12.25C Vancouver 12.25C VancouverDec 3, 2021 1:56 AM - The Canadian Press
ਹਾਈਵੇਅ 1 'ਤੇ ਫਿਰ ਤੋਂ ਆਵਾਜਾਈ ਸ਼ੁਰੂ ਹੋ ਗਈ ਹੈ।
ਹਾਈਵੇਅ 1 ਨੂੰ ਐਬਟਸਫੋਰਡ ਅਤੇ ਚਿਲਿਵੈਕ ਵਿਚਾਲੇ ਖੋਲ ਦਿੱਤਾ ਗਿਆ ਹੈ।
ਹੁਣ ਇਹ ਰਸਤਾ ਵੈਨਕੂਵਰ ਤੋਂ ਹੋਪ ਤਕ ਦੇ ਲਈ ਵਰਤਿਆ ਜਾ ਸਕਦਾ ਹੈ।
ਅੱਜ ਦੁਪਹਿਰ ਦੀ ਅਪਡੇਟ ਦੌਰਾਨ ਬੀ.ਸੀ. ਦੇ ਟਰਾਂਸਪੋਰਟੇਸ਼ਨ ਅਤੇ ਇਨਫਰਾਸਟਰਕਚਰ ਮੰਤਰੀ ਰੌਬ ਫਲੈਮਿੰਗ ਨੇ ਜਾਣਕਾਰੀ ਦਿੱਤੀ ਸੀ ਕਿ ਐਬਟਸਫੋਰਡ ਅਤੇ ਹੋਪ ਵਿਚਾਲੇ ਹਾਈਵੇਅ 1 ਨੂੰ ਖੋਲ੍ਹਣ ਲਈ ਕੰਮ ਜੋਰਾਂ 'ਤੇ ਹੈ।
ਇਸ ਹਾਈਵੇਅ ਨੂੰ ਵੈਨਕੂਵਰ ਤੋਂ ਹੋਪ ਵਿਚਾਲੇ ਦੀ ਯਾਤਰਾ ਲਈ ਜਲਦੀ ਖੋਲ੍ਹਣ ਬਾਰੇ ਦੱਸਿਆ ਗਿਆ ਸੀ।
ਦੁਪਹਿਰ ਕਰੀਬ 2.30 ਵਜੇ ਤੋਂ ਇਸ ਹਾਈਵੇਅ 'ਤੇ ਟ੍ਰੈਫਿਕ ਦੀ ਆਵਾਜਾਈ ਦੀ ਇਜਾਜ਼ਤ ਦੇ ਦਿੱਤੀ ਗਈ।
ਇਸ ਰਸਤੇ 'ਤੇ ਸਥਾਪਿਤ ਟਾਈਗਰ ਡੈਮ ਨੂੰ ਹਟਾਉਣ ਲਈ ਦਰਜਨਾਂ ਵਰਕਰ ਅੱਜ ਸਵੇਰ ਤੋਂ ਕੰਮ 'ਚ ਜੁਟੇ ਰਹੇ।
ਹਾਈਵੇਅ 1 ਨੂੰ ਪੌਪਕਮ ਅਤੇ ਹੋਪ ਵਿਚਾਲੇ ਵੀ ਖੋਲ੍ਹ ਦਿੱਤਾ ਗਿਆ ਹੈ।
ਰੌਬ ਫਲੈਮਿੰਗ ਨੇ ਦੱਸਿਆ ਕਿ ਹਾਈਵੇਅ 99 'ਤੇ ਬੁੱਧਵਾਰ ਨੂੰ ਇੱਕ ਮਡਸਲਾਈਡ ਵਾਪਰੀ ਹੈ।
ਇਸ ਦੇ ਕਾਰਨ ਲੀਲੋਏਟ ਅਤੇ ਪੈਂਬਰਟਨ ਵਿਚਾਲੇ ਇਸ ਰਸਤੇ ਨੂੰ ਬੰਦ ਕੀਤਾ ਗਿਆ ਹੈ।
ਹਾਈਵੇਅ 3 ਨੂੰ ਪ੍ਰਿੰਸਟਨ ਦੇ ਕੋਲ ਹੜ੍ਹਾਂ ਕਾਰਨ ਬੰਦ ਰੱਖਿਆ ਗਿਆ ਹੈ।
ਹਾਈਵੇਅ 3 ਨੂੰ ਮੁੱਖ ਤੌਰ 'ਤੇ ਸਪਲਾਈ ਚੇਨ ਦੇ ਲਈ ਵਰਤਿਆ ਜਾ ਰਿਹਾ ਹੈ ਅਤੇ ਇਹ ਰਸਤਾ ਖੁੱਲ੍ਹਾ ਹੈ।
