15.32C Vancouver 15.32C VancouverFeb 2, 2026 5:26 PM - Connect Newsroom - Ramandeep Kaur with files from The Canadian Press.
ਗਾਜ਼ਾ ਅਤੇ ਮਿਸਰ ਦਰਮਿਆਨ ਸਥਿਤ ਰਫਾਹ ਬਾਰਡਰ ਕਰਾਸਿੰਗ ਨੂੰ ਲੋਕਾਂ ਦੀ ਆਵਾਜਾਈ ਲਈ ਮੁੜ ਖੋਲ੍ਹ ਦਿੱਤਾ ਗਿਆ ਹੈ। ਸੋਮਵਾਰ ਤੋਂ ਫ਼ਲਸਤੀਨੀ ਲੋਕਾਂ ਨੇ ਇਸ ਰਸਤੇ ਆਉਣਾ-ਜਾਣਾ ਸ਼ੁਰੂ ਕਰ ਦਿੱਤਾ ਹੈ। ਗਾਜ਼ਾ ਵਿੱਚ ਇਸਰਾਈਲੀ ਫੌਜ ਦੇ ਕਬਜ਼ੇ ਤੋਂ ਬਾਅਦ ਇਹ ਕਰਾਸਿੰਗ ਮਈ 2024 ਤੋਂ ਲਗਭਗ ਪੂਰੀ ਤਰ੍ਹਾਂ ਬੰਦ ਸੀ।
ਰਫਾਹ ਕਰਾਸਿੰਗ ਦੇ ਖੁੱਲ੍ਹਣ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਵੱਲੋਂ ਇਸਰਾਈਲ ਅਤੇ ਹਮਾਸ ਵਿਚਕਾਰ ਜੰਗਬੰਦੀ ਲਾਗੂ ਕਰਨ ਦੀ ਯੋਜਨਾ ਦਾ ਪਹਿਲਾ ਅਤੇ ਸਾਰਥਕ ਕਦਮ ਮੰਨਿਆ ਜਾ ਰਿਹਾ ਹੈ। ਫਿਲਹਾਲ ਲਈ ਇਸ ਰਸਤੇ ਤੋਂ ਥੋੜ੍ਹੀ ਗਿਣਤੀ ਵਿੱਚ ਲੋਕਾਂ ਨੂੰ ਆਵਾਜਾਈ ਦੀ ਇਜਾਜ਼ਤ ਮਿਲੇਗੀ ਅਤੇ ਕਿਸੇ ਵੀ ਕਿਸਮ ਦੇ ਸਮਾਨ ਨੂੰ ਲਿਜਾਣ ਦੀ ਮਨਾਹੀ ਹੋਵੇਗੀ।
ਇਸ ਦੇ ਨਾਲ ਹੀ ਜੰਗ ਦੌਰਾਨ ਗਾਜ਼ਾ ਤੋਂ ਬਾਹਰ ਗਏ 50 ਫ਼ਲਸਤੀਨੀਆਂ ਨੂੰ ਰੋਜ਼ਾਨਾ ਵਾਪਸੀ ਦੀ ਇਜਾਜ਼ਤ ਦਿੱਤੀ ਜਾਵੇਗੀ। ਸਥਾਨਕ ਹਸਪਤਾਲਾਂ ਅਤੇ ਡਬਲਊ.ਐਚ.ਓ.ਮੁਤਾਬਕ ਲਗਭਗ 20 ਹਜ਼ਾਰ ਬਿਮਾਰ ਅਤੇ ਜ਼ਖ਼ਮੀ ਫ਼ਲਸਤੀਨੀ ਇਲਾਜ ਲਈ ਗਾਜ਼ਾ ਤੋਂ ਬਾਹਰ ਜਾਣ ਦੀ ਉਡੀਕ ਕਰ ਰਹੇ ਹਨ। ਦੱਸ ਦੇਈਏ ਕਿ ਇਸਰਾਈਲ ਵੱਲੋਂ ਆਖਰੀ ਇਸਰਾਈਲੀ ਬੰਧਕ ਦੀ ਲਾਸ਼ ਵਾਪਸ ਮਿਲਣ ਤੱਕ ਇਸ ਕਰਾਸਿੰਗ ਨੂੰ ਖੋਲਣ ਦੇ ਫੈਸਲੇ ਨੂੰ ਰੋਕ ਕੇ ਰੱਖਿਆ ਗਿਆ ਸੀ।
