ਕੈਨੇਡਾ ਲਈ ਮਾਣ ਵਾਲਾ ਪਲ, ਨਾਸਾ ਦੇ ਚੰਦਰਮਾ ਮਿਸ਼ਨ ਜਾ ਰਹੇ ਨੇ ਜੇਰੇਮੀ ਹੈਨਸਨ

ਕੈਨੇਡਾ ਲਈ ਮਾਣ ਵਾਲਾ ਪਲ ਹੈ, ਨਾਸਾ ਦੇ ਚੰਦਰਮਾ ਦੇ ਕਰੀਬ ਜਾਣ ਵਾਲੇ ਆਰਟਿਮਿਸ II ਮਿਸ਼ਨ ਵਿਚ ਕੈਨੇਡੀਅਨ ਪੁਲਾੜ ਯਾਤਰੀ ਜੇਰੇਮੀ ਹੈਨਸਨ ਵੀ ਸ਼ਾਮਲ ਹਨ। ਪੂਰੀ ਦੁਨੀਆ ਦੀਆਂ ਨਜ਼ਰਾਂ ਅੱਜ ਫਲੋਰੀਡਾ ਦੇ ਕੈਨੇਡੀ ਸਪੇਸ ਸੈਂਟਰ, 'ਤੇ ਟਿਕੀਆਂ ਹੋਈਆਂ ਹਨ, ਜਿੱਥੇ ਨਾਸਾ ਆਪਣੇ ਇਤਿਹਾਸਕ ਆਰਟਿਮਿਸ II ਮਿਸ਼ਨ ਦੀਆਂ ਅੰਤਿਮ ਤਿਆਰੀਆਂ ਵਿਚ ਜੁਟਿਆ ਹੋਇਆ ਹੈ।

ਅਪੋਲੋ ਮਿਸ਼ਨ ਦੇ 50 ਸਾਲਾਂ ਤੋਂ ਵੱਧ ਸਮੇਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ ਇਨਸਾਨਾਂ ਨੂੰ ਚੰਦਰਮਾ ਦੇ ਔਰਬਿਟ ਵਿਚ ਭੇਜਿਆ ਜਾ ਰਿਹਾ ਹੈ। ਇਸ 10 ਦਿਨਾਂ ਦੇ ਮਿਸ਼ਨ ਵਿਚ ਚਾਰ ਪੁਲਾੜ ਯਾਤਰੀ ਸ਼ਾਮਲ ਹਨ, ਜਿਨ੍ਹਾਂ ਵਿਚ ਕੈਨੇਡੀਅਨ ਪੁਲਾੜ ਯਾਤਰੀ ਜੇਰੇਮੀ ਹੈਨਸਨ ਚੰਦਰਮਾ ਤੱਕ ਪਹੁੰਚਣ ਵਾਲੇ ਪਹਿਲੇ ਕੈਨੇਡੀਅਨ ਬਣ ਕੇ ਇਤਿਹਾਸ ਰਚਣਗੇ। ਉਨ੍ਹਾਂ ਨਾਲ ਅਮਰੀਕੀ ਪੁਲਾੜ ਯਾਤਰੀ ਰੀਡ ਵਾਈਜ਼ਮੈਨ, ਕ੍ਰਿਸਟੀਨਾ ਕੋਚ ਅਤੇ ਵਿਕਟਰ ਗਲੋਵਰ ਹਨ। ਇਹ ਚਾਰੇ ਯਾਤਰੀ ਚੰਦਰਮਾ 'ਤੇ ਉਤਰਨਗੇ ਨਹੀਂ ਬਲਕਿ ਇਸ ਦੇ ਦੁਆਲੇ ਚੱਕਰ ਲਗਾਉਣਗੇ।

ਇਹ ਮਿਸ਼ਨ ਇਨਸਾਨਾਂ ਨੂੰ ਧਰਤੀ ਤੋਂ ਉਸ ਦੂਰੀ ਤੱਕ ਲੈ ਜਾਵੇਗਾ ਜਿੱਥੇ ਪਹਿਲਾਂ ਕੋਈ ਨਹੀਂ ਪਹੁੰਚਿਆ। ਇਹ ਸਾਰਾ ਸਫ਼ਰ ਇੱਕ ਮਿਨੀਬੱਸ ਦੇ ਸਾਈਜ਼ ਦੇ ਕੈਪਸੂਲ ਵਿਚ ਤੈਅ ਕੀਤਾ ਜਾਵੇਗਾ। ਫਲੋਰੀਡਾ ਦੇ ਸਥਾਨਕ ਸਮੇਂ ਅਨੁਸਾਰ, ਇਹ ਮਿਸ਼ਨ ਸ਼ਾਮ 6:20 ਵਜੇ ਲੌਂਚ ਹੋਣ ਦੀ ਉਮੀਦ ਹੈ।