ਮੈਪਲ ਰਿਜ ਦੇ ਖੇਤਰ ਵਿੱਚ ਚੱਲੀ ਗੋਲੀ, ਇਕ ਵਿਅਕਤੀ ਦੀ ਹੋਈ ਮੌਤ

ਮੈਪਲ ਰਿਜ ਦੀ 246 ਸਟ੍ਰੀਟ ਅਤੇ 124 ਐਵੇਨਿਊ ਖੇਤਰ ਵਿਚ ਅੱਜ ਗੋਲੀ ਚੱਲਣ ਦੀ ਵਾਰਦਾਤ ਵਾਪਰੀ, ਜਿਸ ਵਿਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ। ਇਸ ਘਟਨਾ ਦੀ ਜਾਂਚ ਰਿਜ ਮੀਡੋਜ਼ ਆਰਸੀਐਮਪੀ ਵਲੋਂ ਕੀਤੀ ਜਾ ਰਹੀ ਹੈ। ਪੁਲਿਸ ਨੇ ਕਿਹਾ ਕਿ ਵੱਡੇ ਤੜਕੇ ਲਗਭਗ 12:22 ਵਜੇ ਰਿਜ ਮੀਡੋਜ਼ ਆਰਸੀਐਮਪੀ ਨੂੰ 246 ਸਟ੍ਰੀਟ ਅਤੇ 124 ਐਵੇਨਿਊ ਦੇ ਨੇੜੇ ਸ਼ੂਟਿੰਗ ਦੀ ਰਿਪੋਰਟ ਮਿਲੀ।

ਮੌਕੇ 'ਤੇ ਪਹੁੰਚੀ ਪੁਲਿਸ ਨੂੰ ਡਿਊਡਨੀ ਟਰੰਕ ਰੋਡ ਦੇ 24000-ਬਲਾਕ ਵਿਚ ਇੱਕ ਗੱਡੀ ਦੇ ਅੰਦਰ ਪੀੜਤ ਬੇਸੁੱਧ ਮਿਲਿਆ, ਜੋ ਗੰਨਸ਼ੂਟ ਨਾਲ ਜ਼ਖਮੀ ਸੀ, ਅਧਿਕਾਰੀਆਂ ਵਲੋਂ ਉਸ ਦੀ ਜਾਨ ਬਚਾਉਣ ਦੀਆਂ ਤਮਾਮ ਕੋਸ਼ਿਸ਼ਾਂ ਕੀਤੀਆਂ ਗਈਆਂ ਪਰ ਉਹ ਬਚ ਨਹੀਂ ਸਕਿਆ।

ਪੁਲਿਸ ਨੇ ਦੱਸਿਆ ਕਿ ਜਾਂਚ ਏਕੀਕ੍ਰਿਤ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਵਲੋਂ ਆਪਣੇ ਹੱਥਾਂ ਵਿਚ ਲਈ ਗਈ ਹੈ ਅਤੇ ਜਾਂਚਕਰਤਾ ਸਬੂਤ ਜੁਟਾ ਰਹੇ ਹਨ। ਰਿਜ ਮੀਡੋਜ਼ ਆਰਸੀਐਮਪੀ ਨੇ ਕਿਹਾ ਕਿ ਇਸ ਸਮੇਂ ਹੋਰ ਕੋਈ ਵੀ ਜਾਣਕਾਰੀ ਨਹੀਂ ਦਿੱਤੀ ਜਾ ਸਕਦੀ ਅਤੇ ਅੱਗੇ ਦੀ ਅਪਡੇਟ ਆਈ.ਐਚ.ਆਈ.ਟੀ. ਵਲੋਂ ਹੀ ਦਿੱਤੀ ਜਾਵੇਗੀ।