ਫੈਡਰਲ ਸਰਕਾਰ ਅਮਰੀਕਾ 'ਤੇ ਬਰਾਬਰ ਦਾ ਟੈਰਿਫ ਲਗਾਉਣ ਦੀ ਰੱਖੇ ਤਿਆਰੀ : ਡੱਗ ਫੋਰਡ

ਕੈਨੇਡਾ ਅਮਰੀਕਾ ਵਿਚ ਵਪਾਰ ਵਾਰਤਾ ਖਤਮ ਹੋਣ ਦੀ ਸਮਾਂ-ਸੀਮਾ 1 ਅਗਸਤ ਨੇੜੇ ਆਉਣ ਵਿਚਕਾਰ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਮੰਗ ਕੀਤੀ ਹੈ ਕਿ ਜੇ ਸ਼ੁੱਕਰਵਾਰ ਤੱਕ ਕੋਈ ਵਪਾਰ ਸਮਝੌਤਾ ਨਹੀਂ ਹੁੰਦਾ ਤਾਂ ਫੈਡਰਲ ਸਰਕਾਰ ਅਮਰੀਕਾ 'ਤੇ ਬਰਾਬਰ ਦਾ ਟੈਰਿਫ ਲਗਾਉਣ ਦੀ ਤਿਆਰੀ ਰੱਖੇ, ਉਨ੍ਹਾਂ ਕਿਹਾ ਕਿ ਜਵਾਬੀ ਕਦਮ ਵਿਚ ਅਮਰੀਕਾ ਐਲੂਮੀਨੀਅਮ ਅਤੇ ਸਟੀਲ 'ਤੇ ਵੀ ਬਰਾਬਰ ਦਾ 50 ਫੀਸਦੀ ਟੈਰਿਫ ਸ਼ਾਮਲ ਹੋਣਾ ਚਾਹੀਦਾ ਹੈ।

ਫੋਰਡ ਦੀ ਇਹ ਟਿੱਪਣੀ ਉਦੋਂ ਆਈ ਹੈ ਜਦੋਂ ਹਾਲ ਹੀ ਵਿਚ ਟਰੰਪ ਨੇ ਕੈਨੇਡਾ ਨਾਲ ਚੱਲ ਰਹੀ ਵਾਰਤਾ ਵਿਚਕਾਰ 1 ਅਗਸਤ ਤੋਂ ਕਈ ਕੈਨੇਡੀਅਨ ਸਾਮਾਨ 'ਤੇ 35 ਫੀਸਦੀ ਟੈਰਿਫ ਲਗਾਉਣ ਦੀ ਧਮਕੀ ਦਿੱਤੀ ਹੈ।

ਫੋਰਡ ਨੇ ਕਿਹਾ ਕਿ ਮੇਰਾ ਰੁਖ਼ ਸਪੱਸ਼ਟ ਹੈ ਕਿ ਜੇ ਟਰੰਪ ਵਪਾਰ ਯੁੱਧ ਜਾਰੀ ਰੱਖਦੇ ਹਨ ਤਾਂ ਜਵਾਬ ਡਾਲਰ ਫਾਰ ਡਾਲਰ ਹੋਣਾ ਚਾਹੀਦਾ ਹੈ। ਓਧਰ, ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਵੀ ਸਾਫ ਕੀਤਾ ਹੈ ਕਿ ਉਨ੍ਹਾਂ ਦੀ ਸਰਕਾਰ ਸਿਰਫ ਓਹੀ ਸਮਝੌਤਾ ਸਵੀਕਾਰ ਕਰੇਗੀ ਜੋ ਕੈਨੇਡਾ ਦੇ ਹੱਕ ਵਿਚ ਹੋਵੇਗਾ।