ਬੀ.ਸੀ. ਵਿਚ ਜਬਰੀ ਵਸੂਲੀ ਮਾਮਲੇ ’ਚ ਪੰਜ ਨੌਜਵਾਨ ਗ੍ਰਿਫ਼ਤਾਰ, ਇੱਕ ਟੋਰੌਂਟੋ ਏਅਰਪੋਰਟ ਤੋਂ ਕਾਬੂ

ਬੀ.ਸੀ. ਵਿਚ ਪੁਲਿਸ ਨੇ ਇੱਕ ਸਾਂਝੇ ਅਪਰੇਸ਼ਨ ਵਿਚ ਪੰਜ ਨੌਜਵਾਨਾਂ ਨੂੰ ਜਬਰੀ ਵਸੂਲੀ ਦੇ ਮਾਮਲੇ ਵਿਚ ਗ੍ਰਿਫ਼ਤਾਰ ਕੀਤਾ ਹੈ। ਲੈਂਗਲੀ ਆਰ.ਸੀ.ਐਮ.ਪੀ. ਦੇ Supt. Harm Dosange ਅਤੇ ਬੀ. ਸੀ. ਐਕਸਟੌਰਸ਼ਨ ਟਾਸਕ ਫੋਰਸ ਦੇ ਚੀਫ਼ ਸੁਪਰਡੈਂਟ ਡੰਕਨ ਪਾਉਂਡ ਨੇ ਸ਼ੁੱਕਰਵਾਰ ਨੂੰ ਇੱਕ ਪ੍ਰੈਸ ਕਾਨਫਰੰਸ ਵਿਚ ਦੱਸਿਆ ਕਿ 4 ਵਿਦੇਸ਼ੀ ਨਾਗਰਿਕਾਂ ਦੀ ਗ੍ਰਿਫਤਾਰੀ ਸਰੀ ਵਿਚ ਕੀਤੀ ਗਈ ਹੈ ਅਤੇ ਇੱਕ ਨੂੰ ਟੋਰੌਂਟੋ ਪੀਅਰਸਨ ਏਅਰਪੋਰਟ ਤੋਂ ਹਿਰਾਸਤ ਵਿਚ ਲਿਆ ਗਿਆ ਹੈ।

ਲੈਂਗਲੀ ਆਰ.ਸੀ.ਐਮ.ਪੀ.ਮੁਤਾਬਕ, ਇਹ ਪੰਜੇ ਮੁਲਜ਼ਮ ਬੀਤੇ ਕੱਲ੍ਹ ਗ੍ਰਿਫਤਾਰ ਕੀਤੇ ਗਏ ਸਨ ਅਤੇ ਉਨ੍ਹਾਂ 'ਤੇ ਐਕਸਟੌਰਸ਼ਨ ਨਾਲ ਜੁੜੇ ਚਾਰਜਿਜ਼ ਲਗਾਏ ਗਏ ਹਨ। ਲੈਂਗਲੀ ਆਰ.ਸੀ.ਐਮ.ਪੀ. ਦੇ Supt. Harm Dosange ਮੁਤਾਬਕ, ਇਹ ਜਾਂਚ ਜੂਨ 2025 ਵਿਚ ਐਕਸਟੌਰਸ਼ਨ ਦੇ ਇੱਕ ਰਿਪੋਰਟ ਨਾਲ ਸ਼ੁਰੂ ਹੋਈ ਸੀ, ਜਿਸ ਵਿਚ ਇੱਕ ਆਟੋ ਡੀਲਰਸ਼ਿਪ ਦੇ ਭਾਈਵਾਲੀ ਮਾਲਕਾਂ ਨੂੰ ਪੈਸੇ ਦੀ ਵਸੂਲੀ ਲਈ ਧਮਕੀਆਂ ਦਿੱਤੀਆਂ ਗਈਆਂ ਸਨ।

ਗ੍ਰਿਫਤਾਰ ਕੀਤੇ ਗਏ ਨੌਜਵਾਨਾਂ ਦੀ ਪਛਾਣ 23 ਸਾਲਾ ਸੰਕੇਤ ਸਿੰਗਲਾ, ਸਰੀ ਤੋਂ 24 ਸਾਲਾ ਸਾਹਿਲ, ਸਰੀ ਦੇ ਹੀ 24 ਸਾਲਾ ਸਿਮਰਨਜੀਤ ਸਿੰਘ ਅਤੇ ਸਰੀ ਵਿਚ ਹੀ ਰਹਿ ਰਹੇ ਇੱਕ ਹੋਰ 21 ਸਾਲਾ ਨੌਜਵਾਨ ਹਰਸ਼ ਵਜੋਂ ਸਾਹਮਣੇ ਆਈ ਹੈ। ਉਥੇ ਹੀ, ਪੰਜਵੇਂ ਨੌਜਵਾਨ ਦੀ ਪਛਾਣ ਔਟਵਾ ਦੇ 24 ਸਾਲਾ ਜਗਦੀਪ ਸਿੰਘ ਵਜੋਂ ਦੱਸੀ ਗਈ ਹੈ।ਆਰ.ਸੀ.ਐਮ.ਪੀ. ਮੁਤਾਬਕ, ਸਿੰਗਲਾ ਭਾਰਤ ਵਿਚ ਸੀ, ਜਿਸ ਨੂੰ ਕੈਨੇਡਾ ਵਿਚ ਵਾਪਸੀ 'ਤੇ 1 ਅਕਤੂਬਰ ਨੂੰ ਟੋਰੌਂਟੋ ਏਅਰਪੋਰਟ 'ਤੇ ਗ੍ਰਿਫਤਾਰ ਕੀਤਾ ਗਿਆ, ਜਿੱਥੇ ਉਹ ਹਿਰਾਸਤ ਵਿਚ ਹੈ।