ਬੀ.ਸੀ.ਸਰਕਾਰ ਨੇ ਨਸ਼ਿਆਂ ਦੀ ਡੀਕ੍ਰਿਮਿਨਲਾਈਜ਼ੇਸ਼ਨ ਪਾਇਲਟ ਪ੍ਰੋਜੈਕਟ ਨੂੰ ਖਤਮ ਕਰਨ ਦਾ ਕੀਤਾ ਫੈਸਲਾ

ਬੀ.ਸੀ.ਸਰਕਾਰ ਨੇ ਇੱਕ ਅਹਿਮ ਐਲਾਨ ਕਰਦਿਆਂ ਨਸ਼ਿਆਂ ਦੀ ਨਿੱਜੀ ਵਰਤੋਂ ਨੂੰ ਲੈ ਚੱਲ ਰਹੇ ਵਿਵਾਦਤ ਡੀਕ੍ਰਿਮਿਨਲਾਈਜ਼ੇਸ਼ਨ ਪਾਇਲਟ ਪ੍ਰੋਜੈਕਟ ਨੂੰ ਖ਼ਤਮ ਕਰਨ ਦਾ ਫੈਸਲਾ ਕੀਤਾ ਹੈ। ਸਿਹਤ ਮੰਤਰੀ ਜੋਸੀ ਓਸਬੋਰਨ ਨੇ ਕਿਹਾ ਕਿ ਇਹ ਪ੍ਰੋਜੈਕਟ 31 ਜਨਵਰੀ ਨੂੰ ਖ਼ਤਮ ਹੋ ਜਾਵੇਗਾ।

ਇਹ ਪ੍ਰੋਜੈਕਟ ਨਸ਼ੇ ਦੀ ਦਲਦਲ ਵਿਚ ਫਸੇ ਲੋਕਾਂ ਦੀ ਮਦਦ ਲਈ ਸ਼ੁਰੂ ਕੀਤਾ ਗਿਆ ਸੀ ਪਰ ਜਨਤਕ ਥਾਵਾਂ 'ਤੇ ਵੱਧ ਰਹੀ ਅਰਾਜਕਤਾ ਤੇ ਓਵਰਡੋਜ਼ ਕਾਰਨ ਹੋ ਰਹੀਆਂ ਮੌਤਾਂ ਦੇ ਮੱਦੇਨਜ਼ਰ ਇਸ ਨੂੰ ਅੱਗੇ ਨਾ ਵਧਾਉਣ ਦਾ ਫੈਸਲਾ ਲਿਆ ਗਿਆ ਹੈ।

ਮੰਤਰੀ ਨੇ ਕਬੂਲਿਆ ਕਿ ਜਿਸ ਮਕਸਦ ਲਈ ਡਰੱਗਜ਼ ਨੂੰ ਕਾਨੂੰਨੀ ਦਾਇਰੇ ਤੋਂ ਬਾਹਰ ਰੱਖਿਆ ਗਿਆ ਸੀ ਉਹ ਲੋੜੀਂਦੇ ਨਤੀਜੇ ਨਹੀਂ ਮਿਲ ਸਕੇ। ਸੂਬਾ ਸਰਕਾਰ ਹੁਣ ਛੋਟ ਦੇਣ ਦੀ ਬਜਾਏ ਪੀੜਤਾਂ ਦੇ ਮੁਕੰਮਲ ਇਲਾਜ ਅਤੇ ਸਖ਼ਤ ਨਿਗਰਾਨੀ ਵਾਲੇ ਮਾਡਲ ਵੱਲ ਵਾਪਸੀ ਕਰਨ ਦੀ ਤਿਆਰੀ ਵਿਚ ਹੈ।

ਗੌਰਤਲਬ ਹੈ ਕਿ ਵਿਰੋਧੀ ਧਿਰ ਨੇ ਇਸ ਨੀਤੀ ਨੂੰ ਅਸਫਲ ਕਰਾਰ ਦਿੱਤਾ ਸੀ। ਬੀ.ਸੀ. ਵਿਚ ਇਹ ਪ੍ਰੋਜੈਕਟ ਜਨਵਰੀ 2023 ਵਿਚ ਸ਼ੁਰੂ ਹੋਇਆ ਸੀ,ਫੈਡਰਲ ਸਰਕਾਰ ਨੇ ਸੂਬੇ ਦੀ ਬੇਨਤੀ 'ਤੇ 2.5 ਗ੍ਰਾਮ ਤੱਕ ਓਪੀਔਡਜ਼, ਕਰੈਕ, ਕੋਕੇਨ, ਮੈਥਾਮਫੇਟਾਮਾਈਨ ਅਤੇ ਐਮ.ਡੀ.ਐਮ.ਏ. ਰੱਖਣ ਦੀ ਖੁੱਲ੍ਹ ਦਿੱਤੀ ਸੀ। ਜਨਤਕ ਥਾਵਾਂ 'ਤੇ ਨਸ਼ਿਆਂ ਦੀ ਵਰਤੋਂ ਨੂੰ ਲੈ ਕੇ ਹੋਏ ਵਿਰੋਧ ਤੋਂ ਬਾਅਦ 2024 ਵਿਚ ਨਿਯਮ ਸਖ਼ਤ ਕਰ ਦਿੱਤੇ ਗਏ ਸਨ, ਇਸ ਤਹਿਤ ਨਸ਼ਾ ਰੱਖਣ ਦੀ ਇਜਾਜ਼ਤ ਸਿਰਫ਼ ਨਿੱਜੀ ਘਰਾਂ, ਸ਼ੈਲਟਰ ਅਤੇ ਮਨਜ਼ੂਰਸ਼ੁਦਾ ਹੈਲਥ ਕਲੀਨਿਕਸ ਤੱਕ ਸੀਮਤ ਕਰ ਦਿੱਤੀ ਗਈ ਸੀ।