14.04C Vancouver 14.04C VancouverJul 21, 2026 4:44 PM - Connect Newsroom - Ramandeep Kaur with files from The Canadian Press
ਬੀ.ਸੀ. ਦੇ ਕਈ ਇਲਾਕਿਆਂ ਵਿਚ ਰੋਜ਼ਾਨਾ ਤਾਪਮਾਨ ਦੇ ਪੁਰਾਣੇ ਰਿਕਾਰਡ ਟੁੱਟਣ ਤੋਂ ਬਾਅਦ ਹੁਣ ਸੂਬੇ ਦੇ ਜ਼ਿਆਦਾਤਰ ਦੱਖਣੀ ਅਤੇ ਤੱਟਵਰਤੀ ਅੰਦਰੂਨੀ ਹਿੱਸਿਆਂ ਵਿਚ ਗਰਮੀ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ। ਇਨਵਾਇਰਮੈਂਟ ਕੈਨੇਡਾ ਅਨੁਸਾਰ ਵੈਨਕੂਵਰ ਆਈਲੈਂਡ ਦੇ ਈਸਟ ਕੋਸਟ, ਵਿਸਲਰ ਅਤੇ ਫਰੇਜ਼ਰ ਵੈਲੀ ਨੂੰ ਕਵਰ ਕਰਨ ਵਾਲੀਆਂ ਇਹ ਚਿਤਾਵਨੀਆਂ ਬੁੱਧਵਾਰ ਤੱਕ ਜਾਰੀ ਰਹਿਣ ਦੀ ਉਮੀਦ ਹੈ, ਜਦੋਂ ਕਿ ਅੰਦਰੂਨੀ ਇਲਾਕਿਆਂ ਲਈ ਇਹ ਚਿਤਾਵਨੀ ਵੀਰਵਾਰ ਤੱਕ ਲਾਗੂ ਰਹਿ ਸਕਦੀ ਹੈ।
ਵਿਭਾਗ ਨੇ ਦੱਸਿਆ ਕਿ ਤੱਟਵਰਤੀ ਇਲਾਕਿਆਂ ਵਿਚ ਤਾਪਮਾਨ 30 ਡਿਗਰੀ ਤੋਂ ਪਾਰ ਜਾਣ ਦੀ ਸੰਭਾਵਨਾ ਹੈ, ਜਦੋਂ ਕਿ southern Interior ਅਤੇ ਫਰੇਜ਼ਰ ਵੈਲੀ ਵਿਚ ਪਾਰਾ 35 ਡਿਗਰੀ ਸੈਲਸੀਅਸ ਦੇ ਆਸ-ਪਾਸ ਤੱਕ ਪਹੁੰਚ ਸਕਦਾ ਹੈ। ਗਰਮੀ ਦੀ ਇਸ ਮੌਜੂਦਾ ਲਹਿਰ ਕਾਰਨ ਸੋਮਵਾਰ ਨੂੰ ਸੂਬੇ ਦੇ 4 ਇਲਾਕਿਆਂ ਕਿਟੀਮਤ, ਡੀਜ਼ ਲੇਕ, ਸੇਚੇਲਟ ਅਤੇ ਸਕੁਆਮਿਸ਼ ਵਿਚ ਰੋਜ਼ਾਨਾ ਤਾਪਮਾਨ ਦੇ ਨਵੇਂ ਰਿਕਾਰਡ ਬਣੇ ਹਨ।
ਇਸ ਦੌਰਾਨ ਬ੍ਰਿਟਿਸ਼ ਕੋਲੰਬੀਆ ਅਤੇ ਕੈਨੇਡਾ ਵਿਚ ਸਭ ਤੋਂ ਵੱਧ ਤਾਪਮਾਨ ਲਿਟਨ ਵਿਚ 36.3 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਇਸ ਗਰਮੀ ਦੇ ਮੱਦੇਨਜ਼ਰ ਬੀ.ਸੀ. ਹਾਈਡ੍ਰੋ ਦਾ ਅਨੁਮਾਨ ਹੈ ਕਿ ਏ.ਸੀ. ਦੀ ਵੱਧ ਰਹੀ ਵਰਤੋਂ ਕਾਰਨ ਇਸ ਹਫ਼ਤੇ ਸੂਬੇ ਵਿਚ ਬਿਜਲੀ ਦੀ ਖਪਤ ਹੁਣ ਤੱਕ ਦੇ ਸਭ ਤੋਂ ਉੱਚੇ ਪੱਧਰ 'ਤੇ ਪਹੁੰਚ ਸਕਦੀ ਹੈ।
