ਮੈਟਰੋ ਵੈਨਕੂਵਰ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਪੈ ਰਹੀ ਸੰਘਣੀ ਧੁੰਦ, ਜਾਰੀ ਕੀਤੀ ਗਈ ਚਿਤਾਵਨੀ

ਮੈਟਰੋ ਵੈਨਕੂਵਰ ਦੇ ਵੱਖ-ਵੱਖ ਹਿੱਸਿਆਂ ਵਿਚ ਪੈ ਰਹੀ ਸੰਘਣੀ ਧੁੰਦ ਦਾ ਅੱਗੇ ਹੋਰ ਵੀ ਸਾਹਮਣਾ ਕਰਨਾ ਪੈ ਸਕਦਾ ਹੈ, ਇਨਵਾਇਰਮੈਂਟ ਕੈਨੇਡਾ ਨੇ ਜ਼ੀਰੋ ਵਿਜ਼ੀਬਿਲਟੀ ਫੋਗ ਦੀ ਚੇਤਾਵਨੀ ਨੂੰ ਹੁਣ ਬੁੱਧਵਾਰ ਦੁਪਹਿਰ ਤੱਕ ਵਧਾ ਦਿੱਤਾ ਹੈ।

ਧੁੰਦ ਦੀ ਇਹ ਚਿਤਾਵਨੀ ਲਗਭਗ ਪੂਰੇ ਮੈਟਰੋ ਵੈਨਕੂਵਰ ਲਈ ਜਾਰੀ ਕੀਤੀ ਗਈ ਹੈ, ਜਿਸ ਵਿਚ ਮੁੱਖ ਤੌਰ 'ਤੇ ਵੈਨਕੂਵਰ, ਬਰਨਬੀ, ਰਿਚਮੰਡ, ਸਰੀ ਅਤੇ ਵੈਨਕੂਵਰ ਇੰਟਰਨੈਸ਼ਨਲ ਏਅਰਪੋਰਟ ਸ਼ਾਮਲ ਹਨ। ਮੌਸਮ ਵਿਭਾਗ ਅਨੁਸਾਰ, ਸਟ੍ਰੇਟ ਔਫ ਜਾਰਜੀਆ, ਬੁਰਾਰਡ ਇਨਲੇਟ,ਬਾਊਂਡਰੀ ਬੇਅ ਅਤੇ ਫਰੇਜ਼ਰ ਵੈਲੀ ਦੇ ਨੇੜਲੇ ਇਲਾਕਿਆਂ ਵਿਚ ਧੁੰਦ ਜ਼ਿਆਦਾ ਸੰਘਣੀ ਰਹਿਣ ਦੀ ਸੰਭਾਵਨਾ ਹੈ।

ਇਨਵਾਇਰਮੈਂਟ ਕੈਨੇਡਾ ਨੇ ਕਿਹਾ ਕਿ ਹਾਲਾਂਕਿ, ਦੁਪਹਿਰ ਵੇਲੇ ਵਿਜ਼ੀਬਿਲਟੀ ਵਿਚ ਕੁਝ ਸੁਧਾਰ ਹੋ ਰਿਹਾ ਹੈ ਪਰ ਰਾਤ ਵੇਲੇ ਧੁੰਦ ਫਿਰ ਤੋਂ ਗਹਿਰੀ ਹੋ ਜਾਵੇਗੀ। ਮੌਸਮ ਏਜੰਸੀ ਨੇ ਅਜਿਹੇ ਵਿਚ ਡਰਾਈਵਰਾਂ ਨੂੰ ਗੱਡੀਆਂ ਦੀਆਂ ਲਾਈਟਾਂ ਨੂੰ ਚੱਲਦੇ ਰੱਖਣ, ਰਫ਼ਤਾਰ ਹੌਲੀ ਰੱਖਣ ਅਤੇ ਅਗਲੇ ਵਾਹਨ ਤੋਂ ਸੁਰੱਖਿਅਤ ਦੂਰੀ ਬਣਾ ਕੇ ਰੱਖਣ ਦੀ ਅਪੀਲ ਕੀਤੀ ਹੈ।