ਤਿੰਨ ਵਿਦੇਸ਼ੀ ਨਾਗਰਿਕਾਂ 'ਤੇ ਲੱਗੇ ਜਬਰਨ ਵਸੂਲੀ ਦੇ ਦੋਸ਼, ਇੱਕ ਸ਼ੱਕੀ ਅਜੇ ਵੀ ਫਰਾਰ

ਬੀ.ਸੀ. ਆਰ.ਸੀ.ਐਮ.ਪੀ. ਦੀ ਐਕਸਟੋਸ਼ਨ ਟਾਸਕ ਫੋਰਸ ਨੇ ਸਰੀ ਵਿਚ ਸ਼ੂਟਿੰਗਸ ਅਤੇ ਫਿਰੌਤੀ ਦੀਆਂ ਘਟਨਾਵਾਂ ਦੇ ਸਬੰਧ ਵਿਚ ਤਿੰਨ ਵਿਅਕਤੀਆਂ ਵਿਰੁੱਧ ਐਕਸਟੋਸ਼ਨ ਅਤੇ ਗੋਲੀ ਚਲਾਉਣ ਦੇ ਕ੍ਰਿਮੀਨਲ ਮਾਮਲੇ ਦਰਜ ਕੀਤੇ ਹਨ। ਇਨ੍ਹਾਂ ਵਿਚ 22 ਸਾਲਾ ਅਵਤਾਰ ਸਿੰਘ, 28 ਸਾਲਾ ਸੰਦੀਪ ਸਿੰਘ ਅਤੇ 24 ਸਾਲਾ ਜਗਦੀਪ ਸਿੰਘ ਸ਼ਾਮਲ ਹਨ।

ਇਹ ਚਾਰਜਿਜ਼ ਨਵੰਬਰ 2025 ਵਿਚ ਸਰੀ ਦੇ 32 ਐਵੇਨਿਊ ਦੇ 17000 ਬਲਾਕ ਸਥਿਤ ਇੱਕੋ ਘਰ 'ਤੇ ਦੋ ਵੱਖ-ਵੱਖ ਮੌਕਿਆਂ 'ਤੇ ਹੋਈ ਸ਼ੂਟਿੰਗ ਨਾਲ ਸਬੰਧਤ ਹਨ। ਪਹਿਲੀ ਸ਼ੂਟਿੰਗ 8 ਨਵੰਬਰ 2025 ਨੂੰ ਹੋਈ ਸੀ। ​12 ਨਵੰਬਰ, 2025 ਨੂੰ ਉਸੇ ਘਰ 'ਤੇ ਦੁਬਾਰਾ ਗੋਲੀਆਂ ਚਲਾਈਆਂ ਗਈਆਂ ਸਨ। ਅਵਤਾਰ ਸਿੰਘ ਅਤੇ ਸੰਦੀਪ ਸਿੰਘ ਇਸ ਸਮੇਂ ਹਿਰਾਸਤ ਵਿਚ ਹਨ, ਜਦੋਂ ਕਿ ਜਗਦੀਪ ਸਿੰਘ ਫ਼ਰਾਰ ਹੈ ਅਤੇ ਉਸ ਖ਼ਿਲਾਫ਼ ਐਲਬਰਟਾ ਤੋਂ ਕੈਨੇਜਾ-ਵਾਈਡ-ਵਾਰੰਟ ਜਾਰੀ ਹਨ, ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ ਨੇ ਵੀ ਉਸ ਖਿਲਾਫ ਇਮੀਗ੍ਰੇਸ਼ਨ ਵਾਰੰਟ ਜਾਰੀ ਕੀਤਾ ਹੋਇਆ ਹੈ।

ਜਗਦੀਪ 'ਤੇ 8 ਨਵੰਬਰ ਦੀ ਸ਼ੂਟਿੰਗ ਵਿਚ ਸ਼ਾਮਲ ਹੋਣ ਦੇ ਚਾਰਜਿਜ਼ ਤੋਂ ਇਲਾਵਾ ਐਕਸਟੋਸ਼ਨ ਦੇ ਵੀ ਚਾਰਜਿਜ਼ ਹਨ। ਉਸ ਦੀ ਮੂਲ ਰੂਪ ਵਿਚ ਐਲਬਰਟਾ ਵਿਚ ਸ਼ੂਟਿੰਗਸ ਦੇ ਮਾਮਲੇ ਵਿਚ 17 ਨਵੰਬਰ ਨੂੰ ਰੈਡ ਡੀਰ ਵਿਚ ਗ੍ਰਿਫਤਾਰੀ ਹੋਈ ਸੀ, ਸੀ.ਬੀ.ਐਸ.ਏ.ਮੁਤਾਬਕ, ਉਹ ਕੈਲਗਰੀ ਵਿਚ ਮੈਡੀਕਲ ਅਸੈਸਮੈਂਟ ਦੌਰਾਨ ਭੱਜ ਗਿਆ ਸੀ।