ਮਾਂਟਰੀਅਲ ਵਿੱਚ ਅੰਤਿਮ ਬਹਿਸ ਵਿੱਚ ਲਿਬਰਲ ਲੀਡਰਸ਼ਿਪ ਦੇ ਉਮੀਦਵਾਰ ਹੋਣਗੇ ਆਹਮੋ-ਸਾਹਮਣੇ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਜਗ੍ਹਾ ਪ੍ਰਧਾਨ ਮੰਤਰੀ ਬਣਨ ਲਈ ਲਿਬਰਲ ਪਾਰਟੀ ਦੇ ਲੀਡਰਸ਼ਿਪ ਉਮੀਦਵਾਰ ਅੱਜ ਰਾਤ ਮਾਂਟਰੀਅਲ ਵਿਚ ਅੰਗਰੇਜ਼ੀ-ਭਾਸ਼ਾ ਵਿਚ ਅੰਤਿਮ ਬਹਿਸ ਲਈ ਆਹਮੋ ਸਾਹਮਣੇ ਹੋਣਗੇ। ਬੀਤੀ ਰਾਤ ਚਾਰੋ ਉਮੀਦਵਾਰਾਂ ਵਿਚਕਾਰ ਫਰੈਂਚ-ਭਾਸ਼ਾ ਵਿਚ ਡਿਬੇਟ ਹੋਈ ਸੀ ਅਤੇ ਸਭ ਤੋਂ ਅੱਗੇ ਮੰਨੇ ਜਾਂਦੇ ਕਾਰਨੀ ਫਰੈਂਚ ਵਿਚ ਸਭ ਤੋਂ ਵੱਧ ਲੜਖੜਾਏ।

ਹਾਲਾਂਕਿ, ਉਨ੍ਹਾਂ ਦੀ ਬੜ੍ਹਤ ਦੇ ਬਾਵਜੂਦ ਕਿਸੇ ਵੀ ਉਮੀਦਵਾਰ ਨੇ ਉਨ੍ਹਾਂ ’ਤੇ ਸ਼ਬਦੀ ਹਮਲਾ ਨਹੀਂ ਕੀਤਾ। ਇੱਥੋਂ ਤੱਕ ਕਿ ਫ੍ਰੀਲੈਂਡ ਨੇ ਇੱਕ ਸਮੇਂ ਉਨ੍ਹਾਂ ਨੂੰ ਉਦੋਂ ਬਚਾਇਆ ਜਦੋਂ ਉਨ੍ਹਾਂ ਨੇ ਹਮਾਸ ਅਤੇ ਗਾਜ਼ਾ ਵਿਚ ਯੁੱਧ ਬਾਰੇ ਇੱਕ ਗਲਤ ਟਿੱਪਣੀ ਕੀਤੀ। ਇਸ ਦੇ ਨਾਲ ਹੀ ਪੂਰੀ ਡਿਬੇਟ ਦੌਰਾਨ ਉਮੀਦਵਾਰਾਂ ਵਿਚ ਮਾਹੌਲ ਸ਼ਾਂਤ ਤੇ ਇੱਕ-ਦੂਜੇ ਪ੍ਰਤੀ ਸਤਿਕਾਰਯੋਗ ਰਿਹਾ ਅਤੇ ਉਨ੍ਹਾਂ ਨੇ ਟਰੰਪ, ਹਮਾਸ, ਕਰਿਆਨੇ ਦੀਆਂ ਕੀਮਤਾਂ ਤੇ ਕਿਊਬੈਕ ਦੇ ਵਿਵਾਦਿਤ ਬਿੱਲ 21 ਬਾਰੇ ਆਪਣੇ ਵਿਚਾਰ ਪੇਸ਼ ਕੀਤੇ।

ਗੂਲਡ ਅਤੇ ਫ੍ਰੀਲੈਂਡ ਨੇ ਜਿੱਥੇ ਕਿਊਬੈਕ ਦੇ ਬਿੱਲ 21 ਵਿਚ ਦਖ਼ਲ ਦੇਣ ਦਾ ਸਮਰਥਨ ਕੀਤਾ, ਉਥੇ ਹੀ ਕਾਰਨੀ ਨੇ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਕੀ ਉਹ ਇਸ ਮੁੱਦੇ ’ਤੇ ਦਖਲ ਦੇਣਗੇ ਜਾਂ ਨਹੀਂ, ਚੌਥੇ ਉਮੀਦਵਾਰ ਬੇਲਿਸ ਨੇ ਕਿਹਾ ਕਿ ਉਹ ਇਸ ਕਾਨੂੰਨ ਦੀ ਸ਼ੁਰੂਆਤ ਤੋਂ ਹੀ ਇਸ ਦੇ ਵਿਰੋਧ ਵਿਚ ਹਨ। ਕਿਊਬੈਕ ਦਾ ਬਿੱਲ 21 ਸਰਕਾਰੀ ਮੁਲਾਜ਼ਮਾਂ ਨੂੰ ਡਿਊਟੀ ਦੌਰਾਨ ਧਾਰਮਿਕ ਚਿੰਨ੍ਹ ਪਾਉਣ ਤੋਂ ਰੋਕਦਾ ਹੈ।

ਦੱਸ ਦੇਈਏ ਕਿ ਬੁੱਧਵਾਰ ਨੂੰ ਲਿਬਰਲ ਪਾਰਟੀ ਦੇ ਮੈਂਬਰ ਲੀਡਰਸ਼ਿਪ ਉਮੀਦਵਾਰ ਲਈ ਅਗਾਊਂ ਵੋਟਾਂ ਪਾਉਣਾ ਸ਼ੁਰੂ ਕਰਨਗੇ, 9 ਮਾਰਚ ਨੂੰ ਫਾਈਨਲ ਵੋਟਿੰਗ ਦੇ ਨਾਲ ਹੀ ਪਾਰਟੀ ਦਾ ਲੀਡਰ ਚੁਣਿਆ ਜਾਵੇਗਾ।