ਐਬਟਸਫੋਰਡ ਵਿੱਚ ਪੁਲਿਸ ਨੇ ਇੱਕ ਸ਼ੱਕੀ ਰਿਹਾਇਸ਼ ਤੋਂ ਪੰਜ ਹੈਂਡਗੰਨ ਸਮੇਤ ਹੋਰ ਸਮਾਨ ਕੀਤਾ ਜ਼ਬਤ

ਐਬਟਸਫੋਰਡ ਵਿਚ ਪੁਲਿਸ ਨੇ ਜਾਇਦਾਦ ਅਪਰਾਧ ਵਿਰੁੱਧ ਜਾਂਚ ਤਹਿਤ ਇੱਕ ਸ਼ੱਕੀ ਰਿਹਾਇਸ਼ ਤੋਂ ਪੰਜ ਹੈਂਡਗੰਨ ਅਤੇ 30,000 ਡਾਲਰ ਤੋਂ ਵੱਧ ਮੁੱਲ ਦਾ ਸੋਨਾ ਅਤੇ ਚਾਂਦੀ ਬਰਾਮਦ ਕੀਤਾ ਹੈ। ਪੁਲਿਸ ਡਿਪਾਰਟਮੈਂਟ ਨੇ ਵੀਰਵਾਰ ਨੂੰ ਇੱਕ ਪ੍ਰੈੱਸ ਨੋਟ ਜਾਰੀ ਕਰਦਿਆਂ ਦੱਸਿਆ ਕਿ ਇਹ ਜਾਂਚ ਅਕਤੂਬਰ ਮਹੀਨੇ ਵਿਚ ਇਲਾਕੇ ਵਿਚ ਹੋਈਆਂ ਬ੍ਰੇਕ-ਇਨਸ ਯਾਨੀ ਸੰਨ੍ਹਮਾਰੀ ਦੀਆਂ ਕਈ ਘਟਨਾਵਾਂ ਤੋਂ ਬਾਅਦ ਸ਼ੁਰੂ ਕੀਤੀ ਗਈ ਸੀ।

ਜਾਂਚ ਦੌਰਾਨ ਪੁਲਿਸ ਨੂੰ ਕੁਝ ਸ਼ੱਕੀ ਵਿਅਕਤੀਆਂ ਬਾਰੇ ਸੁਰਾਗ ਮਿਲੇ, ਜਿਨ੍ਹਾਂ ਦਾ ਸਬੰਧ ਮਰਟਲ ਐਵੇਨਿਊ ਦੇ 27800 ਬਲਾਕ ਵਿਚ ਸਥਿਤ ਇੱਕ ਜਾਣੇ-ਪਛਾਣੇ ਸ਼ੱਕੀ residence ਨਾਲ ਪਾਇਆ ਗਿਆ। 10 ਦਸੰਬਰ ਨੂੰ ਪੁਲਿਸ ਨੇ ਲੋਅਰ ਮੇਨਲੈਂਡ ਡਿਸਟ੍ਰਿਕਟ ਐਮਰਜੈਂਸੀ ਰਿਸਪਾਂਸ ਟੀਮ ਦੀ ਮਦਦ ਨਾਲ ਇਸ ਘਰ ਦੀ ਤਲਾਸ਼ੀ ਲਈ।

ਇਸ ਕਾਰਵਾਈ ਦੌਰਾਨ ਪੁਲਿਸ ਨੂੰ ਪੰਜ ਹੈਂਡਗੰਨ ਤੋਂ ਇਲਾਵਾ ਚੋਰੀ ਕੀਤਾ ਹੋਇਆ ਸਾਮਾਨ ਅਤੇ ਚੱਲ ਰਹੀ ਜਾਂਚ ਨਾਲ ਜੁੜੇ ਹੋਰ ਅਹਿਮ ਸਬੂਤ ਮਿਲੇ ਹਨ। ਹਾਲਾਂਕਿ, ਇਸ ਮਾਮਲੇ ਵਿਚ ਅਜੇ ਕਿਸੇ ਦੀ ਗ੍ਰਿਫ਼ਤਾਰੀ ਨਹੀਂ ਕੀਤੀ ਗਈ ਪਰ ਸਾਰਜੈਂਟ ਕੋਰੀ ਜੋਹਾਨਸਨ ਨੇ ਕਿਹਾ ਕਿ ਜਾਂਚ ਜਾਰੀ ਹੈ ਅਤੇ ਜਲਦੀ ਹੀ ਦੋਸ਼ ਤੈਅ ਕੀਤੇ ਜਾਣ ਦੀ ਉਮੀਦ ਹੈ।