15C Vancouver 15C VancouverAug 24, 2020 4:43 PM -
ਫ਼ੈਡਰਲ ਸਰਕਾਰ ਦੇ ਦੋ ਕੈਬਿਨੇਟ ਮੰਤਰੀਆਂ ਦਾ ਕਹਿਣਾ ਹੈ ਕਿ ਉਹ ਇਰਾਨ ਦੇ ਅਧਿਕਾਰੀਆਂ ਵੱਲੋਂ ਯੂਕਰੇਨੀਅਨ ਏਅਰਲਾਈਨ ਦੀ ਫ਼ਲਾਈਟ 752 ਦੇ ਹਾਦਸਾਗ੍ਰਸਤ ਹੋਣ ਬਾਰੇ ਵਧੇਰੇ ਜਾਣਕਾਰੀ ਉਪਲੱਬਧ ਕਰਾਏ ਜਾਣ ਦੀ ਉਮੀਦ ਕਰਦੇ ਹਨ।
ਟਰਾਂਸਪੋਰਟ ਮਿਨਿਸਟਰ ਮਾਰਕ ਗਾਰਨੋ ਅਤੇ ਫ਼ੌਰਨ ਅਫ਼ੇਅਰਜ਼ ਮਿਨਿਸਟਰ ਫ਼੍ਰਾਂਸੂਆ ਫ਼ੀਲੀਪ ਸ਼ੈਂਪੇਨ ਦੇ ਮੁਤਾਬਕ ਇਰਾਨ ਵੱਲੋਂ ਜਾਰੀ ਕੀਤੀ ਗਈ ਮੁੱਢਲੀ ਰੀਪੋਰਟ ਵਿੱਚ ਜਹਾਜ਼ ਦੇ ਡਾਟਾ ਰਿਕਾਰਡਰਾਂ ਵਿੱਚੋਂ ਮਿਲੀ ਜਾਣਕਾਰੀ ਦੇ ਸੀਮਤ ਅਤੇ ਚੋਣਵੇਂ ਅੰਸ਼ ਹੀ ਸਾਂਝੇ ਕੀਤੇ ਗਏ ਹਨ।
ਇਹ ਜਹਾਜ਼ 8 ਜਨਵਰੀ ਨੂੰ ਤਹਿਰਾਨ ਦੇ ਮੁੱਖ ਏਅਰਪੋਰਟ ਤੋਂ ਉਡਾਣ ਭਰਨ ਤੋਂ ਕੁਝ ਹੀ ਮਿੰਟਾਂ ਬਾਅਦ, ਮਿਜ਼ਾਈਲ ਹਮਲੇ ਦਾ ਸ਼ਿਕਾਰ ਹੋ ਗਿਆ ਸੀ।
ਉਸੇ ਰਾਤ ਇਰਾਨ ਵੱਲੋਂ ਇਰਾਕ ਵਿਚ ਅਮਰੀਕੀ ਮਿਲਿਟਰੀ ਬੇਸ 'ਤੇ ਮਿਜ਼ਾਈਲ ਹਮਲਾ ਵੀ ਕੀਤਾ ਗਿਆ ਸੀ।
ਜਹਾਜ਼ ਵਿੱਚ ਸਵਾਰ ਸਾਰੇ 176 ਯਾਤਰੀ ਮਾਰੇ ਗਏ ਸਨ, ਜਿਨ੍ਹਾਂ ਵਿੱਚ 55 ਕਨੇਡੀਅਨ ਅਤੇ 30 ਪਰਮਾਨੈਂਟ ਰੈਜ਼ੀਡੈਂਟ ਸ਼ਾਮਲ ਸਨ।
ਦੋਨਾਂ ਮੰਤਰੀਆਂ ਵੱਲੋਂ ਜਾਰੀ ਸੰਯੁਕਤ ਬਿਆਨ ਦੇ ਮੁਤਾਬਕ, ਇਰਾਨ ਵੱਲੋਂ ਮੁਹੱਈਆ ਕਰਵਾਈ ਗਈ ਰਿਪੋਰਟ ਵਿੱਚ ਸਿਰਫ਼ ਇਸੇ ਗੱਲ ਦਾ ਜ਼ਿਕਰ ਹੈ ਕਿ ਜਹਾਜ਼ ਵਿੱਚ ਪਹਿਲੀ ਮਿਜ਼ਾਈਲ ਵੱਜਣ ਤੋਂ ਬਾਅਦ ਕੀ ਵਾਪਰਿਆ, ਅਤੇ ਉਸ ਵਿੱਚ ਦੂਸਰੀ ਮਿਜ਼ਾਈਲ ਦਾ ਕੋਈ ਜ਼ਿਕਰ ਨਹੀਂ ਹੈ।
