ਸਰੀ ਪੁਲਿਸ ਸਰਵਿਸ ਦੇ ਸਾਬਕਾ ਮੁਖੀ ਨੇ ਬਰਖਾਸਤਗੀ ਤੋਂ ਬਾਅਦ ਪਹਿਲੀ ਵਾਰ ਜਨਤਕ ਤੌਰ 'ਤੇ ਰੱਖਿਆ ਆਪਣਾ ਪੱਖ

ਸਰੀ ਪੁਲਿਸ ਸਰਵਿਸ ਦੇ ਸਾਬਕਾ ਚੀਫ ਨੌਰਮ ਲਿਪਿੰਸਕੀ ਨੇ ਆਪਣੀ ਬਰਖਾਸਤਗੀ ਤੋਂ ਬਾਅਦ ਪਹਿਲੀ ਵਾਰ ਅਧਿਕਾਰਤ ਤੌਰ 'ਤੇ ਆਪਣਾ ਪੱਖ ਸਾਹਮਣੇ ਰੱਖਿਆ ਹੈ। ਐਸ.ਪੀ.ਐਸ. ਦੇ ਮੁਲਾਜ਼ਮਾਂ ਨੂੰ ਲਿਖੇ ਇੱਕ ਪੱਤਰ ਵਿਚ ਉਨ੍ਹਾਂ ਖੁਲਾਸਾ ਕੀਤਾ ਕਿ ਉਹ ਆਪਣੀਆਂ ਛੁੱਟੀਆਂ ਕੱਟ ਕੇ ਵਾਪਸ ਡਿਊਟੀ 'ਤੇ ਪਰਤੇ ਸਨ ਅਤੇ ਪਹਿਲੇ ਹੀ ਦਿਨ ਸਰੀ ਪੁਲਿਸ ਬੋਰਡ ਨੇ ਇੱਕ ਮੀਟਿੰਗ ਸੱਦੀ, ਜਿਸ ਵਿਚ ਉਨ੍ਹਾਂ ਨੂੰ ਦੱਸਿਆ ਗਿਆ ਕਿ ਉਨ੍ਹਾਂ ਦੀਆਂ ਸੇਵਾਵਾਂ ਖ਼ਤਮ ਕੀਤੀਆਂ ਜਾ ਰਹੀਆਂ ਹਨ ਅਤੇ ਇਸ ਦਾ ਕੋਈ ਠੋਸ ਕਾਰਨ ਨਹੀਂ ਦਿੱਤਾ।

ਉਨ੍ਹਾਂ ਪੱਤਰ ਵਿਚ ਲਿਖਿਆ ਕਿ ਭਾਵੇਂ ਉਹ ਇਸ ਤਰ੍ਹਾਂ ਆਪਣੇ ਸਫ਼ਰ ਦਾ ਅੰਤ ਨਹੀਂ ਸੀ ਚਾਹੁੰਦੇ ਪਰ ਬੇਹੱਦ ਚੁਣੌਤੀਪੂਰਨ ਹਾਲਾਤ ਵਿਚ ਜੋ ਕੁਝ ਵੀ ਉਹਨਾਂ ਪੁਲਿਸ ਫੋਰਸ ਨਾਲ ਮਿਲ ਕੇ ਹਾਸਲ ਕੀਤਾ ਹੈ, ਉਸ 'ਤੇ ਉਨ੍ਹਾਂ ਨੂੰ ਹਮੇਸ਼ਾ ਮਾਣ ਰਹੇਗਾ। ​

ਫਿਲਹਾਲ, ਡਿਪਟੀ ਚੀਫ ਕਾਂਸਟੇਬਲ ਟੌਡ ਮਾਤਸੁਮੋਟੋ ਨੂੰ ਐਸ.ਪੀ.ਐਸ. ਦਾ ਅੰਤਰਿਮ ਮੁਖੀ ਨਿਯੁਕਤ ਕੀਤਾ ਗਿਆ ਹੈ, ਜਦੋਂ ਕਿ ਸਰੀ ਦੇ ਟੈਕਸਦਾਤਾ ਸਿਰ ਲਿਪਿੰਸਕੀ ਦੇ ਕੰਟਰੈਕਟ ਮੁਤਾਬਕ ਲੱਖਾਂ ਡਾਲਰਾਂ ਦੇ severance ਪੈਕੇਜ ਦਾ ਬੋਝ ਪੈਣ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ। ਹਾਲਾਂਕਿ, ਹੁਣ ਤੱਕ ਇਹ ਸਪੱਸ਼ਟ ਨਹੀਂ ਕੀਤਾ ਗਿਆ ਹੈ ਕਿ ਨੌਕਰੀ ਤੋਂ ਹਟਾਏ ਜਾਣ 'ਤੇ ਉਹਨਾਂ ਨੂੰ ਮਿਲਣ ਵਾਲੀ ਰਕਮ ਕਿੰਨੀ ਹੋਵੇਗੀ।