ਫੇਸਬੁੱਕ ਮਾਰਕੀਟਪਲੇਸ ਮੀਟਿੰਗ ਦੌਰਾਨ ਹੋਈ ਲੁੱਟ ਦੀ ਜਾਂਚ ਕਰ ਰਹੀ ਹੈ ਲੈਂਗਲੀ ਆਰ.ਸੀ.ਐਮ.ਪੀ.

ਲੈਂਗਲੀ ਵਿਚ ਔਨਲਾਈਨ ਮਾਰਕੀਟਪਲੇਸ ਰਾਹੀਂ ਡੀਲ ਕਰਨ ਵਾਲੀ ਇੱਕ ਮਹਿਲਾ ਨਾਲ ਲੁੱਟ-ਖੋਹ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਮੁਤਾਬਕ, ਮਹਿਲਾ ਨੇ ਫੇਸਬੁੱਕ ਮਾਰਕੀਟਪਲੇਸ 'ਤੇ ਆਪਣਾ ਇੱਕ ਕੀਮਤੀ ਡਿਜ਼ਾਈਨਰ ਹੈਂਡਬੈਗ ਵੇਚਣ ਲਈ ਇਸ਼ਤਿਹਾਰ ਦਿੱਤਾ ਸੀ।

ਖਰੀਦਦਾਰ ਬਣ ਕੇ ਆਏ ਇੱਕ ਨੌਜਵਾਨ ਨੇ ਉਸ ਨੂੰ 85 ਐਵੇਨਿਊ ਦੇ 20000 ਬਲਾਕ ਵਿਚ ਇੱਕ ਰਿਹਾਇਸ਼ੀ ਇਮਾਰਤ ਵਿਚ ਬੁਲਾਇਆ। ਪਹਿਲਾਂ ਉਸ ਨੇ ਇਮਾਰਤ ਦੇ ਅੰਦਰ ਬੈਗ ਦੇਖਿਆ ਅਤੇ ਫਿਰ ਝਾਂਸਾ ਦੇ ਕੇ ਬਾਹਰ ਲੈ ਆਇਆ ਤੇ ਮਹਿਲਾ ਦੇ ਹੱਥੋਂ ਬੈਗ ਖੋਹ ਕੇ ਉਸ ਨੂੰ ਜ਼ਮੀਨ 'ਤੇ ਧੱਕਾ ਦੇ ਸੁੱਟ ਦਿੱਤਾ।

ਇਸ ਤੋਂ ਬਾਅਦ ਪਹਿਲਾਂ ਤੋਂ ਸਟਾਰਟ ਖੜ੍ਹੀ ਇੱਕ ਗੱਡੀ ਵਿਚ ਸਵਾਰ ਹੋ ਕੇ ਫਰਾਰ ਹੋ ਗਿਆ। ਇਹ ਘਟਨਾ ਕੱਲ ਸ਼ਾਮ ਕਰੀਬ 6:20 ਵਜੇ ਵਾਪਰੀ। ਲੈਂਗਲੀ ਆਰ.ਸੀ.ਐਮ.ਪੀ. ਨੇ ਸੀਸੀਟੀਵੀ ਫੁਟੇਜ ਤੋਂ ਸ਼ੱਕੀ ਦੀ ਤਸਵੀਰ ਜਾਰੀ ਕਰਦੇ ਹੋਏ ਲੋਕਾਂ ਤੋਂ ਉਸ ਦੀ ਪਛਾਣ ਵਿਚ ਮਦਦ ਮੰਗੀ ਹੈ।

ਸਾਰਜੈਂਟ ਜ਼ਾਈਨਲ ਸ਼ਾਰੂਮ ਨੇ ਕਿਹਾ ਕਿ ਅਜਿਹੀਆਂ ਘਟਨਾਵਾਂ ਸਾਨੂੰ ਸੁਚੇਤ ਕਰਦੀਆਂ ਹਨ ਕਿ ਅਣਜਾਣ ਲੋਕਾਂ ਨਾਲ ਆਨਲਾਈਨ ਲੈਣ-ਦੇਣ ਕਰਨ ਸਮੇਂ ਕਿੰਨਾ ਖਤਰਾ ਹੋ ਸਕਦਾ ਹੈ।