ਐਲਬਰਟਾ ਦੀ ਤਾਮਾਰਾ ਲਿਚ ਦੀ ਜ਼ਮਾਨਤ ਨੂੰ ਲੈ ਕੇ ਜੱਜ ਨੇ ਸੁਣਾਇਆ ਵੱਡਾ ਫ਼ੈਸਲਾ

ਓਟਾਵਾ ਦੀਆਂ ਸੜਕਾਂ ਨੂੰ ਕਈ ਹਫਤਿਆਂ ਤੱਕ ਬੰਦ ਕਰਨ ਵਾਲੇ ਵਿਰੋਧ ਪ੍ਰਦਰਸ਼ਨ ਨੂੰ ਹਮਾਇਤ ਦੇਣ ਵਾਲੀ ਐਲਬਰਟਾ ਦੀ ਤਾਮਾਰਾ ਲਿਚ ਆਪਣੇ ਟ੍ਰਾਇਲ ਤੱਕ ਜ਼ਮਾਨਤ 'ਤੇ ਰਹੇਗੀ। ਓਂਟਾਰੀਓ ਦੇ ਜੱਜ ਨੇ ਇਹ ਫੈਸਲਾ ਸੁਣਾਇਆ ਹੈ।

ਜੱਜ ਨੇ ਕਿਹਾ ਕਿ ਮੈਡੀਸਨ ਹੈਟ ਦੀ ਤਾਮਾਰਾ ਲਿਚ ਨੇ ਆਪਣੀ ਜ਼ਮਾਨਤ ਦੀਆਂ ਸ਼ਰਤਾਂ ਦੀ ਪਾਲਣਾ ਕੀਤੀ ਹੈ ਅਤੇ ਜੇਲ੍ਹ ਦਾ ਸੁਆਦ ਲਿਆ ਹੈ, ਜਿਸ ਨਾਲ ਉਸ ਦੇ ਮੁੜ ਅਪਰਾਧ ਕਰਨ ਦਾ ਜੋਖਮ ਘੱਟ ਹੈ।

ਜੱਜ ਦਾ ਕਹਿਣਾ ਹੈ ਕਿ ਲਿਚ ਨੇ ਆਪਣੀ ਜ਼ਮਾਨਤ ਦੀਆਂ ਸ਼ਰਤਾਂ ਦੀ ਉਲੰਘਣਾ ਨਹੀਂ ਕੀਤੀ। ਦੱਸ ਦੇਈਏ ਲਿਚ ਨੂੰ ਮਿਸਚੀਫ, ਪੁਲਿਸ ਦੇ ਕੰਮ ਵਿਚ ਰੁਕਾਵਾਟ ਪਾਉਣ, ਧਮਕਾਉਣ ਅਤੇ ਦੂਜਿਆਂ ਨੂੰ ਮਿਸਚੀਫ ਲਈ ਉਕਸਾਉਣ ਦੇ ਦੋਸ਼ਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਗੌਰਤਲਬ ਹੈ ਕਿ ਤਾਮਾਰਾ ਲਿਚ ਨੂੰ ਮਾਰਚ ਵਿਚ ਸ਼ਰਤਾਂ ਦੀ ਇਕ ਲੰਮੀ ਸੂਚੀ ਦੇ ਨਾਲ ਰਿਹਾਅ ਕੀਤਾ ਗਿਆ ਸੀ, ਜਿਸ ਵਿਚ ਉਸ ਨੂੰ ਸਾਰੇ ਸੋਸ਼ਲ ਮੀਡੀਆ ਤੋਂ ਦੂਰ ਰਹਿਣ ਅਤੇ "ਫ੍ਰੀਡਮ ਕੋਨਵੋਇ" ਨਾਲ ਸਬੰਧਤ ਕਿਸੇ ਵੀ ਚੀਜ਼ ਦਾ ਸਮਰਥਨ ਨਾ ਕਰਨ" ਦਾ ਆਦੇਸ਼ ਸ਼ਾਮਲ ਸੀ।