ਕੈਲੋਨਾ ਆਰ.ਸੀ.ਐਮ.ਪੀ. ਵੱਲੋਂ ਨਸ਼ਾ ਤੇ ਹਥਿਆਰ ਬਰਾਮਦਗੀ ਤੋਂ ਬਾਅਦ ਗੈਂਗ ਇਨਫੋਰਸਮੈਂਟ ਟੀਮ ਪਾਇਲਟ ਦੀ ਸ਼ੁਰੂਆਤ

ਕੈਲੋਨਾ ਵਿਚ ਗੈਂਗਵਾਰ ਅਤੇ ਨਸ਼ਿਆਂ ਖ਼ਿਲਾਫ਼ ਕਾਰਵਾਈ ਲਈ ਨਵੇਂ ਪਾਇਲਟ ਪ੍ਰੋਜੈਕਟ ਤਹਿਤ ਗੈਂਗ ਇਨਫੋਰਸਮੈਂਟ ਟੀਮ ਲੌਂਚ ਕੀਤੀ ਗਈ ਹੈ। ਇਸ 4 ਮੈਂਬਰੀ ਟੀਮ ਵਿਚ ਕੈਲੋਨਾ ਆਰ.ਸੀ.ਐਮ.ਪੀ. ਡਿਟੈਚਮੈਂਟ ਦੇ ਵੱਖ-ਵੱਖ ਯੂਨਿਟਸ ਦੇ ਤਜ਼ਰਬੇਕਾਰ ਅਧਿਕਾਰੀ ਸ਼ਾਮਲ ਕੀਤੇ ਗਏ ਹਨ, ਜੋ ਨਸ਼ਾ ਤਸਕਰੀ ਅਤੇ ਗੈਂਗਸਟਰਾਂ ਨਾਲ ਨਜਿੱਠਣ ਵਿਚ ਮਾਹਰ ਹਨ।

ਇਹ ਟੀਮ 6 ਜਨਵਰੀ ਤੋਂ ਸਰਗਰਮ ਹੋਈ ਹੈ ਅਤੇ ਪਹਿਲੇ ਕੁਝ ਦਿਨਾਂ ਵਿਚ ਹੀ ਇਸ ਨੇ ਕਈ ਇਨਫੋਰਸਮੈਂਟ ਐਕਸ਼ਨ ਕੀਤੇ ਹਨ। ਸਭ ਤੋਂ ਤਾਜ਼ਾ ਮਾਮਲਾ 8 ਜਨਵਰੀ ਦਾ ਹੈ ਜਦੋਂ ਟੀਮ ਨੇ ਇੱਕ ਗੱਡੀ ਦੀ ਤਲਾਸ਼ੀ ਦੌਰਾਨ ਦੋ ਵਿਅਕਤੀਆਂ ਨੂੰ 3 ਹਥਿਆਰ ਅਤੇ ਨਾਜਾਇਜ਼ ਨਸ਼ੀਲੇ ਪਦਾਰਥ ਨਾਲ ਗ੍ਰਿਫ਼ਤਾਰ ਕੀਤਾ। ਮੁਲਜ਼ਮਾਂ ਵਿਚੋਂ ਇੱਕ 'ਤੇ ਡਰਾਈਵਿੰਗ ਪਾਬੰਦੀ ਦੇ ਬਾਵਜੂਦ ਗੱਡੀ ਚਲਾਉਣ ਅਤੇ ਦੂਜੇ 'ਤੇ ਹਥਿਆਰਾਂ ਨਾਲ ਸਬੰਧਤ ਦੋਸ਼ ਲਗਾਏ ਗਏ ਹਨ।

ਕੈਲੋਨਾ ਆਰ.ਸੀ.ਐਮ.ਪੀ. ਦੀ ਕ੍ਰਾਈਮ ਰਿਡਕਸ਼ਨ ਯੂਨਿਟ ਦੇ ਸਰਜੈਂਟ ਸਕਾਟ ਪਾਵਰੀ ਨੇ ਕਿਹਾ ਕਿ ਇਹ ਟੀਮ ਡਰੱਗ ਅਤੇ ਓਰਗਨਾਈਜ਼ਡ ਕ੍ਰਾਈਮ ਯੂਨਿਟ ਅਤੇ ਅਪਰਾਧਿਕ ਖੁਫੀਆ ਵਿਸ਼ਲੇਸ਼ਕ ਵਰਗੀਆਂ ਹੋਰਨਾਂ ਅਹਿਮ ਯੂਨਿਟਸ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ, ਜਿਸ ਨਾਲ ਅਪਰਾਧੀਆਂ ਵਿਰੁੱਧ ਇੰਟੈਲੀਜੈਂਸ ਦੇ ਆਧਾਰ 'ਤੇ ਸਖ਼ਤ ਕਾਰਵਾਈ ਯਕੀਨੀ ਬਣਾਈ ਜਾ ਰਹੀ ਹੈ।