ਹਰਮਨ ਭੰਗੂ ਨੇ ਬੀ.ਸੀ. ਕੰਜ਼ਰਵੇਟਿਵ ਪਾਰਟੀ ਦੀ ਲੀਡਰਸ਼ਿਪ ਦੌੜ 'ਚ ਸ਼ਾਮਲ ਹੋਣ ਦੇ ਦਿੱਤੇ ਸੰਕੇਤ

ਬੀ.ਸੀ. ਕੰਜ਼ਰਵੇਟਿਵ ਦੇ ਉੱਘੇ ਆਗੂ ਅਤੇ ਵਿਧਾਇਕ ਹਰਮਨ ਭੰਗੂ ਨੇ ਪਾਰਟੀ ਦੀ ਅਗਵਾਈ ਕਰਨ ਲਈ ਆਪਣੀ ਦਿਲਚਸਪੀ ਜ਼ਾਹਰ ਕੀਤੀ ਹੈ। ਭੰਗੂ ਨੇ ਕਿਹਾ ਹੈ ਕਿ ਇਸ ਗੱਲ ਦੀ ਪੂਰੀ ਸੰਭਾਵਨਾ ਹੈ ਕਿ ਉਹ ਪਾਰਟੀ ਲੀਡਰਸ਼ਿਪ ਦੀ ਦੌੜ ਵਿਚ ਸ਼ਾਮਲ ਹੋ ਸਕਦੇ ਹਨ।ਐਬਟਸਫੋਰਡ-ਲੈਂਗਲੀ ਤੋਂ ਐਮ.ਐਲ.ਏ. ਅਤੇ ਸਾਬਕਾ ਟਰੱਕਰ ਨੇ ਕਿਹਾ ਕਿ ਉਹ ਆਪਣਾ ਅੰਤਿਮ ਫੈਸਲਾ ਨਵੇਂ ਸਾਲ ਦੇ ਦੂਜੇ ਜਾਂ ਤੀਜੇ ਹਫ਼ਤੇ ਆਉਣ ਵਾਲੇ ਨਿਯਮਾਂ ਨੂੰ ਦੇਖਣ ਤੋਂ ਬਾਅਦ ਲੈਣਗੇ।

ਉਨ੍ਹਾਂ ਕਿਹਾ ਕਿ ਜੇਕਰ ਨਿਯਮ ਪਾਰਦਰਸ਼ੀ ਲੱਗੇ ਅਤੇ ਮੈਨੂੰ ਯਕੀਨ ਹੋਇਆ ਕਿ ਇਹ ਇੱਕ ਇਮਾਨਦਾਰ ਦੌੜ ਹੋਵੇਗੀ ਤਾਂ ਮੈਂ ਜ਼ਰੂਰ ਆਪਣਾ ਨਾਮ ਅੱਗੇ ਰੱਖਾਂਗਾ। ਜ਼ਿਕਰਯੋਗ ਹੈ ਕਿ ਭੰਗੂ ਨੇ ਪਹਿਲਾਂ ਆਪਣੇ ਦੋਸਤ ਅਤੇ ਫੈਡਰਲ ਐੱਮ.ਪੀ.ਐਰੋਨ ਗਨ ਦੇ ਲੀਡਰਸ਼ਿਪ ਚੋਣ ਲੜਨ ਦੀ ਸੰਭਾਵਨਾ ਕਾਰਨ ਪਿੱਛੇ ਹਟਣ ਦਾ ਫੈਸਲਾ ਕੀਤਾ ਸੀ ਪਰ ਗਨ ਨੇ ਹਾਲ ਹੀ ਵਿਚ ਇਹ ਸਾਫ ਕਰ ਦਿੱਤਾ ਕਿ ਉਹ ਫੈਡਰਲ ਰਾਜਨੀਤੀ ਵਿਚ ਹੀ ਰਹਿਣਗੇ, ਜਿਸ ਮਗਰੋਂ ਹਰਮਨ ਭੰਗੂ ਨੇ ਬੀ.ਸੀ. ਕੰਜ਼ਰਵੇਟਿਵ ਦੀ ਲੀਡਰਿਸ਼ਪ ਚੋਣ ਲੜਨ ਦਾ ਵਿਚਾਰ ਅੱਗੇ ਕੀਤਾ ਹੈ।​

ਫਿਲਹਾਲ ਕਿਸੇ ਵੀ ਸੰਭਾਵੀ ਉਮੀਦਵਾਰ ਨੇ ਅਧਿਕਾਰਤ ਤੌਰ 'ਤੇ ਇਸ ਦੌੜ ਵਿਚ ਸ਼ਾਮਲ ਹੋਣ ਦਾ ਐਲਾਨ ਨਹੀਂ ਕੀਤਾ ਹੈ ਪਰ ਸਾਬਕਾ ਗ੍ਰੋਸਰੀ ਐਗਜ਼ੀਕਿਊਟਿਵ ਡੈਰੇਲ ਜੋਨਸ, ਵਿਧਾਇਕ ਪੀਟਰ ਮਿਲੋਬਾਰ ਅਤੇ ਫੈਡਰਲ ਕੰਜ਼ਰਵੇਟਿਵ ਐਮਪੀ ਕੈਰੀ-ਲਿਨ ਫਿੰਡਲੇ ਵਰਗੇ ਵੱਡੇ ਨਾਮ ਇਸ ਦੌੜ ਵਿਚ ਸ਼ਾਮਲ ਹੋ ਸਕਦੇ ਹਨ।