ਕੈਨੇਡਾ ਨੇ ਬੈਂਕ ਅਕਾਊਂਟ ਵਿਚ ਪੈਸੇ ਨਾ ਹੋਣ 'ਤੇ ਚਾਰਜ ਕੀਤੀ ਜਾਣ ਵਾਲੀ ਫੀਸ ਘਟਾਈ

ਕੈਨੇਡਾ ਸਰਕਾਰ ਨੇ ਬੈਂਕ ਅਕਾਊਂਟ ਵਿਚ ਪੈਸੇ ਨਾ ਹੋਣ 'ਤੇ ਚਾਰਜ ਕੀਤੀ ਜਾਣ ਵਾਲੀ ਨਾਕਾਫ਼ੀ ਫੰਡ ਫੀਸ ਦੀ ਹੱਦ 50 ਡਾਲਰ ਤੋਂ ਘਟਾ ਦਿੱਤੀ ਹੈ। ਹੁਣ ਕੋਈ ਵੀ ਬੈਂਕ ਨਿੱਜੀ ਜਮ੍ਹਾਂ ਖਾਤੇ 'ਤੇ ਨੈਫ.ਐਫ.ਐਸ. ਫੀਸ $10 ਤੋਂ ਵੱਧ ਨਹੀਂ ਵਸੂਲ ਸਕਣਗੇ। ਇਹ ਨਿਯਮ ਵੀਰਵਾਰ ਤੋਂ ਲਾਗੂ ਹੋ ਗਏ ਹਨ। ਵਿੱਤ ਮੰਤਰੀ ਫ੍ਰਾਂਸਵਾ-ਫਿਲਿਪ ਸ਼ੈਂਪੇਨ ਨੇ ਕਿਹਾ ਕਿ ਇਨ੍ਹਾਂ ਨਵੇਂ ਨਿਯਮਾਂ ਦਾ ਮਕਸਦ ਉਨ੍ਹਾਂ ਗ੍ਰਾਹਕਾਂ 'ਤੇ ਵਿੱਤੀ ਬੋਝ ਘਟਾਉਣਾ ਹੈ ਜਿਨ੍ਹਾਂ ਦੇ ਖਾਤੇ ਵਿਚ ਚੈੱਕ ਜਾਂ ਪ੍ਰੀ ਔਰਥੋਰਾਈਜ਼ਡ ਚਾਰਜ ਦੀ ਅਦਾਇਗੀ ਲਈ ਕਈ ਵਾਰ ਲੋੜੀਂਦੀ ਰਕਮ ਨਹੀਂ ਹੁੰਦੀ।

ਇਸ ਤੋਂ ਇਲਾਵਾ ਬੈਂਕ ਹੁਣ ਇੱਕੋ ਖਾਤੇ 'ਤੇ ਦੋ ਕੰਮਕਾਜੀ ਦਿਨਾਂ ਦੇ ਅੰਦਰ ਇੱਕ ਤੋਂ ਵੱਧ ਵਾਰ ਐਨ.ਐਸ.ਐਫ. ਫੀਸ ਨਹੀਂ ਲਗਾ ਸਕਣਗੇ। ਨਵੇਂ ਨਿਯਮਾਂ ਤਹਿਤ ਜੇਕਰ ਕਿਸੇ ਗ੍ਰਾਹਕ ਦੇ ਖਾਤੇ ਵਿਚ ਕਿਸੇ ਪੇਮੈਂਟ ਲਈ $10 ਤੋਂ ਘੱਟ ਦੀ ਰਕਮ ਘੱਟਦੀ ਹੈ, ਤਾਂ ਬੈਂਕਾਂ ਵੱਲੋਂ ਐਨ.ਐਸ.ਐਫ. ਫੀਸ ਵਸੂਲਣ 'ਤੇ ਪੂਰਨ ਪਾਬੰਦੀ ਲਗਾ ਦਿੱਤੀ ਗਈ ਹੈ।

ਇਸ ਕਦਮ ਨਾਲ ਉਨ੍ਹਾਂ ਗ੍ਰਾਹਕਾਂ ਨੂੰ ਵੱਡੀ ਰਾਹਤ ਮਿਲੇਗੀ ਜੋ ਮਾਮੂਲੀ ਰਕਮ ਦੀ ਘਾਟ ਕਾਰਨ ਭਾਰੀ ਜੁਰਮਾਨਿਆਂ ਦਾ ਸਾਹਮਣਾ ਕਰਦੇ ਸਨ। ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਕੈਪ ਦੇ ਲਾਗੂ ਹੋਣ ਨਾਲ ਕੈਨੇਡੀਅਨ ਨੂੰ ਸਾਲਾਨਾ $600 ਮਿਲੀਅਨ ਦੀ ਬਚਤ ਹੋਣ ਦੀ ਉਮੀਦ ਹੈ।