10.35C Vancouver 10.35C VancouverSep 23, 2020 9:09 PM -
ਬੀ.ਸੀ. ਐਨ.ਡੀ.ਪੀ. ਲੀਡਰ, ਜੌਨ ਹੌਰਗਨ ਨੇ ਅੱਜ ਕਨੈਕਟ ਨਿਊਜ਼ ਦੇ ਸਵੇਰ ਵਾਲਾ ਸ਼ੋਅ ਵਿੱਚ ਗੱਲ ਕਰਦਿਆਂ ਕਿਹਾ ਕਿ ਸਰੀ ਦਾ ਦੂਜਾ ਹਸਪਤਾਲ ਜ਼ਰੂਰ ਬਣੇਗਾ, ਅਤੇ ਇਸ ਦੇ ਉਲਟ ਕਹਿਣ ਵਾਲੇ ਇਹ ਨਹੀਂ ਸਮਝਦੇ ਕਿ ਸਰਕਾਰ ਕਿਵੇਂ ਕੰਮ ਕਰਦੀ ਹੈ ਜਾਂ ਫਿਰ ਉਹ ਬੀ.ਸੀ. ਲਿਬਰਲਸ ਦੇ ਕਹਿਣ ਤੇ ਅਜਿਹਾ ਕਹਿ ਰਹੇ ਹਨ।
ਜੌਨ ਹੌਰਗਨ ਨੇ ਸਰੀ-ਲੈਂਗਲੀ ਸਕਾਈ ਟਰੇਨ ਐਕਸਟੈਨਸ਼ਨ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਉਹ ਅਤੇ ਫੈਡਰਲ ਸਰਕਾਰ ਇਸ ਦੇ ਲਈ ਵਚਨਬੱਧ ਹਨ, ਅਤੇ ਸਰੀ ਦੇ ਮੇਅਰ ਡੱਗ ਮੈਕੁਲਮ ਦਾ ਇਹ ਕਹਿਣਾ ਕਿ ਸੂਬਾ ਸਰਕਾਰ ਨੇ ਇਸ ਸਬੰਧੀ ਤੇਜ਼ੀ ਨਾਲ ਕੰਮ ਨਹੀਂ ਕੀਤਾ, ਇੱਕ ਸਹੀ ਟਿੱਪਣੀ ਨਹੀਂ ਹੈ।
ਸਰੀ ਵਿੱਚ ਹੀ ਆਪਣੀ ਚੋਣ ਮੁਹਿੰਮ ਦੌਰਾਨ ਜੌਨ ਹੌਰਗਨ ਨੇ ਸਰੀ ਪੁਲਸ ਦੇ ਸੰਬੰਧ ਵਿੱਚ ਗੱਲ ਕਰਦਿਆਂ ਕਿਹਾ ਕਿ ਇਹ ਇੱਕ ਵੰਡ ਪਾਉਣ ਵਾਲਾ ਮੁੱਦਾ ਹੈ, ਜਿਸ ਨੂੰ ਮੇਅਰ ਡੱਗ ਮੈਕੁਲਮ ਨੇ ਛੇੜਿਆ ਅਤੇ ਉਹ ਹੀ ਇਸ ਦੇ ਲਈ ਜ਼ਿੰਮੇਵਾਰ ਹਨ।
ਜੌਨ ਹੌਰਗਨ ਨੇ ਬੀ.ਸੀ. ਲਿਬਰਲਸ ਦੀ ਨਿਖੇਧੀ ਕਰਦਿਆਂ ਕਿਹਾ ਕਿ ਲਿਬਰਲ ਸਰਕਾਰ ਨੇ ਸਰੀ ਦੇ ਦੂਜੇ ਹਸਪਤਾਲ ਦੀ ਜ਼ਮੀਨ ਵੇਚੀ, ਅਤੇ ਸਰੀ ਦੇ ਸਕੂਲਾਂ ਵਿੱਚ ਪੋਰਟੇਬਲਜ਼ ਦੀ ਸਮੱਸਿਆ ਵੀ ਲਿਬਰਲ ਸਰਕਾਰ ਦੀ ਅਸਫਲਤਾ ਦਾ ਨਤੀਜਾ ਹੈ।
