ਕੈਮਲੂਪਸ 'ਚ ਵਿਅਕਤੀ ਨੂੰ ਗੈਰ-ਕਾਨੂੰਨੀ ਹਥਿਆਰ ਰੱਖਣ ਦੇ ਦੋਸ਼ ਵਿੱਚ ਤਿੰਨ ਸਾਲ ਦੀ ਹੋਈ ਸਜ਼ਾ

ਕੈਮਲੂਪਸ-ਖੇਤਰ ਦੇ ਇੱਕ ਵਿਅਕਤੀ ਨੂੰ ਗੈਰ-ਕਾਨੂੰਨੀ ਹਥਿਆਰ ਰੱਖਣ ਦੇ ਦੋਸ਼ ਵਿੱਚ ਤਿੰਨ ਸਾਲ ਦੀ ਜੇਲ੍ਹ ਦੀ ਸਜ਼ਾ ਸੁਣਾਈ ਗਈ ਹੈ। ਬੀ.ਸੀ.ਦੀ ਕੰਬਾਇਡ ਫੋਰਸਿਜ਼ ਸਪੈਸ਼ਲ ਇਨਫੋਰਸਮੈਂਟ ਯੂਨਿਟ ਮੁਤਾਬਕ, 22 ਮਾਰਚ 2024 ਨੂੰ ਇੱਕ ਇਲੈਕਟ੍ਰਿਕ ਮੋਟਰਬਾਈਕ ਨੇ ਕਈ ਵਾਰ ਟ੍ਰੈਫ਼ਿਕ ਨਿਯਮਾਂ ਦੀ ਉਲੰਘਣਾ ਕੀਤੀ, ਜਿਸ ਨੂੰ ਰੋਕਣ ਲਈ ਕੈਮਲੂਪਸ ਵਿਚ ਨਾਕਾ ਲਗਾਇਆ ਗਿਆ ਸੀ ਅਤੇ ਡਰਾਈਵਰ ਫਿਰ ਵੀ ਭੱਜ ਨਿਕਲਿਆ,ਥੋੜ੍ਹੀ ਦੇਰ ਮਗਰੋਂ ਉਸ ਨੂੰ ਹਿਰਾਸਤ ਵਿਚ ਲੈਣ ਮਗਰੋਂ ਨਸ਼ੇ ਅਤੇ ਕੈਸ਼ ਤੋਂ ਇਲਾਵਾ ਇੱਕ ਗਿਰਸਨ ਸੈਮੀ-ਆਟੋਮੈਟਿਕ ਪਿਸਤੌਲ,6 ਰਾਊਂਡ 9 ਐਮ.ਐਮ.ਕਾਰਤੂਸ,ਪਿਸਤੌਲ ਮੈਗਜ਼ੀਨ ਅਤੇ ਹੋਲਸਟਰ ਬਰਾਮਦ ਕੀਤੇ ਗਏ।

ਮੁਲਜ਼ਮ ਦੀ ਪਛਾਣ ਵੈਲਮਾਉਂਟ ਦੇ 48 ਸਾਲਾ ਕ੍ਰਿਸਟੋਫਰ ਫਿਲਿੰਗਮ ਵਜੋਂ ਹੋਈ। ਪੁਲਿਸ ਮੁਤਾਬਕ,ਘਟਨਾ ਸਮੇਂ ਉਹ ਪਹਿਲਾਂ ਹੀ ਕੋਰਟ ਆਰਡਰ ਤਹਿਤ ਹਥਿਆਰ ਨਹੀਂ ਰੱਖ ਸਕਦਾ ਸੀ। ਕੈਮਲੂਪਸ ਸਥਿਤ ਬੀ.ਸੀ.ਸੁਪਰੀਮ ਕੋਰਟ ਨੇ ਉਸ 'ਤੇ ਹੁਣ ਉਮਰ ਭਰ ਲਈ ਹਥਿਆਰਾਂ ਦੀ ਪਾਬੰਦੀ ਲਗਾਈ ਹੈ ਅਤੇ ਡੀ.ਐਨ.ਏ.ਜਮ੍ਹਾ ਕਰਨ ਦਾ ਵੀ ਹੁਕਮ ਜਾਰੀ ਕੀਤਾ ਹੈ।