14.04C Vancouver 14.04C VancouverSep 9, 2020 3:39 PM -
ਇੱਕ ਬ੍ਰਿਟਿਸ਼ ਕੋਲੰਬੀਆ ਫਰਸਟ ਨੇਸ਼ਨ ਵੱਲੋਂ ਕੋਵਿਡ -19 ਦੇ ਮਾਮਲਿਆਂ ਕਾਰਨ ਸਟੇਟ ਆਫ਼ ਐਮਰਜੈਂਸੀ ਜਾਰੀ ਕਰ ਦਿੱਤੀ ਗਈ ਹੈ।
ਅਧਿਕਾਰੀਆਂ ਮੁਤਾਬਕ ਫਰਸਟ ਨੇਸ਼ਨ ਦੇ ਚਾਰ ਮੈਂਬਰ ਵਾਇਰਸ ਤੋਂ ਪੀੜਤ ਹਨ ਅਤੇ ਕਈ ਹੋਰ ਮੈਂਬਰਾਂ ਵਿੱਚ ਵਾਇਰਸ ਦੀਆਂ ਨਿਸ਼ਾਨੀਆਂ ਨਜ਼ਰ ਆ ਰਹੀਆਂ ਹਨ।
ਸਲੇ’ਐਮੋਨ ਨੇਸ਼ਨ (Tla'amin Nation) ਦੀ ਵੈੱਬਸਾਈਟ ‘ਤੇ ਸਾਂਝੀ ਕੀਤੀ ਗਈ ਜਾਣਕਾਰੀ ਅਨੁਸਾਰ ਵਸਨੀਕਾਂ ਨੂੰ ਸਿਹਤ ਅਧਿਕਾਰੀਆਂ ਵੱਲੋਂ ‘ਕੌਂਟੈਕਟ ਟਰੇਸਿੰਗ’ ਖ਼ਤਮ ਹੋ ਜਾਣ ਤੱਕ ਆਪਣੀ ਥਾਂ ਤੇ ਪਨਾਹ ਲੈਣ ਦੇ ਹੁਕਮ ਜਾਰੀ ਕੀਤੇ ਗਏ ਹਨ।
ਪਾਵਲ ਰਿਵਰ ਇਲਾਕੇ ਦੇ ਭਾਈਚਾਰੇ ‘ਤੇ ਮੰਗਲਵਾਰ ਤੋਂ ਲਾਗੂ ਕੀਤੇ ਗਏ ਹੁਕਮਾਂ ਅਨੁਸਾਰ ਮੈਂਬਰਾਂ ਨੂੰ 72 ਘੰਟੇ ਤੱਕ ਆਪਣੀ ਥਾਂ ਤੇ ਬਰਕਰਾਰ ਰਹਿਣ ਦੀ ਹਦਾਇਤ ਦਿੱਤੀ ਗਈ ਹੈ।
ਵੈਨਕੂਵਰ ਤੋਂ ਤਕਰੀਬਨ 170 ਕਿਲੋਮੀਟਰ ਦੀ ਦੂਰੀ ਤੇ ਸਥਿਤ ਇਸ ਫਰਸਟ ਨੇਸ਼ਨ ‘ਤੇ ਐਂਟਰੀ ਵੀ ਸੀਮਤ ਕਰ ਦਿੱਤੀ ਗਈ ਹੈ ਅਤੇ ਮਾਪਿਆਂ ਨੂੰ ਆਪਣੇ ਬੱਚਿਆਂ ਨੂੰ ਸਕੂਲ ਨਾ ਭੇਜਣ ਦੀ ਹਦਾਇਤ ਵੀ ਦਿੱਤੀ ਗਈ ਹੈ।
ਵੈਨਕੂਵਰ ਕੋਸਟਲ ਹੈਲਥ ਵੱਲੋਂ ਸਾਂਝੀ ਕੀਤੀ ਗਈ ਜਾਣਕਾਰੀ ਅਨੁਸਾਰ ਵਾਇਰਸ ਦੇ ਮਾਮਲਿਆਂ ਦਾ ਸੰਬੰਧ 3 ਸਤੰਬਰ ਜਾਂ 4 ਸਤੰਬਰ ਨੂੰ ਪਾਵਲ ਰਿਵਰ ਵਿਖੇ ਇੱਕ ਸੰਸਕਾਰ ਦੀ ਰਸਮ ਦੌਰਾਨ ਹੋਏ ਇਕੱਠ ਨਾਲ ਹੋਣ ਦੀ ਸੰਭਾਵਨਾ ਹੈ।
ਬ੍ਰਿਟਿਸ਼ ਕੋਲੰਬੀਆ ਦੇ ਸੂਬਾਈ ਸਿਹਤ ਅਫਸਰ ਵੱਲੋਂ ਮੰਗਲਵਾਰ ਨੂੰ ਸੂਬੇ ਵਿੱਚ ਕੋਵਿਡ-19 ਦੇ ਮਾਮਲਿਆਂ ਦੀ ਲਗਾਤਾਰ ਵੱਧ ਰਹੀ ਗਿਣਤੀ ਨੂੰ ਦੇਖਦਿਆਂ ਨਾਈਟ ਕਲੱਬ ਅਤੇ ਬੈਂਕਟ ਹਾਲਾਂ ਨੂੰ ਬੰਦ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਹਨ।
ਸ਼ੁੱਕਰਵਾਰ ਤੋਂ ਲੈ ਕੇ ਮੰਗਲਵਾਰ ਤੱਕ ਬੀ.ਸੀ. ਵਿੱਚ ਕੋਵਿਡ -19 ਦੇ 429 ਨਵੇਂ ਮਾਮਲੇ ਸਾਹਮਣੇ ਆਏ ਹਨ।
ਸੂਬੇ ਵਿੱਚ ਕੁੱਲ ਮਾਮਲਿਆਂ ਦੀ ਗਿਣਤੀ ਹੁਣ 6,591 ਹੋ ਗਈ ਹੈ ਅਤੇ 213 ਵਿਅਕਤੀ ਦਮ ਤੋੜ ਚੁੱਕੇ ਹਨ।
ਸਲੇ’ਐਮੋਨ ਨੇਸ਼ਨ (Tla'amin Nation) ਦੇ ਲੀਡਰ, ਕਲਿੰਟ ਵਿਲੀਅਮਜ਼ ਵਲੋਂ ਆਪਣੇ ਭਾਈਚਾਰੇ ਦੇ ਲੋਕਾਂ ਨੂੰ ਵਾਇਰਸ ‘ਤੇ ਕਾਬੂ ਪਾਉਣ ਲਈ ਹੁਕਮਾਂ ਦੀ ਪਾਲਣਾ ਕਰਨ ਦੀ ਅਪੀਲ ਕੀਤੀ ਜਾ ਰਹੀ ਹੈ।