ਹਾਲਾਂਕਿ ਇਸ 'ਤੇ ਟਰੈਵਲ ਆਰਡਰ ਜਾਰੀ ਹਨ।
ਸੂਬੇ 'ਚ ਮੌਸਮ ਸੰਬੰਧੀ ਹਾਲਾਤਾਂ 'ਚ ਹੋ ਰਿਹਾ ਸੁਧਾਰ
ਬੀ.ਸੀ. ਦੇ ਪਬਲਿਕ ਸੇਫਟੀ ਮੰਤਰੀ ਅਤੇ ਸੌਲੀਸਿਟਰ ਜਨਰਲ, ਮਾਈਕ ਫਾਰਨਵਰਥ ਨੇ ਦੱਸਿਆ ਹੈ ਕਿ ਉਹ ਸ਼ੁਕਰ ਕਰ ਰਹੇ ਹਨ ਕਿ ਸੂਬੇ 'ਚ ਦਸਤਕ ਦੇਣ ਵਾਲੇ ਤੀਜੇ ਐਟਮੌਸਫੈਰੀਕ ਦਰਿਆ ਨੇ ਉਸ ਪ੍ਰਕਾਰ ਦਾ ਨੁਕਸਾਨ ਨਹੀਂ ਪਹੁੰਚਾਇਆ ਜਿਸ ਦਾ ਕਿ ਅਨੁਮਾਨ ਲਗਾਇਆ ਜਾ ਰਿਹਾ ਸੀ।
ਉਨ੍ਹਾਂ ਕਿਹਾ ਕਿ ਜਾਪਦਾ ਹੈ ਕਿ ਵਧੇਰੇ ਮੁਸ਼ਕਿਲ ਭਰੀਆਂ ਪਰਿਸਥਿਤੀਆਂ ਖਤਮ ਹੋ ਗਈਆਂ ਹਨ।
ਉਨ੍ਹਾਂ ਕਿਹਾ ਕਿ ਐਨਵਾਇਰਨਮੈਂਟ ਕੈਨੇਡਾ ਵੱਲੋਂ ਆਉਂਦੇ ਹਫਤਿਆਂ 'ਚ ਆਮ ਸੀਜ਼ਨਲ ਕੰਡੀਸ਼ਨਸ ਦਾ ਅਨੁਮਾਨ ਪੇਸ਼ ਕੀਤਾ ਜਾ ਰਾਹ ਹੈ।
ਉਨ੍ਹਾਂ ਕਿਹਾ ਕਿ ਆਉਂਦੇ ਦਿਨਾਂ 'ਚ ਮੀਂਹ ਤਾਂ ਪੈਣਗੇ ਪਰ ਹਾਲਾਤ ਅਜਿਹੇ ਨਹੀਂ ਹੋਣਗੇ ਜੋ ਕਿ ਸੂਬੇ ਨੇ ਬੀਤੇ ਕਰੀਬ 15 ਦਿਨ 'ਚ ਵੇਖੇ ਹਨ।
ਉਨ੍ਹਾਂ ਦੱਸਿਆ ਕਿ ਸੂਬਾ ਸਰਕਾਰ ਲਈ ਸਭ ਤੋਂ ਵੱਧ ਤਰਜੀਹ ਦਾ ਮਾਮਲਾ ਪਬਲਿਕ ਸੇਫਟੀ ਹੈ।
ਮਾਈਕ ਫਾਰਨਵਰਥ ਨੇ ਯਾਦ ਦਵਾਇਆ ਕਿ ਸੂਬੇ 'ਚ ਲਾਗੂ ਕੀਤੇ ਫਿਊਲ ਸੰਬੰਧੀ ਨਿਰਦੇਸ਼ਾਂ ਨੂੰ ਜਾਰੀ ਰੱਖਿਆ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਹੁਣ ਵੀ ਹਾਲਾਤ ਮੁਸ਼ਕਿਲ ਭਰੇ ਹੋ ਸਕਦੇ ਹਨ ਅਤੇ ਪਲ-ਪਲ ਦੀ ਜਾਣਕਾਰੀ ਲਈ ਡਰਾਈਵ ਬੀ.ਸੀ. ਅਤੇ ਐਨਵਾਇਰਨਮੈਂਟ ਕੈਨੇਡਾ ਦੇ ਟਵਿਟਰ ਖਾਤੇ ਵੇਖੇ ਜਾ ਸਕਦੇ ਹਨ।
