18.82C Vancouver 18.82C VancouverJan 28, 2020 8:17 PM -
ਸਿਹਤ ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਹੈ ਕਿ ਵੁਹਾਨ ਕਰੋਨਾਵਾਇਰਸ ਨੇ ਬ੍ਰਿਟਿਸ਼ ਕੋਲੰਬੀਆ 'ਚ ਦਸਤਕ ਦਿੱਤੀ ਹੈ।
ਇਸਦੀ ਪੁਸ਼ਟੀ ਮੰਗਲਵਾਰ ਨੂੰ ਕੀਤੀ ਗਈ। ਬੀ.ਸੀ. ਸੈਂਟਰ ਫਾਰ ਡਿਜ਼ੀਜ ਕੰਟਰੋਲ (BC Centre for disease control) ਵੱਲੋਂ ਦੱਸਿਆ ਗਿਆ ਕਿ ਇੱਕ ਮਰੀਜ ਇਸ ਬਿਮਾਰੀ ਲਈ ਪਾਜੀਟਿਵ ਪਾਇਆ ਗਿਆ ਹੈ।
ਮਰੀਜ ਆਪਣੇ ਘਰ ਵਿੱਚ ਹੀ ਇਕੱਲਾ ਹੈ।
ਬਿਮਾਰੀ ਨਾਲ ਪੀੜਤ ਵਿਅਕਤੀ ਇੱਕ 40 ਸਾਲਾ ਪੁਰੁਸ਼ ਹੈ, ਜੋ ਚੀਨ ਆਮ ਤੌਰ 'ਤੇ ਜਾਂਦਾ ਆਉਂਦਾ ਰਹਿੰਦਾ ਹੈ।
ਡਾ. ਬੋਨੀ ਹੈਨਰੀ ਨੇ ਮੰਗਲਵਾਰ ਨੂੰ ਇੱਕ ਨਿਊਜ ਕਾਨਫਰੰਸ ਦੌਰਾਨ ਦੱਸਿਆ ਕਿ ਪੀੜਤ ਵਿਅਕਤੀ ਚੀਨ ਦੇ ਹਾਲਾਤ ਨੂੰ ਲੈਕੇ ਪੂਰੀ ਤਰ੍ਹਾਂ ਸਾਵਧਾਨ ਸੀ।
ਓਹ ਆਪਣੀ ਤਬੀਯਤ ਨੂੰ ਲੈਕੇ ਵੀ ਸਾਵਧਾਨੀ ਵਰਤ ਰਿਹਾ ਸੀ। ਉਸਨੇ ਖੁਦ ਹੀ ਬਾਹਰੀ ਦੁਨੀਆ ਤੋਂ ਦੂਰੀ ਬਣਾ ਲਈ ਸੀ।
ਮਰੀਜ ਬਾਰੇ ਆਖਿਆ ਗਿਆ ਕਿ ਉਹ ਫਿਲਹਾਲ ਠੀਕ ਹੈ। ਉਸਨੂੰ ਹਸਪਤਾਲ ਦਾਖਿਲ ਕਰਨ ਦੀ ਲੋੜ ਨਹੀਂ ਹੈ।
ਉਸਦੇ ਪਰਿਵਾਰ ਦੇ ਲੋਕਾਂ ਦੇ ਵੀ ਟੈਸਟ ਕੀਤੇ ਜਾ ਰਹੇ ਹਨ।
ਇਸਤੋਂ ਪਹਿਲਾਂ ਔਂਟੈਰੀਓ ਤੋਂ ਕੋਰੋਨਾ ਵਾਇਰਸ ਦੇ 2 ਮਾਮਲੇ ਸਾਹਮਣੇ ਆਏ ਹਨ।
