14.24C Vancouver 14.24C VancouverAug 15, 2022 2:55 PM - THE CANADIAN PRESS
ਹੁਣ ਤੱਕ ਐਲਬਰਟਾ ਦੇ ਪ੍ਰੀਮੀਅਰ ਜੇਸਨ ਕੈਨੀ ਆਪਣੀ ਜਗ੍ਹਾ ਲਈ ਕਿਸੇ ਮਨਪਸੰਦ ਨੂੰ ਚੁਣਨ ਦਾ ਨਾਮ ਲੈਣ ਤੋਂ ਇਨਕਾਰ ਕਰਦੇ ਰਹੇ ਹਨ ਪਰ ਹੁਣ ਉਨ੍ਹਾਂ ਨੇ ਲੀਡਰਸ਼ਿਪ ਦੀ ਦੌੜ ਵਿਚ ਉਤਰੇ ਉਮੀਦਵਾਰਾਂ ਵਿਚ ਇੱਕ 'ਤੇ ਨਿਸ਼ਾਨਾ ਵਿੰਨ੍ਹਿਆ ਹੈ।
ਯੂ. ਸੀ. ਪੀ. ਲੀਡਰਸ਼ਿਪ ਉਮੀਦਵਾਰ ਡੈਨੀਅਲ ਸਮਿਥ ਵੱਲੋਂ ਪ੍ਰਸਤਾਵਿਤ ਐਲਬਰਟਾ ਸਾਵੇਰਨਿਟੀ ਐਕਟ ਨੂੰ ਜੇਸਨ ਕੇਨੀ ਨੇ ਪਾਗਲਪਣ ਕਰਾਰ ਦਿੱਤਾ।
ਕੈਨੀ ਨੇ ਕਿਹਾ ਕਿ ਭਾਵੇਂ ਵਿਧਾਨ ਸਭਾ ਇਹ ਕਾਨੂੰਨ ਪਾਸ ਕਰ ਦੇਵੇ ਪਰ ਮੈਨੂੰ ਪਤਾ ਕਿ ਲੈਫਟੀਨੈਂਟ-ਗਵਰਨਰ ਤੋਂ ਇਸ ਨੂੰ ਮਨਜ਼ੂਰੀ ਨਹੀਂ ਮਿਲਣੀ ਅਤੇ ਐਲਬਰਟਾ ਹਾਸੇ ਦਾ ਪਾਤਰ ਬਣ ਕੇ ਰਹਿ ਜਾਵੇਗਾ।
ਗੌਰਤਲਬ ਹੈ ਕਿ ਸਮਿਥ ਦਾ ਕਹਿਣਾ ਹੈ ਕਿ ਜੇ ਉਹ ਲੀਡਰਸ਼ਿਪ ਦੀ ਰੇਸ ਜਿੱਤੀ ਤਾਂ ਉਹ ਐਲਬਰਟਾ ਨੂੰ ਖੁਦਮੁਖਤਿਆਰੀ ਦਿਵਾਉਣ ਲਈ ਬਿੱਲ ਲੈ ਕੇ ਆਉਣਗੇ, ਜਿਸ ਵਿਚ ਸੂਬੇ ਨੂੰ ਉਸ ਦੇ ਹਿੱਤਾਂ ਖਿਲਾਫ਼ ਫੈਡਰਲ ਕਾਨੂੰਨਾਂ ਅਤੇ ਅਦਾਲਤਾਂ ਦੇ ਹੁਕਮਾਂ ਨੂੰ ਨਾ-ਸਵੀਕਾਰ ਕਰਨ ਦੀ ਤਾਕਤ ਦਿੱਤੀ ਜਾਵੇਗੀ।
ਉੱਥੇ ਹੀ, ਕਾਨੂੰਨੀ ਵਿਦਵਾਨਾਂ ਦਾ ਕਹਿਣਾ ਹੈ ਕਿ ਅਜਿਹਾ ਬਿੱਲ ਗੈਰ-ਕਾਨੂੰਨੀ ਅਤੇ ਲਾਗੂ ਨਹੀਂ ਕੀਤਾ ਜਾ ਸਕਦਾ। ਸਮਿਥ ਨੇ ਐਤਵਾਰ ਨੂੰ ਇੱਕ ਬਿਆਨ ਵਿਚ ਲੀਡਰਸ਼ਿਪ ਮੁਕਾਬਲੇ ਵਿਚ ''ਦਖਲਅੰਦਾਜ਼ੀ'' ਲਈ ਕੈਨੀ ਦੀ ਟਿੱਪਣੀ ਦੀ ਨਿੰਦਾ ਕੀਤੀ ਹੈ। ਸਮਿਥ ਨੇ ਕਿਹਾ ਕਿ ਕੈਨੀ ਦੇ ਕੁਮੈਂਟਸ ਇਸ ਪਹਿਲਕਦਮੀ ਦੀ ਵੱਡੀ ਗਿਣਤੀ ਵਿਚ ਸਮਰਥਨ ਕਰਨ ਵਾਲੇ ਯੂ. ਸੀ. ਪੀ. ਮੈਂਬਰਾਂ ਲਈ ਗਲਤ ਅਤੇ ਨਿਰਾਦਰ ਕਰਨ ਵਾਲੇ ਹਨ।
