11.12C Vancouver 11.12C VancouverMay 14, 2020 9:39 PM -
ਬੀ.ਸੀ. ਦੇ ਅਟੌਰਨੀ ਜਨਰਲ (attorney general) ਡੇਵਿਡ ਇਬੀ ਨੇ ਕਿਹਾ ਹੈ ਕਿ ਹਾਲ ਦੀ ਘੜੀ, ਡਰਾਈਵਰਜ਼ ਨੂੰ ਆਈ.ਸੀ.ਬੀ.ਸੀ. (ICBC) ਵੱਲੋਂ ਕੋਈ ਛੋਟ ਨਹੀਂ ਦਿੱਤੀ ਜਾ ਰਹੀ, ਕਿਉਂਕਿ ਅਜੇ ਇਹ ਪਤਾ ਨਹੀਂ ਲਗਾਇਆ ਜਾ ਸਕਦਾ ਕਿ ਕੋਵਿਡ-19 ਦੇ ਪ੍ਰਭਾਵ ਤੋਂ ਬਾਅਦ ਆਈ.ਸੀ.ਬੀ.ਸੀ. ਦੀ ਕਮਾਈ ਕਿੰਨੀ ਕੁ ਪ੍ਰਭਾਵਿਤ ਹੋਵੇਗੀ।
ਡੇਵਿਡ ਇਬੀ ਨੇ ਇਹ ਜਾਣਕਾਰੀ ਅੱਜ ਵੈਨਕੂਵਰ ਵਿੱਚ ਬੀ.ਸੀ. ਵਿੱਚ ਕੋਵਿਡ-19 ਕਾਰਨ ਲਗਾਈ ਗਈ ਸਟੇਟ ਆਫ ਐਮਰਜੈਂਸੀ ਦੇ ਆਈ.ਸੀ.ਬੀ.ਸੀ. 'ਤੇ ਪੈਣ ਵਾਲੇ ਪ੍ਰਭਾਵਾਂ ਬਾਰੇ ਇੱਕ ਰਿਪੋਰਟ ਜਾਰੀ ਕਰਦੇ ਹੋਏ ਦਿੱਤੀ।
ਡੇਵਿਡ ਇਬੀ ਨੇ ਕਿਹਾ ਕਿ ਮਾਰਚ ਦੇ ਅੱਧ ਤੋਂ ਦੋ ਮਈ ਤੱਕ 150,000 ਬ੍ਰਿਟਿਸ਼ ਕੋਲੰਬੀਅਨਜ਼ (British Columbians) ਨੇ ਇੰਸ਼ੋਰੈਂਸ ਪਾਲਿਸੀ (insurance policy) ਨੂੰ ਤਬਦੀਲ ਜਾਂ ਕੈਂਸਲ ਕਰਵਾਇਆ ਹੈ, ਜਿਸ ਕਾਰਨ ਆਈ.ਸੀ.ਬੀ.ਸੀ. ਨੂੰ ਅਨੁਮਾਨ ਅਨੁਸਾਰ ਰੈਵੀਨਿਊ ਵਿੱਚ 283 ਮਿਲੀਅਨ ਡਾਲਰ ਦਾ ਘਾਟਾ ਹੋਇਆ ਹੈ।
ਇਸ ਤੋਂ ਇਲਾਵਾ ਆਈ.ਸੀ.ਬੀ.ਸੀ. ਦੇ ਇਨਵੈਸਟਮੈਂਟ ਪੋਰਟਫੋਲੀਓ (investment portfolio) ਦਾ ਮੁੱਲ ਇੱਕ ਬਿਲੀਅਨ ਡਾਲਰ ਘੱਟ ਗਿਆ ਹੈ।
ਅਟੌਰਨੀ ਜਨਰਲ ਨੇ ਕਿਹਾ ਕਿ ਜੇਕਰ ਆਈ.ਸੀ.ਬੀ.ਸੀ. ਦੀ ਕਮਾਈ ਉਮੀਦ ਤੋਂ ਬਿਹਤਰ ਰਹਿੰਦੀ ਹੈ ਤਾਂ ਚਾਲਕਾਂ ਨੂੰ ਰਿਬੇਟ ਦਿੱਤਾ ਜਾ ਸਕਦਾ ਹੈ।
ਪਰ ਇਸ ਦਾ ਫ਼ੈਸਲਾ ਵਿੱਤੀ ਸਾਲ ਖਤਮ ਹੋਣ 'ਤੇ ਹੀ ਕੀਤਾ ਜਾਵੇਗਾ ਅਤੇ ਵਿੱਤੀ ਸਾਲ ਖਤਮ ਹੋਣ ਵਿੱਚ ਅਜੇ 10 ਮਹੀਨੇ ਤੋਂ ਵੱਧ ਦਾ ਸਮਾਂ ਬਾਕੀ ਹੈ।
ਇਸ ਮੌਕੇ ਜਾਣਕਾਰੀ ਦਿੱਤੀ ਗਈ ਕਿ ਕੈਂਸਲੇਸ਼ਨ ਅਤੇ ਰੀ-ਪਲੇਟਿੰਗ ਫੀਸ ਦੀ ਛੋਟ ਕਾਰਨ ਬੀ.ਸੀ. ਨਿਵਾਸੀਆਂ ਨੂੰ 5 ਮਿਲੀਅਨ ਡਾਲਰ ਦੀ ਬੱਚਤ ਹੋਈ ਹੈ।
