ਸਾਬਕਾ ਪੀ. ਐੱਮ. ਨੂੰ ਮਿਲੇਗੀ 8 ਮਿਲੀਅਨ ਡਾਲਰ ਤੋਂ ਵੱਧ ਪੈਨਸ਼ਨ

ਕੈਨੇਡਾ ਦੇ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਸਰਕਾਰੀ ਪੈਨਸ਼ਨ ਅਤੇ ਛੁੱਟੀ ਦੀ ਤਨਖਾਹ ਦੇ ਰੂਪ ਵਿਚ ਉਮਰ ਭਰ ਲਈ ਲਗਭਗ $8 ਮਿਲੀਅਨ ਮਿਲਣ ਦੀ ਉਮੀਦ ਹੈ। ਇਹ ਗਣਨਾ ਕੈਨੇਡੀਅਨ ਟੈਕਸਪੇਅਰਜ਼ ਫੈਡਰੇਸ਼ਨ ਨੇ ਕੀਤੀ ਹੈ। ਗਰੁੱਪ ਨੇ 110 ਮੈਂਬਰ ਪਾਰਲੀਮੈਂਟ ਦੀ ਪੈਨਸ਼ਨ ਯੋਗਤਾ ਦੇ ਅੰਕੜੇ ਜਾਰੀ ਕੀਤੇ ਹਨ, ਜਿਨ੍ਹਾਂ ਨੇ ਜਾਂ ਤਾਂ ਦੁਬਾਰਾ ਚੋਣ ਨਹੀਂ ਲੜੀ ਜਾਂ ਸੰਸਦ ਵਿਚ ਵਾਪਸੀ ਦੀ ਆਪਣੀ ਕੋਸ਼ਿਸ਼ ਹਾਰ ਗਏ।

ਉਨ੍ਹਾਂ ਵਿਚੋਂ ਟਰੂਡੋ ਵੀ ਇੱਕ ਹਨ, ਜਿਨ੍ਹਾਂ ਨੇ 2025 ਦੀਆਂ ਫੈਡਰਲ ਚੋਣਾਂ ਵਿਚ ਹਿੱਸਾ ਨਹੀਂ ਲਿਆ ਸੀ। ਟੈਕਸਪੇਅਰਜ਼ ਫੈਡਰੇਸ਼ਨ ਮੁਤਾਬਕ, ਸਾਬਕਾ ਪੀ. ਐੱਮ. ਜਸਟਿਨ ਟਰੂਡੋ ਨੂੰ ਛੁੱਟੀ ਦੀ ਤਨਖਾਹ ਦੇ ਰੂਪ ਵਿਚ $104,900 ਪ੍ਰਾਪਤ ਹੋਣਗੇ।

ਉਥੇ ਹੀ ਜੇ ਉਹ 90 ਸਾਲ ਤੱਕ ਉਮਰ ਹਢਾਉਂਦੇ ਹਨ ਤਾਂ 16 ਸਾਲ ਐਮ.ਪੀ. ਅਤੇ 10 ਸਾਲ ਪ੍ਰਧਾਨ ਮੰਤਰੀ ਵਜੋਂ ਸੇਵਾ ਲਈ ਉਨ੍ਹਾਂ ਨੂੰ ਕੁੱਲ ਮਿਲਾ ਕੇ $8.4 ਮਿਲੀਅਨ ਦਾ ਪੈਨਸ਼ਨ ਭੁਗਤਾਨ ਮਿਲੇਗਾ।ਕੈਨੇਡੀਅਨ ਟੈਕਸਪੇਅਰਜ਼ ਫੈਡਰੇਸ਼ਨ ਦੇ ਫੈਡਰਲ ਡਾਇਰੈਕਟਰ ਫ੍ਰੈਂਕੋ ਟੈਰਾਜ਼ਾਨੋ ਨੇ ਕਿਹਾ ਕਿ ਸਾਂਸਦ ਅਤੇ ਪ੍ਰਧਾਨ ਮੰਤਰੀ ਹੋਣ ਲਈ ਵੱਖ-ਵੱਖ ਪੈਨਸ਼ਨ ਹੈ।