9.73C Vancouver 9.73C VancouverJan 27, 2026 6:29 PM - Connect Newsroom - Ramandeep Kaur with files from The Canadian Press
ਸੈਂਟਰਲ ਕੈਨੇਡਾ ਵਿਚ ਰਿਕਾਰਡ ਬਰਫ਼ਬਾਰੀ ਤੋਂ ਬਾਅਦ ਅੱਜ ਹਵਾਈ ਸੇਵਾਵਾਂ ਹੌਲੀ-ਹੌਲੀ ਆਮ ਵਾਂਗ ਹੋਣੀਆਂ ਸ਼ੁਰੂ ਹੋ ਗਈਆਂ ਹਨ। ਏਅਰਪੋਰਟ 'ਤੇ ਬਰਫ਼ ਨੂੰ ਹਟਾਉਣ ਲਈ ਅਮਲਾ ਦਿਨ-ਰਾਤ ਕੰਮ ਕਰ ਰਿਹਾ ਹੈ, ਹਾਲਾਂਕਿ ਹਜ਼ਾਰਾਂ ਯਾਤਰੀਆਂ ਨੂੰ ਅਜੇ ਵੀ ਉਡਾਣਾਂ ਰੱਦ ਹੋਣ ਕਾਰਨ ਮੁਸ਼ਕਲਾਂ ਦਾ ਸਾਹਮਣਾ ਕਰ ਰਹੇ ਹਨ।
ਹਵਾਬਾਜ਼ੀ ਵਿਸ਼ਲੇਸ਼ਣ ਫਰਮ Cirium ਮੁਤਾਬਕ, ਮੰਗਲਵਾਰ ਸਵੇਰੇ 11:30 ਵਜੇ ਤੱਕ ਟੋਰਾਂਟੋ ਪੀਅਰਸਨ ਏਅਰਪੋਰਟ 'ਤੇ ਲਗਭਗ 11 ਫੀਸਦੀ ਯਾਨੀ 46 ਫਲਾਈਟ ਰੱਦ ਰਹੀਆਂ, ਜੋ ਕਿ ਸੋਮਵਾਰ ਦੇ ਮੁਕਾਬਲੇ ਘੱਟ ਹਨ। ਇਨਵਾਇਰਨਮੈਂਟ ਕੈਨੇਡਾ ਅਨੁਸਾਰ, ਐਤਵਾਰ ਨੂੰ ਪੀਅਰਸਨ ਏਅਰਪੋਰਟ 'ਤੇ 46 ਸੈਂਟੀਮੀਟਰ ਬਰਫ਼ ਦਰਜ ਕੀਤੀ ਗਈ ਸੀ, ਜਿਸ ਨਾਲ ਇਹ ਜਨਵਰੀ 1937 ਤੋਂ ਬਾਅਦ ਸਭ ਤੋਂ ਵੱਧ ਬਰਫ਼ਬਾਰੀ ਵਾਲਾ ਮਹੀਨਾ ਹੈ। ਉਥੇ ਹੀ, ਕਿਊਬੈਕ ਸਿਟੀ ਅਤੇ ਹੈਲੀਫੈਕਸ ਵਿਚ ਅੱਜ ਲਗਭਗ 10 ਫੀਸਦੀ ਉਡਾਣਾਂ ਰੱਦ ਕੀਤੀਆਂ ਗਈਆਂ।
ਨਿਊਫ਼ਾਉਂਡਲੈਂਡ ਦੇ ਸੇਂਟ ਜੌਨਜ਼ ਵਿਚ ਸਵੇਰੇ 22 ਫੀਸਦੀ ਦੇ ਕਰੀਬ ਉਡਾਣਾਂ ਰੱਦ ਹੋਈਆਂ। ਰਿਪੋਰਟਸ ਮੁਤਾਬਕ, ਅਮਰੀਕਾ ਦੇ ਡੈਲਸ, ਬੋਸਟਨ, ਨਿਊਯਾਰਕ ਅਤੇ ਵਾਸ਼ਿੰਗਟਨ ਡੀ.ਸੀ. ਜਾਣ ਜਾਂ ਉੱਥੋਂ ਆਉਣ ਵਾਲੇ ਕੈਨੇਡੀਅਨਜ਼ ਨੂੰ ਸਭ ਤੋਂ ਵੱਧ ਦਿੱਕਤਾਂ ਆ ਰਹੀਆਂ ਹਨ ਕਿਉਂਕਿ ਉੱਥੋਂ ਦੇ ਹਵਾਈ ਅੱਡਿਆਂ 'ਤੇ 35 ਤੋਂ 40 ਫੀਸਦੀ ਉਡਾਣਾਂ ਰੱਦ ਜਾਂ ਦੇਰੀ ਨਾਲ ਚੱਲ ਰਹੀਆਂ ਹਨ।
