ਇਜ਼ਰਾਈਲ-ਹਮਾਸ ਯੁੱਧ : ਦੋ ਕੈਨੇਡੀਅਨਜ਼ ਦੀ ਲੇਬਨਾਨ 'ਚ ਹੋਈ ਮੌਤ

ਗਲੋਬਲ ਅਫੇਅਰਜ਼ ਕੈਨੇਡਾ ਨੇ ਇਜ਼ਰਾਈਲ-ਹਮਾਸ ਯੁੱਧ ਵਿਚਕਾਰ ਦੋ ਹੋਰ ਕੈਨੇਡੀਅਨ ਦੀ ਮੌਤ ਹੋਣ ਦੀ ਪੁਸ਼ਟੀ ਕੀਤੀ ਹੈ ਜਿਸ ਨਾਲ ਕੈਨੇਡਾ ਨਾਲ ਸੰਬੰਧਤ ਮਾਰੇ ਗਏ ਲੋਕਾਂ ਦੀ ਕੁੱਲ ਗਿਣਤੀ 9 ਹੋ ਗਈ ਹੈ।

ਵਿਭਾਗ ਦਾ ਕਹਿਣਾ ਹੈ ਕਿ ਤਾਜ਼ਾ ਦੋ ਮੌਤਾਂ ਲੇਬਨਾਨ ਵਿੱਚ ਹੋਈਆਂ, ਜਿਸ ਦੇ ਬਾਰਡਰ 'ਤੇ 7 ਅਕਤੂਬਰ ਤੋਂ ਇਜ਼ਰਾਇਲ ਅਤੇ ਹਿਜ਼ਬੁੱਲਾ ਅੱਤਵਾਦੀਆਂ ਵਿਚਕਾਰ ਗੋਲੀਬਾਰੀ ਹੋ ਰਹੀ ਹੈ। ਇਸੇ ਦਿਨ ਹਮਾਸ ਨੇ ਇਜ਼ਰਾਇਲ ਦੇ ਦੱਖਣੀ ਹਿੱਸੇ 'ਤੇ ਹਮਲੇ ਕੀਤੇ ਸਨ।

ਗਲੋਬਲ ਅਫੇਅਰਜ਼ ਕੈਨੇਡਾ ਨੇ ਮ੍ਰਿਤਕਾਂ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਪਰ ਅਪਡੇਟ ਵਿੱਚ ਕਿਹਾ ਕਿ ਇਸ ਵੀਕੈਂਡ 'ਤੇ ਗਾਜ਼ਾ ਤੋਂ 130 ਹੋਰ ਕੈਨੇਡੀਅਨ ਰਫਾਹ ਕਰਾਸਿੰਗ ਜ਼ਰੀਏ ਉੱਥੋਂ ਨਿਕਲ ਗਏ ਹਨ, ਜਿਸ ਨਾਲ ਇਸ ਜੰਗੀ ਮੈਦਾਨ ਵਿੱਚੋਂ ਨਿਕਲ ਚੁੱਕੇ ਕੈਨੇਡੀਅਨਜ਼ ਦੀ ਕੁੱਲ ਗਿਣਤੀ 600 ਹੋ ਗਈ ਹੈ।

ਵਿਭਾਗ ਨੇ ਦੱਸਿਆ ਕਿ ਮੌਜੂਦਾ ਸਮੇਂ ਗਾਜ਼ਾ ਅਤੇ ਵੈਸਟ ਬੈਂਕ ਵਿੱਚੋਂ ਨਿਕਲਣ ਲਈ 426 ਹੋਰ ਕੈਨੇਡੀਅਨਜ਼ ਇੰਤਜ਼ਾਰ ਕਰ ਰਹੇ ਹਨ। ਗਲੋਬਲ ਅਫੇਅਰਜ਼ ਦਾ ਕਹਿਣਾ ਹੈ ਕਿ ਇੱਕ ਕੈਨੇਡੀਅਨ ਅਜੇ ਵੀ ਲਾਪਤਾ ਹੈ ਪਰ ਉਸ ਦੀ ਹੁਣ ਤੱਕ ਪਛਾਣ ਨਹੀਂ ਕੀਤੀ ਜਾ ਸਕੀ।

ਗੌਰਤਲਬ ਹੈ ਕਿ ਕੈਨੇਡਾ ਸਰਕਾਰ ਨੇ ਇਜ਼ਰਾਇਲ-ਹਮਾਸ ਵਿਚਕਾਰ ਯੁੱਧ ਲੇਬਨਾਨ ਦੇ ਸਰਹੱਦ ਤੱਕ ਵੱਧਣ ਕਾਰਨ ਕੈਨੇਡੀਅਨ ਨੂੰ ਅੱਧ ਅਕਤੂਬਰ ਵਿੱਚ ਲੇਬਨਾਨ ਛੱਡੇ ਜਾਣ ਦੀ ਸਲਾਹ ਦਿੱਤੀ ਸੀ।ਲੇਬਨਾਨ ਵਿੱਚ 15,918 ਕੈਨੇਡੀਅਨ ਨੇ ਗਲੋਬਲ ਅਫੇਅਰਜ਼ ਕੈਨੇਡਾ ਨਾਲ ਰਜਿਸਟਰਡ ਕੀਤਾ ਹੈ।