ਵਰਕਸੇਫ ਬੀ.ਸੀ. ਵੱਲੋਂ ਐਸਬੈਸਟਸ ਅਬੇਟਮੈਂਟ ਦੇ ਲਾਇਸੰਸਸ਼ੁਦਾ ਠੇਕੇਦਾਰਾਂ ਦੀ ਔਨਲਾਈਨ ਰਜਿਸਟਰੀ ਜਾਰੀ

1 ਜਨਵਰੀ 2024 ਤੋਂ ਐਸਬੈਸਟਸ ਅਬੇਟਮੈਂਟ ਮਾਲਕਾਂ ਲਈ ਬੀ. ਸੀ. ਵਿਚ ਲਾਇਸੰਸਸ਼ੁਦਾ ਹੋਣਾ ਲਾਜ਼ਮੀ ਹੋਵੇਗਾ। ਇਸ ਦਾ ਮਤਲਬ ਹੈ ਮਕਾਨ ਮਾਲਕਾਂ ਅਤੇ ਕਾਰੋਬਾਰ ਮਾਲਕਾਂ ਲਈ ਜ਼ਰੂਰੀ ਹੋਵੇਗਾ ਕਿ ਉਹ ਕੰਮ ਦੀ ਇਜਾਜ਼ਤ ਦੇਣ ਤੋਂ ਪਹਿਲਾਂ ਇਹ ਯਕੀਨੀ ਬਣਾਉਣ ਕਿ ਐਸਬੈਸਟਸ ਅਬੇਟਮੈਂਟ ਠੇਕੇਦਾਰ ਕੋਲ ਵੈਲਿਡ ਲਾਇਸੰਸ ਹੈ।

ਵਰਕਸੇਫ ਬੀ.ਸੀ. ਨੇ ਲੋਕਾਂ ਦੀ ਸਹੂਲਤ ਲਈ ਐਸਬੈਸਟਸ ਅਬੇਟਮੈਂਟ ਲਾਇਸੰਸਸ਼ੁਦਾ ਪ੍ਰੋਫੈਸ਼ਨਲਸ ਦੀ ਔਨਲਾਈਨ ਰਜਿਸਟਰੀ ਜਾਰੀ ਕੀਤੀ ਹੈ ਜਿੱਥੇ ਉਹ ਦੇਖ ਸਕਦੇ ਹਨ ਕਿ ਉਨ੍ਹਾਂ ਦੇ ਕੌਨਟ੍ਰੈਕਟਰ ਕੋਲ ਵੈਲਿਡ ਲਾਇਸੰਸ ਹੈ ਜਾਂ ਨਹੀਂ।

ਬੀ. ਸੀ. ਵਿਚ ਐਸਬੈਸਟਸ ਰਿਹਾਇਸ਼ੀ ਅਤੇ ਵਪਾਰਕ ਇਮਾਰਤਾਂ ਵਿਚ ਇਸਤੇਮਾਲ ਕੀਤਾ ਜਾਂਦਾ ਹੈ ਜਿਸ ਨਾਲ ਗੰਭੀਰ ਸਿਹਤ ਅਤੇ ਸੁਰੱਖਿਆ ਜੋਖਮ ਜੁੜੇ ਹੁੰਦੇ ਹਨ।

ਸੂਬੇ ਵਿਚ 1950 ਤੋਂ 1990 ਦੇ ਦਹਾਕੇ ਵਿਚਕਾਰ 3,000 ਤੋਂ ਵੱਧ ਇਮਾਰਤਾਂ ਵਿਚ ਇਸ ਦੀ ਵਰਤੋਂ ਕੀਤੀ ਗਈ ਸੀ। ਉਥੇ ਹੀ, ਪੁਰਾਣੇ ਮਿਟੀਰੀਅਲ ਨਾਲ ਬਣੇ ਨਵੇਂ ਸਟ੍ਰਕਚਰਸ ਵਿਚ ਵੀ ਇਹ ਸ਼ਾਮਲ ਹੋ ਸਕਦਾ ਹੈ।

ਰੈਨੋਵੇਸ਼ਨ ਜਾਂ ਘਰ ਢਾਹੁਣ ਦੇ ਕੰਮ ਦੌਰਾਨ ਐਸਬੈਸਟਸ ਦੇ ਸੰਪਰਕ ਵਿਚ ਆਉਣ ਕਾਰਨ ਗੰਭੀਰ ਸਿਹਤ ਸਮੱਸਿਆ ਹੋਣ ਦਾ ਰਿਸਕ ਹੁੰਦਾ ਹੈ, ਜਿਨ੍ਹਾਂ ਵਿਚ ਫੇਫੜਿਆਂ ਦੇ ਰੋਗ ਅਤੇ ਕੈਂਸਰ ਵੀ ਸ਼ਾਮਲ ਹੈ। ਸਾਲ 2002 ਤੋਂ 2022 ਵਿਚਕਾਰ ਐਸਬੈਸਟਸ ਦੇ ਸੰਪਰਕ ਵਿਚ ਆਉਣਾ ਸੂਬੇ ਵਿਚ ਕੰਮ-ਸੰਬੰਧੀ ਮੌਤਾਂ ਦਾ ਮੁੱਖ ਕਾਰਨ ਸੀ ਅਤੇ ਇਸ ਕਾਰਨ 1,168 ਮੌਤਾਂ ਹੋਈਆਂ ਸਨ।