ਬੀ.ਸੀ.ਦੇ ਨੌਰਥ ਕੋਸਟ ਵਿਚ ਪਿਛਲੇ ਦਿਨ ਹੋਈ ਭਾਰੀ ਬਾਰਸ਼ ਕਾਰਨ ਜਨ-ਜੀਵਨ ਹੋਇਆ ਪ੍ਰਭਾਵਿਤ

ਬੀ.ਸੀ.ਦੇ ਨੌਰਥ ਕੋਸਟ ਵਿਚ ਪਿਛਲੇ ਦਿਨ ਹੋਈ ਭਾਰੀ ਬਾਰਸ਼ ਨੇ ਜਨ-ਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ।ਪ੍ਰਿੰਸ ਰੂਪਰਟ ਵਿਚ 200 ਮਿਲੀਮੀਟਰ ਤੋਂ ਵੱਧ ਬਾਰਸ਼ ਪੈਣ ਕਾਰਨ ਸ਼ਹਿਰ ਨੂੰ ਟੈਰਸ ਸਮੇਤ ਈਸਟ ਵਿਚ ਬਾਕੀ ਕਮਿਊਨਿਟੀ ਨਾਲ ਜੋੜਨ ਵਾਲੇ ਹਾਈਵੇ 16 ਨੂੰ ਹੜ੍ਹ ਕਾਰਨ ਦੋਵਾਂ ਪਾਸਿਆਂ ਤੋਂ ਬੰਦ ਕਰਨਾ ਪਿਆ ਹੈ।

ਇਨਵਾਇਰਮੈਂਟ ਕੈਨੇਡਾ ਮੁਤਾਬਕ, ਵੈਨਕੂਵਰ ਤੋਂ ਲਗਭਗ 750 ਕਿਲੋਮੀਟਰ ਦੂਰ ਸਥਿਤ ਪ੍ਰਿੰਸ ਰੂਪਰਟ ਵਿਚ ਸੋਮਵਾਰ ਨੂੰ 203 ਮਿਲੀਮੀਟਰ ਬਾਰਸ਼ ਦਰਜ ਕੀਤੀ ਗਈ। ਇਸ ਦੇ ਨਾਲ ਹੀ ਗ੍ਰੀਨ ਆਈਲੈਂਡ ਲਾਈਟਹਾਊਸ ਵਿਚ 180 ਮਿਲੀਮੀਟਰ ਬਾਰਸ਼ ਹੋਈ, ਜਦੋਂ ਕਿ ਹੈਡਾ ਗਵਾਈ ਦੇ ਇੱਕ ਸਟੇਸ਼ਨ 'ਤੇ ਇਹ 148 ਮਿਲੀਮੀਟਰ ਦਰਜ ਕੀਤੀ ਗਈ।

ਇਸ ਤੋਂ ਇਲਾਵਾ ਹੈਡਾ ਗਵਾਈ ਵਿਚ ਸਕਾਈਡਗੇਟ ਦੇ ਉੱਤਰ ਵੱਲ ਹਾਈਵੇ 16 ਦਾ ਇੱਕ ਹਿੱਸਾ ਪਾਣੀ ਵਿਚ ਰੁੜ੍ਹ ਗਿਆ। ਇਸ ਕਾਰਨ ਸਕਾਈਡਗੇਟ ਅਤੇ ਮੈਸੇਟ ਵਿਚਕਾਰ ਸੰਪਰਕ ਟੁੱਟ ਗਿਆ ਹੈ। ਮੌਸਮ ਵਿਭਾਗ ਨੇ ਕਿਹਾ ਕਿ ਕਿਟੀਮੈਟ ਅਤੇ ਨੇੜਲੇ ਖੇਤਰਾਂ ਵਿਚ ਅਜੇ ਵੀ ਬਾਰਸ਼ ਦਾ ਅਲਰਟ ਲਾਗੂ ਹੈ ਅਤੇ ਅੰਦਾਜ਼ਾ ਹੈ ਕਿ ਪਿਛਲੇ ਤਿੰਨ ਦਿਨਾਂ ਵਿਚ ਹੋਈ ਕੁੱਲ ਬਾਰਸ਼ ਦੀ ਮਾਤਰਾ 120 ਮਿਲੀਮੀਟਰ ਤੱਕ ਪਹੁੰਚ ਸਕਦੀ ਹੈ।