ਫੋਰਟ ਸੇਂਟ ਜੌਨ ਆਰ.ਸੀ.ਐਮ.ਪੀ. ਨੇ ਡਰੱਗ ਦੀ ਜਾਂਚ ਦੇ ਸਬੰਧ ਦੋ ਨੌਜਵਾਨਾਂ ਨੂੰ ਕੀਤਾ ਗ੍ਰਿਫਤਾਰ

ਫੋਰਟ ਸੇਂਟ ਜੌਨ ਆਰ.ਸੀ.ਐਮ.ਪੀ. ਨੇ ਡਰੱਗ ਦੀ ਜਾਂਚ ਦੇ ਸਬੰਧ ਵਿਚ 20 ਅਤੇ 21 ਸਾਲ ਦੇ ਦੋ ਨੌਜਵਾਨਾਂ ਨੂੰ ਗ੍ਰਿਫਤਾਰ ਕੀਤਾ। ਇਹ ਕਾਰਵਾਈ ਫੋਰਟ ਸੇਂਟ ਜੌਨ ਦੇ 93 ਐਵੇਨਿਊ ਅਤੇ 100 ਸਟ੍ਰੀਟ ਕੋਲ ਇੱਕ ਹੋਟਲ ਦੇ ਕਮਰੇ ਵਿਚ 15 ਅਗਸਤ ਨੂੰ ਮਾਰੀ ਗਈ ਛਾਪੇਮਾਰੀ ਦੇ ਸਬੰਧ ਵਿਚ ਹੋਈ। ਪੁਲਿਸ ਨੇ ਕਿਹਾ ਕਿ ਜਾਂਚ ਉਦੋਂ ਸ਼ੁਰੂ ਹੋਈ ਜਦੋਂ ਇੱਕ ਸ਼ੱਕੀ ਗੱਡੀ ਨੇ ਹੋਟਲ ਦੇ ਪਾਰਕਿੰਗ ਲਾਟ ਵਿਚ ਪੁਲਿਸ ਨੂੰ ਦੇਖ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ, ਜਿਸ ਦੇ ਨਤੀਜੇ ਵਜੋਂ ਪੁਲਿਸ ਵਾਹਨਾਂ ਅਤੇ ਸ਼ੱਕੀ ਵਾਹਨ ਦੀ ਟੱਕਰ ਹੋਈ, ਜਿਸ ਵਿਚ ਦੋਵਾਂ ਵਾਹਨਾਂ ਨੂੰ ਨੁਕਸਾਨ ਪੁੱਜਾ।

ਸ਼ੱਕੀ ਵਾਹਨ ਦੇ ਅੰਦਰ ਪੁਲਿਸ ਨੂੰ ਡਰੱਗ, ਕਰੰਸੀ ਅਤੇ ਦੋ ਲੋਡ ਕੀਤੀਆਂ ਹੋਈਆਂ ਹੈਂਡਗੰਨ ਮਿਲੀਆਂ, ਜਿਨ੍ਹਾਂ ਵਿਚੋਂ ਇੱਕ ਨੂੰ ਪੂਰੀ ਤਰ੍ਹਾਂ ਆਟੋਮੈਟਿਕ ਵਿਚ ਬਦਲਿਆ ਗਿਆ ਸੀ। ਇਸ ਮਗਰੋਂ ਪੁਲਿਸ ਨੇ ਹੋਟਲ ਦੇ ਉਸ ਕਮਰੇ ਦੀ ਤਲਾਸ਼ੀ ਲਈ, ਜਿੱਥੇ ਉਹ ਠਹਿਰੇ ਹੋਏ ਸਨ ਅਤੇ ਉਥੋਂ ਭਾਰੀ ਮਾਤਰਾ ਵਿਚ ਡਰੱਗ,ਕਰੰਸੀ ਅਤੇ ਤੀਜਾ ਹਥਿਆਰ ਬਰਾਮਦ ਕੀਤਾ।

ਪੁਲਿਸ ਨੇ ਕਿਹਾ ਕਿ ਇਹ ਦੋਵੇਂ ਨੌਜਵਾਨ ਫੋਰਟ ਸੇਂਟ ਜੌਨ ਤੋਂ ਬਾਹਰ ਦੇ ਸਨ ਅਤੇ ਇੱਥੇ ਡਰੱਗ ਤਸਕਰੀ ਦਾ ਧੰਦਾ ਚਲਾ ਰਹੇ ਸਨ। ਪੁਲਿਸ ਨੇ ਕਿਹਾ ਕਿ ਚਾਰਜਿਜ਼ ਦੀ ਪ੍ਰਵਾਨਗੀ ਤੱਕ ਉਨ੍ਹਾਂ ਨੂੰ ਹਿਰਾਸਤ ਤੋਂ ਰਿਹਾਅ ਕੀਤਾ ਗਿਆ ਹੈ।