19.04C Vancouver 19.04C VancouverMay 27, 2020 4:14 PM -
ਬੀ.ਸੀ. ਸੁਪ੍ਰੀਮ ਕੋਰਟ ਜਸਟਿਸ, ਹੈਦਰ ਹੋਮਜ਼ ਨੇ ਅੱਜ ਵੁਆਵੇ ਦੀ ਸੀ.ਐਫ.ਓ. (ਚੀਫ਼ ਫਾਇਨੈਨਸ਼ੀਅਲ ਅਫ਼ਸਰ), ਮੈਂਗ ਵਾਂਜ਼ੂ ਦੇ ਅਮਰੀਕਾ ਨੂੰ ਹਵਾਲਗੀ (extradition) ਦੇ ਮਾਮਲੇ 'ਚ ਉਨ੍ਹਾਂ ਦੇ ਖਿਲਾਫ਼ ਫੈਸਲਾ ਸੁਣਾਇਆ ਹੈ।
ਇਸ ਦਾ ਮਤਲਬ ਹੈ ਕਿ ਮੈਂਗ ਵਾਂਜ਼ੂ ਨੂੰ ਡਬਲ ਕ੍ਰਿਮੀਨੈਲਿਟੀ ਲਈ ਯੋਗ ਪਾਇਆ ਗਿਆ ਹੈ, ਅਤੇ ਇਸ ਦਾ ਅਰਥ ਹੈ ਕਿ ਉਨ੍ਹਾਂ ਖਿਲਾਫ਼ ਅਮਰੀਕਾ 'ਚ ਜਿਹੜੇ ਅਪਰਾਧਾਂ ਦੇ ਇਲਜ਼ਾਮ ਲੱਗ ਰਹੇ ਹਨ, ਉਨ੍ਹਾਂ ਅਪਰਾਧਾਂ ਸੰਬੰਧੀ ਇਲਜ਼ਾਮਾਂ ਨੂੰ ਕੈਨੇਡਾ ਦੀ ਕਨੂੰਨੀ ਪ੍ਰਕਿਰਿਆ 'ਚ ਵੀ ਯੋਗ ਮੰਨਿਆ ਜਾ ਸਕਦਾ ਹੈ।
ਹੁਣ ਮੈਂਗ ਵਾਂਜ਼ੂ ਖਿਲਾਫ਼ ਕੈਨੇਡਾ 'ਚ ਜਾਰੀ ਉਨ੍ਹਾਂ ਦੀ ਅਮਰੀਕਾ ਨੂੰ ਸਪੁਰਦਗੀ ਦੇ ਮਾਮਲੇ ਨੂੰ ਅੱਗੇ ਵਧਾਇਆ ਜਾ ਸਕਦਾ ਹੈ।
ਹਾਲਾਂਕਿ ਇਸ ਦਾ ਇਹ ਵੀ ਅਰਥ ਹੈ ਕਿ ਇਸ ਮਾਮਲੇ ਨਾਲ ਜੁੜੀਆਂ ਹੋਰ ਕਈ ਦਲੀਲਾਂ 'ਤੇ ਵੀ ਸੁਣਵਾਈ ਹੁੰਦੀ ਰਹੇਗੀ। ਇਸ ਦੇ ਵਿੱਚ ਉਨ੍ਹਾਂ ਦੀ ਦਿਸੰਬਰ 2018 'ਚ ਵੈਨਕੂਵਰ ਹਵਾਈ ਅੱਡੇ 'ਤੇ ਹੋਈ ਗ੍ਰਿਫਤਾਰੀ ਦੇ ਮਾਮਲੇ ਦੀ ਸੁਣਵਾਈ ਵੀ ਸ਼ਾਮਿਲ ਰਹੇਗੀ।
ਇਸ ਫੈਸਲੇ ਤੋਂ ਬਾਅਦ ਹੁਣ ਮੈਂਗ ਵਾਂਜ਼ੂ ਕੋਲ ਚੀਨ ਜਾਣ ਦੀ ਇਜਾਜ਼ਤ ਨਹੀਂ ਹੋਵੇਗੀ ਅਤੇ ਉਨ੍ਹਾਂ ਨੂੰ ਕੈਨੇਡਾ 'ਚ ਹੀ ਰਹਿਣਾ ਪਵੇਗਾ।
ਮੈਂਗ ਵਾਂਜ਼ੂ ਖਿਲਾਫ਼ ਲੱਗੇ ਇਲਜ਼ਾਮ ਸਾਲ 2013 ਦੇ ਹਨ। ਮੈਂਗ ਵਾਂਜ਼ੂ ਵੁਆਵੇ ਦੀ ਚੀਫ਼ ਫਾਇਨੈਨਸ਼ੀਅਲ ਅਫ਼ਸਰ ਹਨ ਅਤੇ ਕੰਪਨੀ ਦੇ ਸੰਸਥਾਪਕ ਰੈਨ ਜ਼ੈਂਗਫੇ ਦੀ ਧੀ ਹਨ।
ਮੈਂਗ ਵਾਂਜ਼ੂ ਨੇ ਖ਼ੁਦ 'ਤੇ ਲੱਗੇ ਇਲਜ਼ਾਮਾਂ ਨੂੰ ਲਗਾਤਾਰ ਨਕਾਰਿਆ ਹੈ ਅਤੇ ਕਿਹਾ ਹੈ ਕਿ ਉਨ੍ਹਾਂ HSBC ਨੂੰ ਕਦੀ ਵੀ ਕੋਈ ਗਲਤ ਜਾਣਕਾਰੀ ਨਹੀਂ ਦਿੱਤੀ ਸੀ।
ਯਾਦ ਰਹੇ ਸਾਲ 2018 'ਚ ਹੋਈ ਮੈਂਗ ਵਾਂਜ਼ੂ ਦੀ ਗ੍ਰਿਫਤਾਰੀ ਤੋਂ ਬਾਅਦ ਤੋਂ ਕੈਨੇਡਾ ਅਤੇ ਚੀਨ ਦੇ ਰਿਸ਼ਤਿਆਂ 'ਚ ਤ੍ਰੇੜ ਰਹੀ ਹੈ।
