ਟਰੂਡੋ ਦੀ ਸਰਕਾਰ ਵਲੋਂ ਕੈਪੀਟਲ ਗੇਨ ਟੈਕਸ ਵਿਚ ਕੀਤਾ ਵਾਧਾ ਅੱਜ ਤੋਂ ਹੋਇਆ ਲਾਗੂ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਸਰਕਾਰ ਵਲੋਂ ਕੈਪੀਟਲ ਗੇਨ ਟੈਕਸ ਵਿਚ ਕੀਤਾ ਵਾਧਾ ਅੱਜ ਤੋਂ ਲਾਗੂ ਹੋ ਗਿਆ ਹੈ। ਕੈਨੇਡੀਅਨਾਂ ਨੂੰ ਹੁਣ ਸਾਲ ਵਿਚ $250,000 ਤੋਂ ਵੱਧ ਦੇ ਇਨਵੈਸਟਮੈਂਟ ਪ੍ਰੋਫਿਟ ਦੇ ਮਾਮਲੇ ਵਿਚ ਲਗਭਗ 66 ਫੀਸਦੀ ਹਿੱਸੇ ਉੱਤੇ ਟੈਕਸ ਦੇਣਾ ਹੋਵੇਗਾ, ਪਹਿਲਾਂ ਇਕ ਵਿਅਕਤੀ ਲਈ ਕੈਪੀਟਲ ਗੇਨ ਦੀ 50 ਫੀਸਦੀ ਰਾਸ਼ੀ ਹੀ ਟੈਕਸ ਯੋਗ ਹੁੰਦੀ ਸੀ, ਹੁਣ ਇਹ ਲਿਮਟ $250,000 ਤੱਕ ਦੇ ਪਹਿਲੇ ਕੈਪੀਟਲ ਗੇਨ ਤੱਕ ਹੀ ਸੀਮਤ ਹੋਵੇਗੀ।

ਉੱਥੇ ਹੀ ਕਾਰਪੋਰੇਸ਼ਨਾਂ ਨੂੰ ਸਾਰੇ ਤਰ੍ਹਾਂ ਦੇ ਕੈਪੀਟਲ ਗੇਨ ਲਈ ਉੱਚ ਦਰ ਦਾ ਹੀ ਸਾਹਮਣਾ ਕਰਨਾ ਪਵੇਗਾ। ਕੈਪੀਟਲ ਗੇਨ ਉਹ ਪ੍ਰੋਫਿਟ ਹੁੰਦਾ ਹੈ ਜਦੋਂ ਤੁਸੀਂ ਕੋਈ ਸੰਪਤੀ ਜਾਂ ਸੰਪਤੀ ਨੂੰ ਇਸ ਦੇ ਅਸਲੀ ਮੁੱਲ ਤੋਂ ਵੱਧ ਕੀਮਤ ਲਈ ਵੇਚਦੇ ਹੋ, ਇਹ ਕਾਟੇਜ, ਨਿਵੇਸ਼ ਸੰਪਤੀ, ਸ਼ੇਅਰ ਜਾਂ ਮਿਊਚਲ ਫੰਡ ਵਿਚੋਂ ਕੋਈ ਵੀ ਹੋ ਸਕਦਾ ਹੈ।

ਕੈਨੇਡਾ ਵਿਚ ਕੈਪੀਟਲ ਗੇਨ ਟੈਕਸ - ਪ੍ਰਾਇਮਰੀ ਨਿਵਾਸ ਦੀ ਵਿਕਰੀ ’ਤੇ ਲਾਗੂ ਨਹੀਂ ਹੁੰਦਾ। ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨੇ ਕੈਪੀਟਲ ਗੇਨ ਟੈਕਸ ਵਿਚ ਤਬਦੀਲੀਆਂ ਅਪ੍ਰੈਲ ਦੇ ਬਜਟ ਵਿਚ ਪੇਸ਼ ਕੀਤੀਆਂ ਸਨ, ਉਨ੍ਹਾਂ ਦਾ ਕਹਿਣਾ ਸੀ ਕਿ ਇਸ ਨਾਲ ਫੈਡਰਲ ਸਰਕਾਰ ਨੂੰ ਪੰਜ ਸਾਲਾਂ ਵਿਚ $19 ਬਿਲੀਅਨ ਦੀ ਕਮਾਈ ਹੋਵੇਗੀ, ਜਿਸ ਨਾਲ ਮਿਡਲ ਕਲਾਸ ਲਈ ਸਮਾਜਿਕ ਪ੍ਰੋਗਰਾਮ ਅਤੇ ਹਾਊਸਿੰਗ ਪ੍ਰੋਗਰਾਮ ਨੂੰ ਕਵਰ ਕਰਨ ਵਿਚ ਮਦਦ ਮਿਲੇਗੀ।