ਭਾਰਤ 'ਚ ਹਾਦਸਾਗ੍ਰਸਤ ਹੋਏ ਹਵਾਈ ਜਹਾਜ਼ 'ਚ ਮਿਸੀਸਾਗਾ ਦੀ ਡੈਂਟਿਸਟ ਵੀ ਸੀ ਸਵਾਰ

ਏਅਰ ਇੰਡੀਆ ਦੀ ਲੰਡਨ ਜਾਣ ਵਾਲੀ ਹਾਦਸਾਗ੍ਰਸਤ ਹੋਈ ਫਲਾਈਟ ਵਿਚ ਸਵਾਰ ਕੈਨੇਡੀਅਨ ਨਾਗਰਿਕ ਦੀ ਪਛਾਣ ਮਿਸੀਸਾਗਾ ਦੀ ਡੈਂਟਿਸਟ ਨਿਰਾਲੀ ਸੁਰੇਸ਼ਕੁਮਾਰ ਪਟੇਲ ਵਜੋਂ ਸਾਹਮਣੇ ਆਈ ਹੈ। ਨਿਰਾਲੀ ਪਟੇਲ ਦੇ ਪਤੀ ਨੇ ਪੁਸ਼ਟੀ ਕੀਤੀ ਕਿ ਉਹ ਲੰਡਨ ਜਾਣ ਵਾਲੀ ਏਅਰ ਇੰਡੀਆ ਦੀ ਉਡਾਣ ਵਿਚ ਸਵਾਰ 240 ਯਾਤਰੀਆਂ ਵਿਚੋਂ ਇੱਕ ਸੀ।

ਨਿਰਾਲੀ ਪਟੇਲ ਦੇ ਡੈਂਟਲ ਕਲੀਨਿਕ ਨੇ ਕੈਨੇਡੀਅਨ ਪ੍ਰੈਸ ਨਾਲ ਉਸ ਦੇ ਪਤੀ ਨਾਲ ਗੱਲ ਕਰਵਾਈ, ਜਿਨ੍ਹਾਂ ਕਿਹਾ ਕਿ ਉਹ ਆਪਣੀ ਅਤੇ ਆਪਣੇ ਇੱਕ ਸਾਲਾ ਬੱਚੇ ਲਈ ਭਾਰਤ ਯਾਤਰਾ ਦੀ ਬੁਕਿੰਗ ਕਰਵਾ ਰਹੇ ਹਨ। ਉਨ੍ਹਾਂ ਆਪਣਾ ਪੂਰਾ ਨਾਮ ਦੱਸਣ ਤੋਂ ਇਨਕਾਰ ਕੀਤਾ ਅਤੇ ਕਿਹਾ ਕਿ ਉਹ ਹੋਰ ਬੋਲਣ ਦੀ ਸਥਿਤੀ ਵਿਚ ਨਹੀਂ ਹਨ। ਗੌਰਤਲਬ ਹੈ ਕਿ ਇਹ ਜਹਾਜ਼ ਭਾਰਤ ਦੇ ਗੁਜਰਾਤ ਦੇ ਅਹਿਮਦਾਬਾਦ ਸ਼ਹਿਰ ਦੇ ਇੱਕ ਰਿਹਾਇਸ਼ੀ ਇਲਾਕੇ ਵਿਚ ਹਾਦਸਾਗ੍ਰਸਤ ਹੋਇਆ, ਜਿੱਥੇ ਦੀ ਆਬਾਦੀ 5 ਮਿਲੀਅਨ ਤੋਂ ਵੱਧ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ, ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਅਤੇ ਕੰਜ਼ਰਵੇਟਿਵ ਪਾਰਟੀ ਦੇ ਪ੍ਰਧਾਨ ਪੀਅਰ ਪੌਲੀਐਵ ਸਮੇਤ ਹੋਰ ਲੀਡਰਾਂ ਨੇ ਇਸ ਹਾਦਸੇ 'ਤੇ ਪੀੜਤ ਪਰਿਵਾਰਾਂ ਨਾਲ ਹਮਦਰਦੀ ਜਤਾਈ ਹੈ। ਇਹ ਦੁਨੀਆ ਭਰ ਵਿਚ ਬੋਇੰਗ 787 ਡ੍ਰੀਮਲਾਈਨਰ ਜਹਾਜ਼ ਦਾ ਪਹਿਲਾ ਹਾਦਸਾ ਹੈ। ਹੁਣ ਤੱਕ ਦੀਆਂ ਖ਼ਬਰਾਂ ਮੁਤਾਬਕ, ਭਾਰਤੀ ਮੂਲ ਦਾ ਇੱਕ ਬ੍ਰਿਟਿਸ਼ ਨਾਗਰਿਕ ਹੀ ਜ਼ਿੰਦਾ ਬਚਿਆ ਦੱਸਿਆ ਜਾਂਦਾ ਹੈ।