ਬੀ. ਸੀ. ਵਿਚ ਇੱਕ ਨਵਾਂ ਵਰਚੁਅਲ ਕੇਅਰ ਪਾਇਲਟ ਪ੍ਰੋਗਰਾਮ ਕੀਤਾ ਜਾ ਰਿਹੈ ਸ਼ੁਰੂ

ਬੀ. ਸੀ. ਵਿਚ ਇੱਕ ਨਵਾਂ ਵਰਚੁਅਲ ਕੇਅਰ ਪਾਇਲਟ ਪ੍ਰੋਗਰਾਮ ਸ਼ੁਰੂ ਕੀਤਾ ਜਾ ਰਿਹਾ ਹੈ। ਇਹ ਪਹਿਲ ਇੰਟੀਰੀਅਰ ਹੈਲਥ ਅਥਾਰਟੀ ਵਲੋਂ ਕੀਤੀ ਗਈ ਹੈ ਤਾਂ ਜੋ ਪੇਂਡੂ ਭਾਈਚਾਰੇ ਵਿਚ ਡਾਕਟਰਾਂ ਜਾਂ ਨਰਸਾਂ ਦੀ ਘਾਟ ਕਾਰਨ ਵਾਰ-ਵਾਰ ਬੰਦ ਹੋਣ ਵਾਲੇ ਛੋਟੇ ਐਮਰਜੈਂਸੀ ਰੂਮ ਦੀ ਸਮੱਸਿਆ ਦਾ ਹੱਲ ਕੀਤਾ ਜਾ ਸਕੇ।

ਇੰਟੀਰੀਅਰ ਹੈਲਥ ਨੇ ਇਹ ਪਾਇਲਟ ਪ੍ਰੋਗਰਾਮ ਕਲੀਅਰਵਾਟਰ, ਨਕੁਸਪ, ਲਿਲੂਏਟ ਅਤੇ ਪ੍ਰਿੰਸਟਨ ਦੇ ਹਸਪਤਾਲਾਂ ਲਈ ਪੇਸ਼ ਕੀਤਾ ਹੈ, ਜੋ ਸਾਈਜ਼ ਵਿਚ ਲਗਭਗ ਇੱਕੋ-ਜਿਹੇ ਹਨ ਅਤੇ ਉਥੇ ਰਾਤ ਵਿਚ ਮਰੀਜ਼ਾਂ ਦੀ ਗਿਣਤੀ ਵੀ ਘੱਟ ਹੈ। ਇਹ ਪ੍ਰੋਗਰਾਮ ਇੱਕ ਹਾਈਬ੍ਰਿਡ ਸਟਾਫਿੰਗ ਮਾਡਲ ਦੀ ਵਰਤੋਂ ਕਰੇਗਾ, ਜਿਸ ਵਿਚ ਵਰਚੁਅਲ ਅਤੇ ਮੌਕੇ 'ਤੇ ਦੇਖਭਾਲ ਸੇਵਾਵਾਂ ਦੋਵਾਂ ਦਾ ਸੁਮੇਲ ਹੋਵੇਗਾ।

ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਹੈਲਥ ਅਥਾਰਟੀ ਡੌਕਟਰਜ਼ ਅਤੇ ਸਟਾਫ ਨਾਲ ਇਹ ਸਮਝਣ ਲਈ ਕੰਮ ਕਰ ਰਹੀ ਹੈ ਕਿ ਪ੍ਰੋਜੈਕਟ ਨੂੰ ਸ਼ੁਰੂ ਕਰਨ ਅਤੇ ਇਸ ਵਿਚਾਰ ਦੀ ਟੈਸਟਿੰਗ ਲਈ ਕਿਹੜੇ ਉਪਾਅ ਕਾਰਗਰ ਹੋ ਸਕਦੇ ਹਨ।

ਸਿਹਤ ਮੰਤਰੀ ਜੋਸੀ ਓਸਬੋਰਨ ਨੇ ਇਸ ਨੂੰ ਇੱਕ ਦੂਰਦਰਸ਼ੀ ਕਦਮ ਦੱਸਿਆ ਹੈ, ਜੋ ਪੇਂਡੂ ਐਮਰਜੈਂਸੀ ਸੇਵਾਵਾਂ ਨੂੰ ਯਕੀਨੀ ਬਣਾ ਸਕਦਾ ਹੈ। ਗੌਰਤਲਬ ਹੈ ਕਿ ਲੋਕਾਂ ਨੂੰ ਰਾਤ ਸਮੇਂ ਅਤੇ ਵੀਕੈਂਡ 'ਤੇ ਕਈ ਵਾਰ ਐਮਰਜੈਂਸੀ ਰੂਮ ਬੰਦ ਹੋਣ ਦਾ ਸਾਹਮਣਾ ਕਰਨਾ ਪਿਆ ਹੈ।