ਟੈਂਕਰ ਬੈਨ ਕਾਇਮ ਰਹੇ ਤਾਂ ਪਾਈਪਲਾਈਨ 'ਤੇ ਗੱਲ ਕਰਨ ਲਈ ਤਿਆਰ: ਈਬੀ

ਬੀ. ਸੀ. ਅਤੇ ਫੈਡਰਲ ਸਰਕਾਰ ਪਾਈਪਲਾਈਨ ਲਈ ਵਿਚਕਾਰਲਾ ਰਸਤਾ ਕੱਢ ਸਕਦੇ ਹਨ, ਜੋ ਕਿ ਕੋਈ ਅਜਿਹਾ ਰਸਤਾ ਹੋ ਸਕਦਾ ਹੈ ਜਿੱਥੇ ਟੈਂਕਰ ਬੈਨ ਨਹੀਂ ਹੈ। ਇਸ ਦਾ ਸੰਕੇਤ ਪ੍ਰੀਮੀਅਰ ਡੇਵਿਡ ਈਬੀ ਨੇ ਦਿੱਤਾ, ਪ੍ਰੀਮੀਅਰ ਦਾ ਕਹਿਣਾ ਹੈ ਕਿ ਜੇ ਬੀ. ਸੀ. ਦੇ ਨੌਰਥ ਕੋਸਟ 'ਤੇ ਲਗਾਇਆ ਗਿਆ ਟੈਂਕਰ ਟ੍ਰੈਫਿਕ ਬੈਨ ਬਰਕਰਾਰ ਰਹਿੰਦਾ ਹੈ ਤਾਂ ਉਹ ਪਾਈਪਲਾਈਨ ਪ੍ਰੋਜੈਕਟ ਲਈ ਗੱਲਬਾਤ ਕਰਨ ਲਈ ਤਿਆਰ ਹਨ।

ਈਬੀ ਦਾ ਇਹ ਬਿਆਨ ਉਸ ਸਮੇਂ ਆਇਆ ਹੈ ਜਦੋਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਦਰਮਿਆਨ ਪਾਈਪਲਾਈਨ ਲਈ ਇੱਕ ਸਮਝੌਤੇ 'ਤੇ ਹਸਤਾਖਰ ਕੀਤੇ ਗਏ ਹਨ।​

ਇਸ ਵਿਚਕਾਰ ਫੈਡਰਲ ਐਨਰਜੀ ਮਨਿਸਟਰ ਟਿਮ ਹਾਜਸਨ ਦੀ ਬੁਲਾਰਾ ਕੈਰੋਲਿਨ ਸਵੈਨਕਿਨ ਦਾ ਵੀ ਇੱਕ ਬਿਆਨ ਆਇਆ, ਜਿਨ੍ਹਾਂ ਦਾ ਕਹਿਣਾ ਹੈ ਕਿ ਟੈਂਕਰ ਬੈਨ ਨੂੰ ਬਰਕਰਾਰ ਰੱਖਦਿਆਂ ਪਾਈਪਲਾਈਨ ਨੂੰ ਮਨਜ਼ੂਰੀ ਦੇਣਾ ਅਸੰਭਵ ਨਹੀਂ ਹੈ ਜੇ ਇਹ ਪ੍ਰਸਤਾਵਿਤ ਰੂਟ ਕਿਸੇ ਅਜਿਹੀ ਜਗ੍ਹਾ ਖ਼ਤਮ ਹੁੰਦਾ ਹੈ ਜੋ ਬੈਨ ਦੇ ਦਾਇਰੇ ਵਿਚ ਨਹੀਂ ਹੈ, ਇਸ ਦਾ ਮਤਲਬ ਹੈ ਕਿ ਪੋਰਟ ਔਫ ਵੈਨਕੂਵਰ ਵਰਗੇ ਕਿਸੇ ਹੋਰ ਖੇਤਰ ਵੱਲ ਧਿਆਨ ਦਿੱਤਾ ਜਾ ਸਕਦਾ ਹੈ।

ਹਾਲਾਂਕਿ, ਅਜੇ ਤੱਕ ਕੁਝ ਵੀ ਫਾਈਨਲ ਨਹੀਂ ਹੈ, ਨਾਲ ਕੋਈ ਇਸ 'ਤੇ ਗੱਲ ਹੋਈ ਹੈ। ਸਵੈਨਕਿਨ ਨੇ ਕਿਹਾ ਕਿ ਫੈਡਰਲ ਸਰਕਾਰ ਪ੍ਰੋਜੈਕਟ ਲਈ ਅੱਗੇ ਵਧਣ ਦੇ ਰਸਤੇ 'ਤੇ ਅਲਬਰਟਾ ਅਤੇ ਬੀ. ਸੀ. ਦੋਹਾਂ ਨਾਲ ਗੱਲਬਾਤ ਕਰਨ ਦੀ ਯੋਜਨਾ ਬਣਾ ਰਹੀ ਹੈ।