12.81C Vancouver 12.81C VancouverJun 15, 2020 10:31 PM -
ਵੁਆਵੇ ਐਗਜ਼ੀਕਿਊਟਿਵ ਮੰਗ ਵਾਂਜੋ ਦੇ ਮਾਮਲੇ ਦੀ ਸੁਣਵਾਈ ਕਰ ਰਹੇ ਬੀ.ਸੀ. ਸੁਪ੍ਰੀਮ ਕੋਰਟ ਜੱਜ ਨੂੰ ਕਾਰਵਾਈਆਂ ਨੂੰ ਲੱਗ ਰਹੇ ਸਮੇਂ ਨੂੰ ਲੈ ਕੇ ਫਿਕਰ ਹੈ।
ਅੱਜ ਦੀ 'ਕੇਸ ਮੈਨੇਜਮੈਂਟ ਕਾਨਫਰੰਸ' ਦੌਰਾਨ ਐਸੋਸੀਏਟ ਚੀਫ਼ ਜਸਟਿਸ, ਹੈਦਰ ਹੋਮਜ਼ ਨੇ ਕਿਹਾ ਕਿ ਕਰਾਊਨ ਪ੍ਰਾਸੀਕਿਊਟਰ ਅਤੇ ਮੰਗ ਦੇ ਕਾਉਂਸਲ ਵੱਲੋਂ ਦਿੱਤੀ ਗਈ ਸਮਾਂਸੂਚੀ ਅਨੁਸਾਰ, ਇਹ ਮਾਮਲਾ ਅਗਲੀ ਬਸੰਤ ਰੁੱਤ ਤੱਕ ਖਿੱਚ ਸਕਦਾ ਹੈ।
ਜੱਜ ਨੇ ਕਿਹਾ ਕਿ ਅਦਾਲਤ ਇਸ ਤੋਂ ਵਧੇਰੇ ਤੇਜ਼ ਕੰਮ ਕਰ ਸਕਦੀ ਹੈ।
ਮੰਗ ਵਾਂਜੋ, ਅਮਰੀਕਾ 'ਚ ਧੋਖਾਧੜੀ ਦੇ ਮਾਮਲੇ 'ਚ ਵਾਂਟਿਡ ਹਨ। ਪਰ ਮੰਗ ਵਾਂਜੋ ਅਤੇ ਵੁਆਵੇ ਨੇ ਇਲਜ਼ਾਮਾਂ ਨੂੰ ਗਲਤ ਦੱਸਿਆ ਹੈ ਅਤੇ ਲਗਾਤਾਰ ਮੰਗ ਉਠਾਈ ਹੈ ਕਿ, ਇਸ ਹਵਾਲਗੀ ਦੇ ਮਾਮਲੇ ਨੂੰ ਰੱਦ ਕੀਤਾ ਜਾਵੇ।
ਯਾਦ ਰਹੇ ਹੈਦਰ ਹੋਮਜ਼ ਨੇ ਬੀਤੇ ਮਹੀਨੇ ਵੁਆਵੇ ਦੀ ਸੀ.ਐਫ.ਓ. (ਚੀਫ਼ ਫਾਇਨੈਨਸ਼ੀਅਲ ਅਫ਼ਸਰ), ਮੰਗ ਵਾਂਜੋ ਦੇ ਅਮਰੀਕਾ ਨੂੰ ਸਪੁਰਦਗੀ (extradition) ਦੇ ਮਾਮਲੇ 'ਚ ਉਨ੍ਹਾਂ ਦੇ ਖਿਲਾਫ਼ ਫੈਸਲਾ ਸੁਣਾਇਆ ਸੀ।
ਇਸ ਦਾ ਮਤਲਬ ਹੈ ਕਿ ਮੰਗ ਵਾਂਜੋ ਨੂੰ ਡਬਲ ਕ੍ਰਿਮੀਨੈਲਿਟੀ ਲਈ ਯੋਗ ਪਾਇਆ ਗਿਆ, ਅਤੇ ਇਸ ਦੇ ਚਲਦਿਆਂ ਉਨ੍ਹਾਂ ਖਿਲਾਫ਼ ਅਮਰੀਕਾ 'ਚ ਜਿਹੜੇ ਅਪਰਾਧਾਂ ਦੇ ਇਲਜ਼ਾਮ ਲੱਗ ਰਹੇ ਹਨ, ਉਨ੍ਹਾਂ ਅਪਰਾਧਾਂ ਸੰਬੰਧੀ ਇਲਜ਼ਾਮਾਂ ਨੂੰ ਕੈਨੇਡਾ ਦੀ ਕਨੂੰਨੀ ਪ੍ਰਕਿਰਿਆ 'ਚ ਵੀ ਯੋਗ ਮੰਨਿਆ ਜਾ ਰਿਹਾ ਹੈ।
ਹੁਣ ਮੰਗ ਵਾਂਜੋ ਖਿਲਾਫ਼ ਕੈਨੇਡਾ 'ਚ ਜਾਰੀ ਉਨ੍ਹਾਂ ਦੀ ਅਮਰੀਕਾ ਨੂੰ ਸਪੁਰਦਗੀ ਦੇ ਮਾਮਲੇ ਨੂੰ ਅੱਗੇ ਵਧਾਇਆ ਜਾ ਰਿਹਾ ਹੈ।
ਹਾਲਾਂਕਿ ਇਸ ਦਾ ਇਹ ਵੀ ਅਰਥ ਹੈ ਕਿ ਇਸ ਮਾਮਲੇ ਨਾਲ ਜੁੜੀਆਂ ਹੋਰ ਕਈ ਦਲੀਲਾਂ 'ਤੇ ਵੀ ਸੁਣਵਾਈ ਜਾਰੀ ਰਹੇਗੀ। ਇਸ ਦੇ ਵਿੱਚ ਉਨ੍ਹਾਂ ਦੀ ਦਿਸੰਬਰ 2018 'ਚ ਵੈਨਕੂਵਰ ਹਵਾਈ ਅੱਡੇ 'ਤੇ ਹੋਈ ਗ੍ਰਿਫਤਾਰੀ ਦੇ ਮਾਮਲੇ ਦੀ ਸੁਣਵਾਈ ਵੀ ਸ਼ਾਮਿਲ ਰਹੇਗੀ।
