ਲਗਭਗ ਦੋ ਸਾਲਾਂ ਬਾਅਦ ਇਜ਼ਰਾਈਲ ਗਾਜ਼ਾ–ਮਿਸਰ ਸਰਹੱਦੀ ਰਾਹਦਾਰੀ ਮੁੜ ਖੋਲ੍ਹੇਗਾ

ਇਜ਼ਰਾਈਲ ਨੇ ਲਗਭਗ ਦੋ ਸਾਲਾਂ ਬਾਅਦ ਗਾਜ਼ਾ-ਮਿਸਰ ਦੇ ਵਿਚਕਾਰ ਰਫ਼ਾਹ ਸਰਹੱਦੀ ਕ੍ਰਾਸਿੰਗ ਨੂੰ ਇਸ ਹਫ਼ਤੇ ਦੇ ਅੰਤ ਵਿੱਚ ਐਤਵਾਰ ਨੂੰ ਖੋਲ੍ਹਣ ਦਾ ਐਲਾਨ ਕੀਤਾ ਹੈ। ਇਸ ਕ੍ਰਾਸਿੰਗ ਦੇ ਖੁੱਲਣ ਨਾਲ ਫ਼ਲਸਤੀਨੀ ਲੋਕਾਂ ਨੂੰ ਆਉਣ-ਜਾਣ ਦੀ ਇਜਾਜ਼ਤ ਮਿਲੇਗੀ।

ਗਾਜ਼ਾ ਵਿੱਚ ਮਦਦ ਅਤੇ ਸਹਿਯੋਗ ਲਈ ਜ਼ਿੰਮੇਵਾਰ ਇਜ਼ਰਾਈਲ ਦੀ ਸੈਨਿਕ ਏਜੰਸੀ COGAT (Coordinator of Government Activities in the Territories) ਨੇ ਕਿਹਾ ਹੈ ਕਿ ਕ੍ਰਾਸਿੰਗ ਖੁੱਲ੍ਹਣ ਦੇ ਸ਼ੁਰੂਆਤੀ ਦੌਰ ਵਿੱਚ ਸਿਰਫ਼ ਸੀਮਿਤ ਲੋਕਾਂ ਨੂੰ ਆਵਾਜਾਈ ਦੀ ਮਨਜ਼ੂਰੀ ਹੋਵੇਗੀ।

ਇਜ਼ਰਾਈਲ ਵੱਲੋਂ ਐਤਵਾਰ ਨੂੰ ਕ੍ਰਾਸਿੰਗ ਖੁੱਲ੍ਹਣ ਦੇ ਐਲਾਨ ਨੂੰ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਵੱਲੋਂ ਗਾਜ਼ਾ ਜੰਗਬੰਦੀ ਲਈ ਕੀਤੇ ਗਏ ਯਤਨਾਂ ਲਈ ਇੱਕ ਮਹੱਤਵਪੂਰਨ ਕਦਮ ਮੰਨਿਆ ਜਾ ਰਿਹਾ ਹੈ। ਇਹ ਰਸਤਾ ਗਾਜ਼ਾ ਦਾ ਬਾਹਰੀ ਦੁਨੀਆ ਨਾਲ ਸੰਪਰਕ ਜੋੜਨ ਦਾ ਮੁੱਖ ਰਸਤਾ ਹੈ।

ਇਸ ਰਸਤੇ ਤੋਂ ਦਾਖ਼ਲ ਹੋਣ ਵਾਲੇ ਅਤੇ ਬਾਹਰ ਜਾਣ ਵਾਲੇ ਲੋਕਾਂ ਦੀ ਜਾਂਚ ਇਜ਼ਰਾਈਲ ਅਤੇ ਮਿਸਰ ਦੋਵੇਂ ਕਰਨਗੇ ਅਤੇ ਇਸ ਦੀ ਨਿਗਰਾਨੀ ਯੂਰਪੀ ਸੰਘ ਦੇ ਸਰਹੱਦੀ ਅਧਿਕਾਰੀ ਕਰਨਗੇ। ਜ਼ਿਕਰਯੋਗ ਹੈ ਕਿ ਬੀਤੇ ਸੋਮਵਾਰ ਨੂੰ ਗਾਜ਼ਾ ਵਿੱਚ ਆਖ਼ਰੀ ਬੰਧਕ ਦੇ ਅਵਸ਼ੇਸ਼ ਮਿਲਣ ਤੋਂ ਬਾਅਦ ਹੁਣ ਸ਼ਾਂਤੀ ਪ੍ਰਕਿਰਿਆ ਲਈ ਅੱਗੇ ਵੱਧਣ ਦਾ ਰਸਤਾ ਸਾਫ਼ ਹੋਇਆ ਹੈ।