ਟਰੂਡੋ ਵਲੋਂ ਹਾਈ ਸਪੀਡ ਰੇਲ ਦੀ ਘੋਸ਼ਣਾ: ਟੋਰਾਂਟੋ ਤੋਂ ਮਾਂਟਰੀਅਲ ਦਾ ਸਫਰ ਮਹਿਜ ਤਿੰਨ ਘੰਟੇ ਵਿਚ ਹੋਵੇਗਾ ਪੂਰਾ

ਪ੍ਰਧਾਨ ਮੰਤਰੀ ਟਰੂਡੋ ਨੇ ਟੋਰਾਂਟੋ ਅਤੇ ਕਿਊਬੈਕ ਸਿਟੀ ਵਿਚਕਾਰ ਕੈਨੇਡਾ ਦੇ ਸਭ ਤੋਂ ਹਾਈ-ਸਪੀਡ ਰੇਲ ਨੈੱਟਵਰਕ ਦੀ ਘੋਸ਼ਣਾ ਕੀਤੀ ਹੈ, ਜਿਸ ਨਾਲ ਟੋਰਾਂਟੋ ਤੋਂ ਮਾਂਟਰੀਅਲ ਦਾ ਸਫਰ ਮਹਿਜ ਤਿੰਨ ਘੰਟੇ ਵਿਚ ਪੂਰਾ ਹੋਵੇਗਾ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਸ ਹਾਈ-ਸਪੀਡ ਰੇਲ ਲਾਈਨ ਲਈ ਸਰਕਾਰ $3.9 ਬਿਲੀਅਨ ਖ਼ਰਚ ਕਰੇਗੀ ਅਤੇ ਇਹ ਪ੍ਰੋਜੈਕਟ 6 ਸਾਲਾਂ ਵਿਚ ਪੂਰਾ ਹੋਵੇਗਾ।

ਟਰੂਡੋ ਨੇ ਕਿਹਾ ਕਿ 1,000 ਕਿਲੋਮੀਟਰ ਦੇ ਇਸ ਟ੍ਰੈਕ 'ਤੇ ਪੂਰੀ ਤਰ੍ਹਾਂ ਇਲੈਕਟ੍ਰਿਕ ਟ੍ਰੇਨਾਂ ਚੱਲਣਗੀਆਂ, ਜਿਨ੍ਹਾਂ ਦੀ ਸਪੀਡ 300 ਕਿਲੋਮੀਟਰ ਪ੍ਰਤੀ ਘੰਟਾ ਤੱਕ ਹੋਵੇਗੀ। ਇਨ੍ਹਾਂ ਰੇਲਗੱਡੀਆਂ ਦਾ ਸਟਾਪ- ਟੋਰਾਂਟੋ, ਪੀਟਰਬਰੋ, ਔਟਵਾ, ਮਾਂਟਰੀਅਲ, ਲਾਵਲ, ਟ੍ਰੋਇਸ-ਰਿਵੀਏਰਸ ਅਤੇ ਕਿਊਬੈਕ ਸਿਟੀ ਵਿਚ ਹੋਵੇਗਾ।

ਇਸ ਹਾਈ-ਸਪੀਡ ਰੇਲ ਸੇਵਾ ਸਰਵਿਸ ਦਾ ਅਧਿਕਾਰਤ ਨਾਮ - ਆਲਟੋ ਹੋਵੇਗਾ। ਗੌਰਤਲਬ ਹੈ ਕਿ ਟਰੂਡੋ ਅਤੇ ਟਰਾਂਸਪੋਰਟ ਮੰਤਰੀ ਅਨੀਤਾ ਆਨੰਦ ਅੱਜ ਮਾਂਟਰੀਅਲ ਵਿਚ ਸਨ, ਜਿੱਥੇ ਉਨ੍ਹਾਂ ਕੈਨੇਡਾ ਦੇ ਇਸ ਸਭ ਤੋਂ ਉਡੀਕੇ ਜਾਂਦੇ ਪ੍ਰੋਜੈਕਟ ਦਾ ਐਲਾਨ ਕੀਤਾ।