ਤਿੰਨੇ ਉਪ-ਚੋਣਾਂ ਜਿੱਤ ਕੇ ਕਾਰਨੀ ਸਰਕਾਰ ਨੇ ਬਹੁਮਤ ਕੀਤਾ ਹਾਸਲ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਅਗਵਾਈ ਵਾਲੀ ਲਿਬਰਲ ਪਾਰਟੀ ਨੇ ਸੋਮਵਾਰ ਨੂੰ ਤਿੰਨ ਐਮ.ਪੀ. ਸੀਟਾਂ 'ਤੇ ਹੋਈਆਂ ਜ਼ਿਮਨੀ ਚੋਣਾਂ ਵਿਚ ਜਿੱਤ ਦਰਜ ਕਰਕੇ ਪਾਰਲੀਮੈਂਟ ਵਿਚ ਪੂਰਨ ਬਹੁਮਤ ਹਾਸਲ ਕਰ ਲਿਆ ਹੈ।ਲਿਬਰਲਜ਼ ਕੋਲ ਹੁਣ ਹਾਊਸ ਔਫ ਕਾਮਨਜ਼ ਵਿਚ 174 ਸੀਟਾਂ ਹੋ ਗਈਆਂ ਹਨ, ਜੋ ਬਹੁਮਤ ਲਈ ਜ਼ਰੂਰੀ 172 ਸੀਟਾਂ ਤੋਂ ਦੋ ਵੱਧ ਹਨ।

ਕੈਨੇਡੀਅਨ ਇਤਿਹਾਸ ਵਿਚ ਇਹ ਪਹਿਲੀ ਵਾਰ ਹੈ ਕਿ ਕਿਸੇ ਸੱਤਾਧਾਰੀ ਪਾਰਟੀ ਨੇ ਜ਼ਿਮਨੀ ਚੋਣਾਂ ਅਤੇ ਦਲ-ਬਦਲੀ ਰਾਹੀਂ ਚੱਲ ਰਹੀ ਸਰਕਾਰ ਵਿਚਕਾਰ ਹੀ ਘੱਟਗਿਣਤੀ ਤੋਂ ਬਹੁਮਤ ਵੱਲ ਸਫਰ ਤੈਅ ਕੀਤਾ ਹੋਵੇ। ਓਨਟਾਰੀਓ ਦੀ ਯੂਨੀਵਰਸਿਟੀ–ਰੋਸੇਡਲ ਅਤੇ ਸਕਾਰਬਰੋ ਸਾਊਥ ਵੈਸਟ ਸੀਟਾਂ ਤੋਂ ਲਿਬਰਲਸ ਦੀ ਜਿੱਤ ਆਸਾਨ ਰਹੀ, ਜਦੋਂ ਕਿ ਕਿਊਬੈਕ ਦੀ ਟੈਰੇਬੋਨ ਸੀਟ 'ਤੇ ਪਾਰਟੀ ਨੇ ਇੱਕ ਕਰੜੇ ਮੁਕਾਬਲੇ ਵਿਚ ਲਗਭਗ 700 ਵੋਟਾਂ ਦੇ ਫਰਕ ਨਾਲ ਜਿੱਤ ਦਰਜ ਕੀਤੀ।

ਸਰਕਾਰ ਲਈ ਇਹ ਬਹੁਮਤ ਅਜੇ ਵੀ ਡਗਮਗਾ ਸਕਦਾ ਹੈ, ਰਿਪੋਰਟਸ ਮੁਤਾਬਕ, ਦੋ ਮੌਜੂਦਾ ਲਿਬਰਲ ਐਮ.ਪੀ. ਸੰਭਾਵਿਤ ਤੌਰ 'ਤੇ ਸੈਸ਼ਨ ਖਤਮ ਹੋਣ ਤੋਂ ਪਹਿਲਾਂ ਅਸਤੀਫਾ ਦੇ ਸਕਦੇ ਹਨ, ਜਿਨ੍ਹਾਂ ਵਿਚੋਂ ਜੋਨਾਥਨ ਵਿਲਕਿਨਸਨ ਨੂੰ ਯੂਰਪ ਵਿਚ ਡਿਪਲੋਮੈਟਿਕ ਪੋਸਟ ਦੀ ਪੇਸ਼ਕਸ਼ ਕੀਤੀ ਗਈ ਹੈ ਅਤੇ ਨਥਾਨੀਏਲ ਅਰਸਕਾਈਨ-ਸਮਿਥ ਓਨਟਾਰੀਓ ਲਿਬਰਲ ਦੀ ਲੀਡਰਸ਼ਿਪ ਚੋਣ ਲੜਨ ਲਈ ਵਿਚਾਰ ਕਰ ਰਹੇ ਹਨ। ਇਹ ਵੀ ਅਟਕਲਾਂ ਹਨ ਕਿ ਵਿਰੋਧੀ ਧਿਰ ਦੇ ਹੋਰ ਐਮ.ਪੀ. ਵੀ ਲਿਬਰਲ ਵਿਚ ਸ਼ਾਮਲ ਹੋਣ ਦੀ ਉਡੀਕ ਵਿਚ ਹਨ।