 'ਤੇ ਕੀਤੀ ਗਈ ਹੈ।