ਲਿਬਰਲ ਪਾਰਟੀ ਹਾਊਸ ਔਫ ਕਾਮਨ ਦੀਆਂ ਕਮੇਟੀਆਂ 'ਚ ਵਧਾਏਗੀ ਕੰਟਰੋਲ

ਕੈਨੇਡਾ ਦੀ ਸੱਤਾਧਾਰੀ ਲਿਬਰਲ ਪਾਰਟੀ ਵਲੋਂ ਜਲਦ ਹਾਊਸ ਔਫ ਕਾਮਨ ਦੀਆਂ ਕਮੇਟੀਆਂ ਵਿਚ ਕੰਟਰੋਲ ਹਾਸਲ ਕੀਤਾ ਜਾ ਸਕਦਾ ਹੈ। ਇਹ ਕਦਮ ਹਾਲ ਹੀ ਵਿਚ ਬਹੁਮਤ ਪ੍ਰਾਪਤ ਕਰਨ ਮਗਰੋਂ ਉਠਾਇਆ ਜਾ ਰਿਹਾ ਹੈ। ਸਰਕਾਰੀ ਹਾਊਸ ਲੀਡਰ ਸਟੀਵਨ ਮੈਕਕਿਨਨ ਨੇ ਕਿਹਾ ਹੈ ਕਿ ਉਹ ਆਉਣ ਵਾਲੇ ਦਿਨਾਂ ਵਿਚ ਸਦਨ ਵਿਚ ਇਸ ਸਬੰਧੀ ਪ੍ਰਸਤਾਵ ਰੱਖ ਸਕਦੇ ਹਨ, ਜਿਸ ਦਾ ਮਕਸਦ ਜ਼ਿਆਦਾਤਰ ਕਮੇਟੀਆਂ ਵਿਚ ਲਿਬਰਲ ਐਮ.ਪੀਜ਼ ਦੀ ਗਿਣਤੀ ਨੂੰ ਹੋਰ ਪਾਰਟੀਆਂ ਦੇ ਮੈਂਬਰਸ ਨਾਲੋਂ ਵਧਾਉਣਾ ਹੈ।

ਆਮ ਤੌਰ 'ਤੇ ਪਾਰਲੀਮੈਂਟ ਦੇ ਸਟੈਂਡਿੰਗ ਆਰਡਰ 'ਤੇ ਸਹਿਮਤੀ ਸਰਬਸੰਮਤੀ ਨਾਲ ਹੁੰਦੀ ਹੈ ਪਰ ਇਸ ਵਾਰ ਮੈਕਕਿਨਨ ਦੇ ਪ੍ਰਸਤਾਵ 'ਤੇ ਹਾਊਸ ਵਿਚ ਵੋਟਿੰਗ ਕਰਵਾਈ ਜਾਵੇਗੀ। ਇਹ ਕਮੇਟੀਆਂ ਨਵੇਂ ਕਾਨੂੰਨਾਂ ਦੀ ਪੜਚੋਲ ਕਰਨ ਅਤੇ ਸਰਕਾਰ ਦੀ ਜਵਾਬਦੇਹੀ ਤੈਅ ਕਰਨ ਲਈ ਬੇਹੱਦ ਮਹੱਤਵਪੂਰਨ ਹੁੰਦੀਆਂ ਹਨ। ਮੌਜੂਦਾ ਸਮੇਂ ਇਨ੍ਹਾਂ ਕਮੇਟੀਆਂ ਵਿਚ ਲਿਬਰਲਜ਼ ਅਤੇ ਕੰਜ਼ਰਵੇਟਿਵ ਦੇ 4-4 ਮੈਂਬਰਾਂ ਅਤੇ ਇੱਕ ਮੈਂਬਰ ਬਲਾਕ ਕਿਊਬੈਕਵਾ ਦਾ ਹੈ।

ਪ੍ਰਸਤਾਵ ਮੁਤਾਬਕ, ਸਰਕਾਰ ਵਲੋਂ ਆਪਣੇ ਮੈਂਬਰਸ ਦੀ ਗਿਣਤੀ ਵਧਾ ਕੇ 7 ਕਰਨ ਦੀ ਤਜਵੀਜ਼ ਹੈ। ਕੰਜ਼ਰਵੇਟਿਵ ਪਾਰਟੀ ਨੇ ਫੈਡਰਲ ਸਰਕਾਰ ਦੀ ਇਸ ਯੋਜਨਾ ਦੀ ਸਖ਼ਤ ਨਿਖੇਧੀ ਕੀਤੀ ਹੈ।