ਜ਼ਮਾਨਤ-ਸੁਧਾਰ ਕਾਨੂੰਨ 'ਚ ਕੀਤੀਆਂ ਤਬਦੀਲੀਆਂ ਸਵੀਕਾਰ , ਅਪਰਾਧੀਆਂ ਨੂੰ ਜ਼ਮਾਨਤ ਮਿਲਣੀ ਹੋਵੇਗੀ ਮੁਸ਼ਕਿਲ

ਕੈਨੇਡਾ ਵਿੱਚ ਅਪਰਾਧ ਨੂੰ ਦੁਹਰਾਉਣ ਵਾਲੇ ਅਪਰਾਧੀਆਂ ਨੂੰ ਜ਼ਮਾਨਤ ਮਿਲਣਾ ਜਲਦ ਮੁਸ਼ਕਿਲ ਹੋਣ ਵਾਲਾ ਹੈ। ਹਾਊਸ ਆਫ ਕਾਮਨਜ਼ ਨੇ ਜ਼ਮਾਨਤ-ਸੁਧਾਰ ਕਾਨੂੰਨ ਵਿੱਚ ਸੈਨੇਟ ਵੱਲੋਂ ਕੀਤੀਆਂ ਗਈਆਂ ਤਬਦੀਲੀਆਂ ਸਵੀਕਾਰ ਕਰ ਲਈਆਂ ਹਨ।

ਨਿਆਂ ਮੰਤਰੀ ਆਰਿਫ ਵਿਰਾਨੀ ਨੇ ਬੀਤੇ ਕੱਲ੍ਹ ਐਮ.ਪੀਜ਼ ਨੂੰ Bill C-48 ਵਿੱਚ ਸੋਧਾਂ ਪਾਸ ਕਰਨ ਦੀ ਅਪੀਲ ਕੀਤੀ, ਜਿਸ ਨੂੰ ਹਾਊਸ ਨੇ ਸਰਬਸੰਮਤੀ ਨਾਲ ਹਰੀ ਝੰਡੀ ਦੇ ਦਿੱਤੀ। ਕੈਨੇਡਾ ਭਰ ਦੇ ਪ੍ਰੀਮੀਅਰਸ ਅਤੇ ਪੁਲਿਸ ਚੀਫਸ ਅਪਰਾਧ ਨੂੰ ਦੁਹਰਾਉਣ ਵਾਲੇ ਹਿੰਸਕ ਅਪਰਾਧੀਆਂ ਲਈ ਜ਼ਮਾਨਤ ਸ਼ਰਤਾਂ ਨੂੰ ਮੁਸ਼ਕਲ ਕਰਨ ਦੀ ਲਗਾਤਾਰ ਮੰਗ ਕਰ ਰਹੇ ਸਨ ਜਿਸ ਨੂੰ ਦੇਖਦਿਆਂ ਲਿਬਰਲ ਸਰਕਾਰ ਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਇਹ ਬਿੱਲ ਪੇਸ਼ ਕੀਤਾ ਸੀ। ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਵੀ ਇਸ ਮੁੱਦੇ ਨੂੰ ਜ਼ੋਰ-ਸ਼ੋਰ ਨਾਲ ਚੁੱਕ ਰਹੇ ਸਨ।

ਹਰ ਪਾਸਿਓਂ ਦਬਾਅ ਵਧਣ ਮਗਰੋਂ ਸਾਬਕਾ ਨਿਆਂ ਮੰਤਰੀ ਡੇਵਿਡ ਲੈਮੇਟੀਨੇ ਮਈ ਵਿੱਚ ਜ਼ਮਾਨਤ-ਸੁਧਾਰ ਕਾਨੂੰਨ ਟੇਬਲ 'ਤੇ ਰੱਖਿਆ ਸੀ। ਇੱਥੇ ਦੱਸਣਾ ਬਣਦਾ ਹੈ ਕਿ ਕੰਜ਼ਰਵੇਟਿਵ ਨੇ ਬੇੱਸ਼ਕ ਜ਼ਮਾਨਤ-ਸੁਧਾਰ ਕਾਨੂੰਨ ਨੂੰ ਸਮਰਥਨ ਦਿੱਤਾ ਪਰ ਇਸ ਨੂੰ ਵੱਡੀਆਂ ਸਮੱਸਿਆਵਾਂ ਲਈ "ਛੋਟਾ ਸਮਾਧਾਨ" ਕਰਾਰ ਦਿੱਤਾ ਹੈ।

ਗੌਰਤਲਬ ਹੈ ਕਿ ਕੈਨੇਡਾ ਵਿੱਚ ਕਤਲ ਦੀਆਂ ਵਾਰਦਾਤਾਂ ਦੀ ਦਰ 30 ਸਾਲਾਂ ਵਿੱਚ ਸਭ ਤੋਂ ਉੱਚੇ ਪੱਧਰ 'ਤੇ ਹੈ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, 2022 ਵਿੱਚ 874 ਲੋਕਾਂ ਦਾ ਕਤਲ ਹੋਇਆ ਜੋ ਇਸ ਤੋਂ ਪਿਛਲੇ ਸਾਲ ਦੇ ਮੁਕਾਬਲੇ ਲਗਭਗ 9 ਫੀਸਦੀ ਵਾਧਾ ਸੀ। ਮੈਨੀਟੋਬਾ ਇਸ ਮਾਮਲੇ ਵਿੱਚ ਟੌਪ 'ਤੇ ਸੀ, ਜਦੋਂ ਕਿ ਸਸਕੈਚਵਨ ਦੂਜੇ ਨੰਬਰ ਅਤੇ ਬ੍ਰਿਟਿਸ਼ ਕੋਲੰਬੀਆ ਤੀਜੇ 'ਤੇ ਸਨ।