12.4C Vancouver 12.4C VancouverDec 12, 2023 5:11 PM -
ਕੇਨੇਥ ਲਾਅ ਹੁਣ ਓਨਟੇਰੀਓ ਵਿੱਚ ਸੁਸਾਈਡ ਕਿੱਟ ਵੇਚਣ ਦੇ ਮਾਮਲੇ ਵਿੱਚ 14 ਸੈਕਿੰਡ ਡਿਗਰੀ ਕਤਲ ਦੇ ਦੋਸ਼ਾਂ ਦਾ ਸਾਹਮਣਾ ਕਰੇਗਾ। ਪਹਿਲਾਂ ਉਸ 'ਤੇ ਖੁਦਕੁਸ਼ੀ ਲਈ ਉਕਸਾਉਣ ਦੇ 14 ਚਾਰਜਿਸ ਸਨ। ਪੁਲਿਸ ਮੁਤਾਬਕ ਕੇਨੇਥ ਲਾਅ ਕਾਨੂੰਨੀ ਤੌਰ 'ਤੇ ਮਨਜ਼ੂਰਸ਼ੁਦਾ ਰਸਾਇਣਕ ਪਦਾਰਥਾਂ ਦਾ ਇਸਤੇਮਾਲ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਲੋਕਾਂ ਨੂੰ ਸੁਸਾਈਡ ਲਈ ਉਕਸਾਉਣ ਲਈ ਕਰ ਰਿਹਾ ਸੀ।
ਉਸ ਨੇ 2020 ਤੋਂ ਵੈੱਬਸਾਈਟਸ ਜ਼ਰੀਏ ਕੈਨੇਡਾ, ਬ੍ਰਿਟੇਨ ਅਤੇ ਅਮਰੀਕਾ ਸਮੇਤ 40 ਤੋਂ ਵੱਧ ਦੇਸ਼ਾਂ ਦੇ ਲੋਕਾਂ ਨੂੰ ਘੱਟੋ-ਘੱਟ 1,200 ਪੈਕੇਜ ਵੇਚੇ, ਜਿਨ੍ਹਾਂ ਵਿੱਚੋਂ ਲਗਭਗ 160 ਪੈਕੇਜ ਕੈਨੇਡਾ ਵਿੱਚ ਵੇਚੇ ਗਏ ਸਨ।
ਵਿਸ਼ਵ ਪੱਧਰ 'ਤੇ ਵੀ ਉਹ ਕਈ ਸ਼ੱਕੀ ਮੌਤਾਂ ਦੇ ਮਾਮਲੇ ਵਿੱਚ ਪੁਲਿਸ ਜਾਂਚ ਦੇ ਕੇਂਦਰ ਵਿੱਚ ਹੈ, ਯੂ. ਕੇ. ਦੀ ਨੈਸ਼ਨਲ ਕ੍ਰਾਈਮ ਏਜੰਸੀ ਦਾ ਮੰਨਣਾ ਹੈ ਕਿ ਬ੍ਰਿਟੇਨ ਵਿੱਚ 272 ਲੋਕਾਂ ਨੇ ਉਸ ਤੋਂ ਕੈਮੀਕਲ ਪੈਕੇਜ ਖਰੀਦੇ ਸਨ, ਜਿਨ੍ਹਾਂ ਵਿੱਚੋਂ 88 ਦੀ ਮੌਤ ਹੋ ਗਈ।
ਕੇਨੇਥ ਨੂੰ ਪਹਿਲੀ ਵਾਰ ਮਈ ਵਿੱਚ ਪੀਲ ਰੀਜਨਲ ਪੁਲਿਸ ਵੱਲੋਂ ਦੋ ਲੋਕਲ ਮੌਤਾਂ ਦੀ ਜਾਂਚ ਕਰਨ ਤੋਂ ਬਾਅਦ ਗ੍ਰਿਫਤਾਰ ਕੀਤਾ ਗਿਆ ਸੀ। ਓਨਟੇਰੀਓ ਤੋਂ ਬਾਹਰ ਹੋਰ ਸੂਬਿਆਂ ਵਿੱਚ ਪਿਛਲੇ ਸਮੇਂ ਵਿੱਚ ਹੋਈਆਂ ਅਚਾਨਕ ਮੌਤਾਂ ਦੇ ਮਾਮਲੇ ਵਿੱਚ ਵੀ ਜਾਂਚ ਚੱਲ ਰਹੀ ਹੈ। ਰਿਪੋਰਟਸ ਦਾ ਕਹਿਣਾ ਹੈ ਕਿ ਦੁਨੀਆ ਭਰ ਵਿੱਚ 117 ਮੌਤਾਂ ਦਾ ਕੇਨੇਥ ਲਾਅ ਦੇ ਪ੍ਰੋਡਕਟਸ ਨਾਲ ਸਬੰਧ ਹੋਣ ਦਾ ਸ਼ੱਕ ਹੈ।
