15.14C Vancouver 15.14C VancouverAug 28, 2025 6:00 PM - Connect Newsroom
ਚਿਲੀਵੈਕ ਦੇ ਇੱਕ ਡੰਪ ਟਰੱਕ ਡਰਾਈਵਰ ਨੂੰ ਮੋਟਰ ਵਹੀਕਲ ਐਕਟ ਚਾਰਜ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੁਲਿਸ ਮੁਤਾਬਕ, ਮੈਨਿੰਗ ਪਾਰਕ ਵਿਚ ਬੀਤੇ ਕੱਲ੍ਹ ਹਾਈਵੇ 3 'ਤੇ ਟਰੱਕ ਦੇ ਟ੍ਰੇਲਰ ਨੇ ਸੜਕ ਨੂੰ ਅੰਸ਼ਕ ਤੌਰ 'ਤੇ ਬਲੌਕ ਕਰ ਦਿੱਤਾ, ਜਿਸ ਦੌਰਾਨ ਇੱਕ ਬੀ.ਐਮ.ਡਬਲਯੂ ਸੇਡਾਨ ਇਸ ਨਾਲ ਟਕਰਾ ਗਈ। ਇਹ ਘਟਨਾ ਦੁਪਹਿਰ ਕਰੀਬ 1.35 ਵਜੇ ਵਾਪਰੀ।
ਬੀ.ਸੀ. ਹਾਈਵੇਅ ਪੈਟਰੋਲ ਮੁਤਾਬਕ, 39 ਸਾਲਾ ਚਿਲੀਵੈਕ ਡਰਾਈਵਰ ਤੇਜ਼ ਰਫ਼ਤਾਰ ਵਿਚ ਸੀ ਅਤੇ ਉਸ ਨੇ ਲਾਪਰਵਾਹੀ ਵਰਤੀ, ਜਿਸ ਲਈ ਉਸ ਨੂੰ $368 ਦਾ ਜੁਰਮਾਨਾ ਤੇ ਉਸ ਦੇ ਡਰਾਈਵਿੰਗ ਲਾਇਸੈਂਸ 'ਤੇ 6 ਪੈਨਲਟੀ ਪੁਆਇੰਟ ਵੀ ਲਗਾਏ ਗਏ। ਪੁਲਿਸ ਨੇ ਕਿਹਾ ਕਿ ਹਾਲਾਂਕਿ, ਕਾਰ ਦੇ ਡਰਾਈਵਰ ਅਤੇ ਯਾਤਰੀ ਨੂੰ ਹਲਕੀਆਂ ਸੱਟਾਂ ਹੀ ਲੱਗੀਆਂ ਪਰ ਬੀ.ਐਮ.ਡਬਲਯੂ. ਪੂਰੀ ਤਰ੍ਹਾਂ ਨੁਕਸਾਨੀ ਗਈ ਅਤੇ ਟਰੱਕ ਦਾ ਕੋਲਾ ਸਕੈਗਿਟ ਨਦੀ ਵਿਚ ਖਿੱਲਰ ਗਿਆ ਸੀ।
ਵਾਤਾਵਰਣ ਮੰਤਰਾਲੇ ਨੇ ਕਿਹਾ ਕਿ ਉਹ ਸਕੈਗਿਟ ਨਦੀ ਦੀ ਸਥਿਤੀ 'ਤੇ ਨਜ਼ਰ ਬਣਾਏ ਹੋਏ ਅਤੇ ਇਸ ਨੂੰ ਸਾਫ਼ ਕਰਨ ਲਈ ਟਰੱਕ ਕੰਪਨੀ ਨਾਲ ਕੰਮ ਕੀਤਾ ਜਾ ਰਿਹਾ ਹੈ। ਪੁਲਿਸ ਮੁਤਾਬਕ, ਬੀ.ਐਮ.ਡਬਲਯੂ ਸੇਡਾਨ ਵਿਚ ਸਵਾਰ ਦੋ ਲੋਕਾਂ ਵਿਚੋਂ ਇੱਕ ਨੌਰਥ ਵੈਨਕੂਵਰ ਤੇ ਦੂਜਾ ਬਰਨਬੀ ਨਾਲ ਸਬੰਧਤ ਸਨ।
