ਬਰਨਬੀ ਵਿੱਚ ਹਾਈ ਰਿਸਕ ਡਰਾਈਵਿੰਗ ਇਨਫੋਰਸਮੈਂਟ ਨੇ 170 ਡਰਾਈਵਰਾਂ 'ਤੇ ਕੀਤੀ ਕਾਰਵਾਈ

ਬਰਨਬੀ ਪੁਲਿਸ ਨੇ ਮਈ ਮਹੀਨੇ ਦੌਰਾਨ ਹਾਈ ਰਿਸਕ ਡਰਾਈਵਿੰਗ ਮੁਹਿੰਮ ਦੇ ਹਿੱਸੇ ਵਜੋਂ ਸਪੀਡਿੰਗ ਦੇ ਮਾਮਲੇ ਵਿਚ 170 ਡਰਾਈਵਰਾਂ 'ਤੇ ਕਾਰਵਾਈ ਕੀਤੀ ਹੈ। ਪੁਲਿਸ ਅਨੁਸਾਰ,ਇਹ ਕਾਰਵਾਈ ਵੱਖ-ਵੱਖ ਥਾਵਾਂ ਅਤੇ ਦਿਨ ਦੇ ਵੱਖ-ਵੱਖ ਸਮਿਆਂ 'ਤੇ ਕੀਤੀ ਗਈ। ਇਹ ਸਾਰੇ ਡਰਾਈਵਰ ਤੈਅ ਸਪੀਡ ਲਿਮਿਟ ਤੋਂ 40 ਕਿਲੋਮੀਟਰ ਪ੍ਰਤੀ ਘੰਟਾ ਤੋਂ ਵੀ ਵੱਧ ਦੀ ਰਫ਼ਤਾਰ ਨਾਲ ਗੱਡੀ ਚਲਾ ਰਹੇ ਸਨ।

ਨਤੀਜੇ ਵਜੋਂ,ਇਨ੍ਹਾਂ ਦੀਆਂ ਗੱਡੀਆਂ ਨੂੰ 7 ਦਿਨਾਂ ਲਈ ਇੰਪਾਊਂਡ ਕਰ ਲਿਆ ਗਿਆ ਅਤੇ ਹਰੇਕ ਡਰਾਈਵਰ ਨੂੰ $368 ਦੀ ਉਲੰਘਣਾ ਟਿਕਟ ਵੀ ਜਾਰੀ ਕੀਤੀ ਗਈ। ਇੱਕ ਮਾਮਲੇ ਵਿੱਚ 19 ਸਾਲਾ ਨਵਾਂ ਡਰਾਈਵਰ 50 ਕਿਲੋਮੀਟਰ ਪ੍ਰਤੀ ਘੰਟਾ ਵਾਲੇ ਜ਼ੋਨ ਵਿੱਚ 146 ਕਿਲੋਮੀਟਰ ਦੀ ਰਫ਼ਤਾਰ ਨਾਲ ਗੱਡੀ ਭਜਾ ਰਿਹਾ ਸੀ।

ਬਰਨਬੀ ਆਰ.ਸੀ.ਐਮ.ਪੀ.ਦੀ ਟ੍ਰੈਫ਼ਿਕ ਸਰਵਿਸ ਦੇ ਸਾਰਜੈਂਟ ਗੈਰੀ ਜੌਹਲ ਨੇ ਇਸ ਘਟਨਾ ਬਾਰੇ ਦੱਸਿਆ ਕਿ ਜਦੋਂ ਪੁਲਿਸ ਨੇ ਉਸ ਨੂੰ ਰੋਕਣ ਦਾ ਇਸ਼ਾਰਾ ਕੀਤਾ ਤਾਂ ਟੱਕਰ ਤੋਂ ਬਚਣ ਲਈ ਔਫੀਸਰ ਨੂੰ ਛਾਲ ਮਾਰ ਕੇ ਪਾਸੇ ਹੋਣਾ ਪਿਆ। ਕਈ ਡਰਾਈਵਰ ਆਪਣੇ ਪਰਿਵਾਰਕ ਮੈਂਬਰਾਂ ਦੀਆਂ ਗੱਡੀਆਂ ਚਲਾ ਰਹੇ ਸਨ, ਜਿਸ ਕਾਰਨ ਗਲਤੀ ਉਨ੍ਹਾਂ ਦੀ ਸੀ ਪਰ ਗੱਡੀਆਂ ਜ਼ਬਤ ਉਨ੍ਹਾਂ ਦੇ ਪਰਿਵਾਰ ਦੀਆਂ ਹੋਈਆਂ।