ਲੈਂਗਲੀ ਵਿੱਚ ਹਾਦਸੇ ਦੌਰਾਨ ਡਰਾਇਵਰ ਦੀ ਹੋਈ ਮੌਤ

ਲੈਂਗਲੀ ਟਾਊਨਸ਼ਿਪ ਵਿਚ ਸੋਮਵਾਰ ਸ਼ਾਮ ਦੋ ਵਾਹਨਾਂ ਦੀ ਟੱਕਰ ਤੋਂ ਬਾਅਦ ਇੱਕ ਵਿਅਕਤੀ ਦੀ ਮੌਤ ਹੋ ਗਈ। ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਇਹ ਛੇ ਹਫ਼ਤਿਆਂ ਵਿਚ ਕਮਿਊਨਿਟੀ ਵਿਚ ਪੰਜਵਾਂ ਜਾਨਲੇਵਾ ਹਾਦਸਾ ਹੈ।ਲੈਂਗਲੀ ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਕੱਲ੍ਹ ਸ਼ਾਮ 6:20 ਵਜੇ ਦੇ ਕਰੀਬ 48 ਐਵੇਨਿਊ ਨੇੜੇ 256 ਸਟ੍ਰੀਟ 'ਤੇ ਦੋ ਸੇਡਾਨ ਵਿਚ ਟੱਕਰ ਹੋਈ। ਦੋਵੇਂ ਕਾਰਾਂ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ ਅਤੇ ਸੜਕ ਤੋਂ ਉਤਰ ਗਈਆਂ ਸਨ।

ਫਰਸਟ ਰਿਸਪੋਂਡਰ ਵਲੋਂ ਜਾਨ ਬਚਾਉਣ ਦੀਆਂ ਕੋਸ਼ਿਸ਼ਾਂ ਦੇ ਬਾਵਜੂਦ ਇੱਕ ਡਰਾਈਵਰ ਨੇ ਮੌਕੇ 'ਤੇ ਦਮ ਤੋੜ ਦਿੱਤਾ। ਲੈਂਗਲੀ ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਇਸ ਦੁਖ਼ਦ ਟੱਕਰ ਲਈ ਜ਼ਿੰਮੇਵਾਰ ਹਾਲਾਤ ਦੀ ਜਾਂਚ ਕੀਤੀ ਜਾ ਰਹੀ ਹੈ ਪਰ ਕਿਸੇ ਵੀ ਪ੍ਰਕਾਰ ਦੀ ਇਮਪੇਅਰਮੈਂਟ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।

ਸਾਰਜੈਂਟ ਜ਼ਾਈਨਲ ਸ਼ਾਰੂਮ ਨੇ ਕਿਹਾ ਕਿ ਕਮਿਊਨਿਟੀ ਵਿਚ ਬਹੁਤ ਜ਼ਿਆਦਾ ਤੇਜ਼ ਰਫ਼ਤਾਰ ਦੇ ਪ੍ਰੇਸ਼ਾਨ ਕਰਨ ਵਾਲੇ ਰੁਝਾਨ ਅਤੇ ਹਾਦਸਿਆਂ ਨੂੰ ਦੇਖਦੇ ਹੋਏ ਪੁਲਿਸ ਵਲੋਂ ਗਸ਼ਤ ਵਧਾਉਣ ਦੀ ਯੋਜਨਾ ਬਣਾਈ ਗਈ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਕਿਸੇ ਨੇ ਵੀ ਕੱਲ੍ਹ ਸ਼ਾਮ 256 ਸਟ੍ਰੀਟ 'ਤੇ ਟੱਕਰ ਦੇਖੀ ਹੈ, ਉਸ ਨੂੰ 604-532-3200 'ਤੇ ਲੈਂਗਲੀ ਆਰ.ਸੀ.ਐਮ.ਪੀ. ਨਾਲ ਸੰਪਰਕ ਕਰਨ ਲਈ ਕਿਹਾ ਜਾਂਦਾ ਹੈ।